MATTHEW 4
4
Jesu'ya Malhim
(Mk 1.12-13; Lk 4.1-13)
1 #
Mk 1.12-13; Lk 4.1-13; Heb 2.18; 4.15. Heitoubi Jesu'ya ramhangra Satanya malhimyernanungei lhawaini ruilouheila. 2#Hoy 34.28; 1 Kr 19.8. Heirou Jesu'ne nunghang somlile masa somlini cha'kmai ngeibi leinarouri hillou A heiri msulkur. 3Heitounarouri Satan'ne anung wakyun, “Nangri Dunpuei Chanapawa hoiyanungri thlungrap heiya mumtol hollalo toubine shunlakma.” 4#Khn 8.3. Heirou Jesu'ne loumallangkur, “Khyingei Lailikra asitoubi mayekhoulei, ‘Tlaipang thimiri mumtol'tomni ringmak, heiya Dunpuei shunthutkur tlou heiwane ringrou!’ ” 5#Mt 27.53; Neh 11.1; Dan 9.24; Kre 21.10. Heirouri Satan heini khyingei Krungkul Jerusalem'ra ruilouheibi, Pukhrumna Cheemmei bungkhum chounara ruibangloukur, 6#Laa 91.11-12. heitoubi Anung kyun, “Nangne Dunpuei Chanapawa hoiyanungri cheem bungkhum arouwei chunsundawa; ngamri khyingei lailikra asitoubi yunlei, ‘Dunpune Aiyei Thangring rapya hilsundabine neiyei ho heiri thleira yongdawurbi deekurmaknung yaihutni neiya loukhangropirou!’ ” 7#Khn 6.16. Heirou Jesu'ne loumallangkur, “Khyingei Lailikra asitoubi hanuikhi yunlei, ‘Dunpuya ukchangh thibine malhimmak.’ ” 8Heirouri hanuikhi Satan'ne Jesu'ya lhungbungra ruibangurthubi, tlaipangpal namyerrei krungkul rapya, heirou yaiyei thang rapya muyerbi, 9heirou Anungei asitoubi kyun, “Nangne keiyei maibongra khuklu kanthrunbi khrumlanungri, heirap namyerya keine Neinungei pirou.” 10#Khn 6.13; Mk 8.33. Heitounei Jesu'ne loumallangkur, “Keirouwei chutdura, Satan! Khyingei Lailikne asitoubi yunlei, ‘Naiyei Pu Dunpu’ 'yatom nane khrumbi watlhou toulak!” 11#Mt 26.53; Lk 22.43. Heirou Satan heine Jesu'ya lakurkhoula, heirouri Thangring rapne yongbine Jesu'ya watlhou trungpikur.
Jesu'ne Galilee'ra Lhou Churkyou
(Mk 1.14-15; Lk 4.14-15)
12 #
Mk 1.14; Lk 4.14; Mt 14.3; Jn 1.43. John'ya manwurbi kulla chalphopbura tounei pao heiwaya Jesu'ne mayeknarou, heirou Ane Galilee'ra wakur. 13#Jn 2.12; Mk 1.21; Lk 4.23. Heitoubi Ane Nazareth'ra yarekmakne, Zebulun'le Naphtali'yei ram khintam karchunrilnara klei, Galilee'yei samadru ruira klei Caperna-um yultlaira wachakkur. 14Tloubom heiri Isaiah Thimkhuiyei yunthutdurkhou heiwaya chimne tlungyernanung thukkur, 15#Isa 9.1-2. asitoubine yunlei, “Zebulun heirou Naphatali'yei ramthral, heirou samadru lhangei lamruira, Jordan kungrui lhang khatra klei Gentile rapbei ram, Galilee! 16Kmehra klei thimi rapne, tangkur kwaar heiwaya mupharou. Kmehyei hina ramra paalbi klei thimi rapbei doura kwaar heini yuk'alpirou.” 17#Mk 1.15; Mt 3.2; 10.7. Kheen heirouwei waiyoubi Jesu'ne Aiyei lhangai paolaa heiwaya shunthutyoukur, “Nane naiyei borh'rouwei kallekthutlaka, ngamri Thangmunyei Krungram heiri beimakne nakkura!”
Jesu'ne Thanga pha thimi Napung-phaliya Ungkur
(Mk 1.16-20; Lk 5.1-11)
18 #
Mk 1.16-20; Lk 5.1-11; Jn 1.35-42. Jesu'ne Galilee'yei samadru ruira chayeinung, Ane thanga pha thimirap Peter toubi ung Simon'le aiyei nao Andrew yakhunta teinaone samadrura ling shinbine thanga phabi louklei Ane wamukur. 19Heirou Ane yakhunta teinaonung kyun, “Keihilla chanthunga, heitoubi Keine naya thimi mannanung marnopirou.” 20Heirouri tallengne yakhunta teinaone ling lakurkhoubi Aihilla chanthungkur. 21Heirou Ane heisi lam lhayeirouri, Zebedee'yei chanapawarap James'le John yakhunta teinaoyakhi mulhakur. Bi heirou yakhunta teinaone mali doura yai pawale kalhonne ling marshikbine louklei. Heirou Jesu'ne yakhunta teinaoyakhi ungloukhei, 22heirou yanekhi yai mali'le, yai pawaya horkhouwurbi Ale kalhonne chakur.
Jesu'ne Marnopi, Lhangai Pao-laa Shunthutpi, Heirou Kna Raiyerpi
(Lk 6.17-19)
23 #
Mk 1.39; Lk 4.15,44; Mt 9.35; Mk 3.7-8; Lk 6.17. Jesu'ne Galilee'yei ram karyoune karwaichabi, Pukhrumna Cheemra polhakbine shunmatupi, Dunpuei Krungrammei ngamrou pao lhangaiya shunthutpi, heirou kna'sa limlimne nabi klei thimi rapyakhi raiyerpi. 24Asitoubi Aiyei ngamrou Syria'yei ram karyoune mayeknarou, thimi rapne limlimyei kna rapya, heitoubi lhimpop thimiya, hyingmak lhawai tung thimiya, yuntlungmak thimirap, heitoubi mnak pangkhat khi thimirap namyerwaya heiurlhaknarou Jesu'ne yaya raiyerpikur. 25Heirou thimi chungne, Galilee'rei, Decapolis'rei, Jerusalem'rei, Judea ramreikhi heitoubi Jordan kung serallei klei ramrei thimi namyerwani Aihilla chanthungkur.
Currently Selected:
MATTHEW 4: MARIBSI
Highlight
Share
Copy
Want to have your highlights saved across all your devices? Sign up or sign in
Maring Naga Bible - KHYINGEI PU'TLOU
Copyright © 2013 by The Bible Society of India
Used by permission. All rights reserved worldwide.