PAOCHA 10

Peter'le Cornelius

1Caesarea ramra Cornelius toubi ung napawa khat leikhou, a heiri ‘Italyei Raallui’ toubi mu'kna Romiya raal thimi rapbei Raallui macha khatdei upa khat hoikhou. 2A heiri tharmu klei napawa khatkhi khoi; heirou ale aiyei bommai'yei thimi rapne Dunpuya khrumkhou. A heiri kanring Jehudiyei thimi rapyakhi beimakne trungpikhou, heirou Dunpuya karyomne shunchabi leikhou. 3Nungkhatnuiri nunghang kanchaihil pungkhyum dalumnung, ane kar'anyei kaalnung Dunpuei Thangring khatne anungei hungbi aya ‘Cornelius’ toubi ungkur heiwaya ane kandangni loumayekkur.

4Heirouri ane Thangring heiya chikanchunle kalhonne louthibi, “Kouweiyawo aya, Upawa?” toubi ane loukyun.

Thangringne loumallangkur, “Neiyei shunchakur, heirou neiyei kringpi kheiyei lhou heiraprou Dunpuri beimakne pilwurame, heirou Ane neiyei shunchakur heiwaya rulpinanungei marshikbi leiyurame. 5Heirou asinung Jopparei klei thimi, aiyei minri Simon Peter toubi ung napawa heiwaya wa'ungna'nungei thimi tha heimalhetkur. 6A heiri Samadru ruirei klei an'un thruinei lhouchur napawa Simonyei cheemra tlungbi klei thimi.” 7Heitoubi Thangring heiri shaalkur, heirou Cornelius'ne aiyei shok napung-khnile ale kalhonbi klei raallui rapbei hangrouwei tharmu klei raallui khatyale unglouheibine, 8heitoubi ane thukkur lhou rapya yanungei yunpikur, heitoubi yakhyumya Joppa'ranung heimalhetkur. 9Heirou thangei tlainirou yane chabi Joppara wa'tlungrou waiyouweinung, Peter'ne nunghangei kheenrou shunchananung cheemdoura kakakur. 10Heirouri a heiri msulwurbi, koukhat chamainikur; heirou yane chamainungei marshikbi leiyeinung ane kar'anbi loukmu. 11Heirou ane thiyeinung Thangmun laatbi, heirou phiyeng'naksi khat, chithek phalitamra churphopbine tlaipangra yuklaksunda ane loukmu. 12Heiyei rilla yaalim-waalim rapkhi, frul limkhi, heirou ukkei tulchabi klei limlimkhi kyao. 13Heirou houkhatne anungei yukshun, “Peter, kanthouwalo; heitoubi yaalim-waalim heirapya hatbine mailak!”

14Heiya Peter'ne loumallangkur, “Keiri heinakya toumakeise, Puwo! Ngamri keichaanrou heinaksi kai louyoukna hilthungne hyingmak heirou borh yaalim-waalim, frullim heiri koukhatkhi chamaimakhuime.”

15Heirouri hou heine anungei hanui yukshunthu, “Dunpune marthingme toubi yunpikur heiri koukhatkhi borhme toubi yunheimak.” 16Tlou heiri anungei khyumbuirek yukshunbi heitoubi put heiri Thangmunra hanui loubaangkur.

17Peter'ne aiyei kar'annarei loukmu heiri kouweiyawo toubi ningchabi leiyeinung, Cornelius'yei heimalhetkur thimi rapne Simonyei cheemya ngaimubi, heirou yane yuntlangmai lamshora wamayungkur. 18Heitoubi yane heiungbi, “Simon toubi ung miyullei napawa khatdei tlungna cheemri awari nimakeiko?” toubi heikngai.

19Heirou Peter'ne aiyei kar'anbi mukur heiri kouweiyawo toubi heisi ningchabi leiyeinung, Lhawaine anungei shun, “Louningpilaklo! Napawa napung khyumni bi arou neiya raphabi leileime. 20Heine nangne yongchumnanung marshiklaka, heirou nangne yaya koukhatkhi khyamakne louchanthunga, ngamri keine yaya heimalhetpime.” 21Heisi tounarouri Peter'ne yongchumbi heirou yanungei loushun, “Nai rapha thimi heiri keime. Nari kouya tourou wakurawo?”

22“Raallui upa Cornelius'ne kaya heimalhetme,” toubi yane loumallang. “Ari beimak lhangai napawa khatme, heirou tharmu kleini Dunpuya khrumbi klei napawame. Heirou ayari Jehudia rapne choune rikrai khrumkna. Dunpuei Thangring khatne anungei loushunbi, heitoubi neiya aicheemra unglhakbi heirou nangne koukouya yunpinungei kleiya ane neirouwei ningnanungei toubi kane neiya ungrou toubi wakurrame.” 23Heirouri Peter'ne yaya cheemwaira lou-unglhakbi, heirou ane yanungei buchabi masanungri aicheemra yarekyerkur.

