HAOKAPHOK 33
33
Jacobna Esauli Samkaphang
1Jacobna ngashankhavā tharān yanglu, mi shāmati Esauli ngasoda rārāsai. Chieina ana naoshinaobing chi Leah eina Rachel kala raopava̱ khani da athumli ngayarmihaowa. 2Ana raopava̱ khani eina athumwui naobing chi mangāli ringasaka, chiwui thili Leah eina awui naobing kala Rachel eina anaomayara Joseph naoda zatngasaka. 3A khalattana athumwui mangāli zatta amali mavānganairanglakha eina tangda ngaleili shini shida ngakhumshāma. 4Kha Esauna ali samphang khavai ngasamrai, kala ngavamkhui, kala kahungli hungreikhuida maya̱laga ani chapa. 5Esauna yangkāda preinaobing kala naoshinaobing chi kathei eina ngahāna, “Nali khangasobing hi khipālongkhala?” Jacobna hānga, “Naraoli Varena lumashanmida khami naongarābingna.” 6Chieina raopava̱ khani eina aniwui naongarābingna rānganaida ngakhumzanga; 7Leah eina awui naongarābingla chi tākam eina sai; kala naolak eina Rachel eina Josephna rānganaida ngakhumsanga. 8Esauna hānga, “Ili rākhangarok ashangbing china khi kakhalatkhala?” Jacobna ngahānkai, “Ishameina lumashanmi khavai kasāna.” 9Kha Esauna hānga, “Igato, iwuila kashap leiya, nawuili khalei chi nawui vang haihaolu.” 10Jacobna hānga, “Maningmana, ina nali kapona, nawui mangāli ili lukhamashan leiakha iwui pāng eina nali khami hi khuimilu; kaja kachangkhat eina nazak kathei hi Varewui zak kathei thāhaira, nana ili hiyākha lumashanmida rāsamphang khami hi. 11Iwui kachigat hi kakhuimiphalunglu da ina nali kapona, kaja Varena ili mathālak eina yangmihaira, chiwui vang ila leishap leihaira.” Hithāda ana hānglui hānglui kaji eina Esauna khuihaowa.
12Chiwui thili Esauna hānga, “Ithumwui shongzā zatphokusa, ina nawui mangāli zatka.” 13Kha Jacobna ali hānga, “Ishameina thei, kaja naoshinaobing hi mazattheimana, kala seinao ana̱ khamangla zanghaoda ngasharda homzatra; kalikhada thangkha pangna zathaiakha sha̱keibing hi kathila thihaora. 14Ishameina narao ili rida zatsahaolu; ina athumli ngairon eina thānda sha̱keiwui kala naoshinaobingwui shongzā athishurda ishameiwui pam Seir chili ungrāsanaoga.”
15Chieina Esauna hānga, “Ili ngasokazat mibing kaikha nali haimiga.” Kha Jacobna hānga, “Khi savaiurakhala? Nana ili lumashankhami hina vaimalu.” 16Chithāda sāda Esauna aram Seirli latunghaowa. 17Kha Jacobna Succothli vāda, awui vangla, sha̱keiwui vangla shimnao asākhui, chiwui vang apam chiwui aming Succoth hoi. 18Kala Jacobna hapkakhano maleilakla Shechemli vāshunga, apam chi Paddan-aramwui eina ungakha Canaan ngaleili lei, kala keinung mavāshungnāla apama. 19#Jos 24.32; Joh 4.5.Ana awui kachonshim khāngkhaningkakā apam chi Shechemwui avāva̱ Hamorli lupāsā shākha mida lokhui. 20Chili ana hanphut akha sakāda chiwui aming El-Elohe-Israel hoi.
Currently Selected:
HAOKAPHOK 33: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.