HAOKAPHOK 31
31
Jacobna Labanwui eina Khayām
1Labanwui naomayara ngarāna, “Ishavāwui khalei saikora Jacobna khuithuiserhaira; kala ishāvāwui eina kakhui china awui lan kachungkha mataisanghaira” da kahāng chi Jacobna shāhaowa. 2Kala Labanna kharewui thāda ali ngahānkhangai maleithura da Jacobna thei. 3Chiwui thili Prohona Jacobli hānga, “Navāwui ngaleili kala nawui athei-asāli hanunghaolu, kala ina nali ngasomira.” 4Chieina Jacobna Rachel eina Leahli awui yao ashangva̱ hompam khavaipamli rākhavai ahokhui ngasakta, 5anili hānga, “Navāna kharewui thāda ili ngahānkhangai chi maleithura. Kha ishāvāwui Varena ili ngasozatchingda lei. 6Iwui yāng khalei saikora chigatta navāli otram ngatha̱khami nanina thei; 7kha navāna ili minamda iwui chotman tharā shida ngacheimihaira, chithālala ana sākashi sākhavai Varena mamayāmana. 8Ana, ‘Chukpoma saikora nawui chotman sāra’ jiakha katonga chukpomsera; kala ana ‘Khākhanang saikora nawui chotman sāra’ jiakha katonga khānāngsera. 9Chithāda sāda navāwui sha̱kei katonga Varena khuithuihailaga ili mihaira. 10Ngalat kachāngwui mangshongli ina ngashānkhayang chitharān mevā ngawok kazatabing chi khākhanang chukpomasera. 11Chieina Varewui kazingraona mangshongli ili ‘Jacob’ da kaho eina ina, ‘I hili leili!’ da ngahānkai. 12Kala ana hānga, ‘Namik kapeikāda yanglu, ashangvalungli ngawok kazata me saikora khākhanang, chukpomasera; kaja Labanna nali sāda khalei saikora ina theiserhaira. 13Nana ngalung shunlaga thao neomida khangashit sākahai apam Bethelwui Varivara chi ina. Ara hiwui eina ngakarthuida nawui pharāsang khavai ramli hanungulu.’” da hānga. 14Chieina Rachel eina Leahna ali ngahānkai, “Ishāvāwui shimli inina samphangkapai shimlui leila? 15Ana inili yur katei thāda kakhui maningmala? Kaja ana inili yorhailaga chiwui pheisā chi yorzāpamda khaleina. 16Ishāvāwui eina Varena khuithui kahai lan saikora chi iniwui kala naongarāwui ngasāhaira; ara chiwui vang eina Varena kahāng saikora chi sālu.”
17Chieina Jacobna ngakarthuida anaomayara ngarā kala preiva̱ ngarāli uttungli chipama; 18kala ana mathuisang kahai sha̱kei kala Paddan-aramli samkaphang sha̱kei lan saikora khuiphungda avāva̱ Isaacwui lam Canaan ngaleili latunghaowa. 19Laban yaohah chichāp khavai vāhairasai, chieina Rachelna avāva̱wui shim meoma̱ liphunghaowa. 20Arampā Labanli Jacobna thangmeimeihaowa kaja, ana yāmhaora kaji machishātlakmana. 21Awui khalalei saikora khuiphunglaga yāmhaowa, kala Euphrates makānda Gilead phungreishong shanguwa.
Labanna Jacobli Khangahom
22Kakathumathang Labanli Jacob yāmhaira da kahāng eina, 23ana awui theisābing thānphungda shinithang kharomda Gileadwui phungreili ali vānganaihaowa. 24Kha Arampā Labanli Varena chithang ngayā awui mangshongli rāhānga, “Ning ngasharlu, kaphāranu kashiranu, Jacobli khituikha mahānglakalu.”
25Labanna Jacobli angaphankhuiya. Chitharān Jacobna phungreipam akhali kachonshim sālaga leisai, kala Laban eina awui theisābingna Gileadwui phungreili apisanga. 26Labanna Jacobli hānga, “Ina nali khi sahaoda hithāda mikhanamkhala, kala kachiwui vang inao ngarāli raituk thāda khuithui kahaikhala? 27Khisāda nana pao machishātlakla ili minamda yāmhaokhala, ina nali ringkaphā khamathān laasak tingteilā eina chihomihaipaishina kajila? 28Khiwui vang inaomayara ngarā kala inaongalava̱ ngarāli kapāng sāda mamaya̱khui ngasakthukhala? Hi na mangma̱lak eina sāhaira. 29Nali ina sākashi sāga jilala sāshapa, kha navāwui Varena angayā ili rāhānga, ‘Ning ngasharlu, kaphāranu, kashiranu, na Jacobli khikha mahangphāphāpaimara!’ da. 30Ara nana nashāvāwui shimli ungngailakhaoda nana zat kahaina, kha khiwui vang nana iwui meoma̱bing lithuihaokhala?” 31Jacobna Labanli ngahānkai, “Khikhalajila nana nanaongarāli tandi eina ngapaithuihaipaishinada ngacheehaowa. 32Nawui vare khuiphungkasāpā chi maringmara. Iwui theisāwui mangāli iwuili khalei nawuina kaji chi phāshoklu, kala chi khuilu.” Chitharan Rachelna liphungdalei kaji Jacob matheimana.
33Chieina Labanna Jacobwui kachonshimli, Leahwui kālila, raopāva̱ khaniwui kālila zangyangserlaga khikha maleisāmana. Leahwui kachonshim eina shokta Rachelwuili zanga. 34Rachelna shimwui varebing chi khuilaga utwui sāpān eina farorlaga ana kāpamshānhaowa. Labanna kachonshim saikora chili phāyanga, kha masamphangmana. 35Avāva̱li Rachelna hānga, “Ina mangakarkathuiwui vang ishāmeina malung mavātmiranu, kaja sha̱naowui khangachā kazat chi ili leihaowa.” Chieina ana phālala shimwui varebing chi masamphangthuwa.
36Chiwui thili Jacob malungvāthaoda Labanli khararra; Jacobna Labanli hānga, “Iwui khalāng khikhala? Khi morei leihaoda, hiyākha malungvātta kharomkharākhala? 37Iwui ot katonga kapeoserhailala nawui shim ot khi samphangkhala? Nawui kala iwui theisābingwui mangāli chitheilu, athumna iniwui ngachaili bichar samiranu. 38Kum maga̱ ina nali ngayurpamhaira; nawui yaova̱ kala meva̱ akha eina tangda nao tākahai maleiranga, kala nawui yaoshangwui eina yaovā akhanida ina shaikahai maleiranga. 39Ramsāna shaihaisālala nawuili mashānsangla kashimān chi ina phunga; ngashunranu, ngayāranu leethuihaisālala chi iwui kashimān sai. 40Chithāda sāda, ili ngashunwui kasāna kala ngayāwui kasikna pangshap shimān ngasaka, kapi eina tangda masamphangmana. 41Kum maga̱ hi ina nawui shimli pamrāhaira; nanao ngalāva̱ khaniwui vang kum tharāda mati, kala sha̱keiwui vang kum tharuk nali otram ngatha̱rāhaira, kha nana iwui sāman tharāshida ngacheimihaira. 42Ishāvāwui Vare, Abrahamwui Vare, kala Isaacna Khangachee Varena ili manganingmisi kaja nana makahatlakla ili khamasai eina shiunlakra. Iwui kakhanang kala ipāng eina ot kasā chi theida angayā nali Varena rākakaharna.”
Jacob eina Laban Mayākhangarok
43Chiwui thili Labanna ngahānkāda Jacobli hānga, “Sha̱nao khani hi inao ngalāva̱ thathuiya, naoshinaobing hila inaosera, sha̱keibingla iwui sha̱keisera kala nana theida khalei saikora iwuisera. Kha inao ngalāva̱ khani kala anina pharākhui kahaibing hili ina aja khisaura? 44Ralu, na eina I, ini tuingashit akha sāsa; kala khangashit hina iniwui ngachaili shākhi akha sāda leiranu.” 45Chieina Jacobna ngalung akha eina pākra̱ sāda shuna. 46Kala Jacobna awui theisābingli hānga, “Ngalunggui apongkhuilu,” chieina athumna ngalunggui kazipkhuida rihai akha khora; kala chiwui ngalemli phazāngaruma. 47Labanna chili Jegar-sahadutha hoi: kha Jacobna Galeed hoi. 48Labanna hānga, “Aja, rihai hina iniwui ngachaili shākhina.” Chiwui vang eina apam chili Galeed kahona, 49kala pakra̱ hili Mizpah dala hoi, kaja ana hānga, “Inina ngateida pamngaroksālala, Prohona yangmiranu.” 50“Nana inao ngalāva̱ khanili sāshida saakha, kala ani leilakha ngalā khangatei khuiakha, mi khipākha maleilala Varena na eina iwui ngachaili shākhina kaji mamalailakalu.” 51Chieina Labanna Jacobli hānga, “Na eina iwui ngachaili ngalung shunkahai kala rihai khorkahai hi theilu. 52Rihai eina pakra̱ hina shākhina, kaja ina nali makaphā sākhavai rihai kala pakra̱ hi mamakānmara, kala nanala ili makaphā sākhavai rihai eina pakra̱ hi mamakānpaimara. 53Abrahamwui Vare, Nahorwui Vare, kala aniwui avāwui Varena iniwui ngachaili bichar sāranu.” Chieina Jacobna avāva̱ Isaacna Khangachee Vare ming eina tuingashit sai. 54Kala Jacobna phungrei chili pha̱kaphayā chigatta ashi shimkhurli phazāngaruma; athumna phazāngarumda ngayā pongda phungreitung chili pama. 55Labanna ngathorthakva̱ ngakarthuida awui ara̱ngarā eina naongalāva̱ khanili maya̱khuida athumli kasola somi; kala chiwui thili pākngarokta shimli hanunghaowa.
Currently Selected:
HAOKAPHOK 31: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.