Heitoubi thangei tlainirou ane marshikloubine yakou kalhonne wakur; heirou Joppa yultlairei uklum thimirap thakhi akou kalhonbi wakur. 24Heitoubi thangei tlainirou ane Caesarea'ra wa'tlungkur, bi heirou Corneliusni aiyei cheemkhurrei thimi raple heirou aiyei chetkna palui rapyakhi ane unglouheibi lokpane aya ngaakbine louklei. 25Heitoubi Peter'ne wachangeinung, Cornelius'ne aya lourorilbi, aiyei hopongra kanelhakbi, heitoubi aiyei maibongra loukhrumchakur. 26Heiya Peter'ne aya “Katmayungalo, keikhi tlaipang thimi khatme,” toubi yunbine aya kanthouyerkur. 27Heitoubi Peter'ne Corneliusnung tlou heisi yunmalom cheemwaira wachangeinung, bi heirou thimirap chungwane kartilbi louklei ane wamukur. 28Heirou ane yanungei washun, “Nanekhi lhangaine kmu touri Jehudiyei napawa khatne aiyei youkna tharmuei hilthungneri ane thimidei hukhatyakhi murilnung yamak, heitoubi Gentile rapyakhi pulne lam tlanungkhi yamak. Heiya Dunpune keinungei mutpikur khat klei touri, keine thimi hukhatyakhi tharmuei youkna heirouei hyingmak nimanung borh toubine khaimakrou. 29Heitounei ngamrou nanekhi keiya wa'ungnungei heiyilnarou, keinekhi ukningra koukhatkhi khalcha'kna makne wapilei. Heiyanungri keine nanungei ngaikniri, nane keiyari kouya tounanungei toubi wa'ungkurawo?”

30Heirou Corneliusni loukyun, “Angtu tlaini awane khyumni yentlungura touri, keine nunghang kanchaihil pungkhyum dalumnung cheemwaira shunchabi leiyeinung, tallengne napawa napung-khatne khngou shambya mansambine heitoubi keiyei maibongra mayungbi, 31ane keinungei loushunpi, ‘Cornelius! Dunpune neiyei shunchakur heiya mayekla, heirou neiyei kringpi kheiyei lhou rapya Ane mupila. 32Heineri nangne Joppara klei minri Simon Peter toubi ung napawa heiya wa'ungnanungei thimi heimalhetlaklo. A heiri Samadru ruirei klei an'un thruinei lhoutou napawa Simonyei cheemra tlungbi klei aiyei malkhat khoi.’ 33Heitounei tallengne neiya wa'ungna'nungei toubi thimi heimalhetkurme, heirou nangnekhi keiyei ungnara louchanthungpibi wapinarou beimak lhangaiyura. Asinungri ka nammakhi bi arou Dunpuei maibongra leibi, heirou Dunpune neinungei shunmatupikur kou leileiyo toubi kane ningthiyeise tounei ngaakbine leikurame.”

Peter'ne Tlou Kyun

34 # Khn 10.17. Peter'ne asitoubi tlou yunyoukur: “Keine asinungri ningmuwurla touri Dunpune thimi kantangya lingkhat khoine mupibi leilei. 35Ane thimi hukhatyakhi shakrungya thimaklei, heirou huhune Aya chini khrumchabi heirou tharmu kleiyei lhouya toulanungri, A heiri koukou limyei thimiya hoiyanungkhi, aya Dunpune yapirou. 36Ane Israellei thimi rapnung, namyerrei Pu Jesu Christaya yenmalhetpibi, Lhangaiyei Pao-laa shunthutpiwurnei pao heiri nanekhi mula. 37Gentile raprei waiyoubine Israellei ram karyoune, John'ne yui lupnei paolaaya shunthutpikur hillei thukkur lhoutang heikhi nane kmu. 38Nane Nazarethrei Jesuei ngamroukhi heirou koutoubi Dunpune aidoura Lhawai Khying pisundabi Aya mantrangyerkur heiyei ngamroukhi kmu. Ane bi kantangra yenkarwaichabi heirou lhangaiyei lhouya toukhoubine heitoubi Satanyei mantrang daakra klei kna thimi namyeryakhi raiyerpikur, ngamri Dunpune Aya kalhonpikhou. 39Kari Israellei ramrakhi heirou Jerusalem'rakhi Aiyei touwurkhou lhou namyerwaei ngamrou tlou mayungpi thimirap khoine klei. Heitoubi yane Aya heengkarbakra thirmsuini hemphopburbi hatkur. 40Heiya Dunpune khyumnirou Aya khirouwei ringthutyerbi heirou thimi rapnung muyerkur. 41Thimi kantangnungri muyermak, heiya tlou mayungpi thimi rapnungeitom touri lamkrine Dunpuei khalthutpikur thimirap, yarap heiri Ane khirouwei ringthutkur hillou Ale pulne chamai'malnakur thimirap kanungeitom mu'kyer. 42Heitoubi Ane kayari thimi rapnungei paolaa shunthutpinanung heirou A heiri khring rapnungkhi heirou khi rapnungkhi Dunpuei khalthutpikur pichar Pu khatme toubi yunthutpinanungei chay piwurkhoula. 43Thimkhuirap nammanekhi Aingamrou atoubi yunthutkhou touri, Aya uklum thimirap nammane Aiyei min heine yai borhya kukpi pharou.”

Gentile Rapne Lhawai Khying Phakur

44Heirou Peter'ne heisi yunbi leiyeinung, aiyei lhangai paolaa heiya loukning thimirap namyerwayei doura Lhawai Khying yongchumpikur. 45Joppa'rouwei Peter'le wamalnakur Jehudi uklum thimi namyerwari kngakne thimkur touri, Dunpune Aiyei Lhawai Khyingei hutthul heiri Gentile rapbei dourakhi shungsundapiwurla. 46Kouweiyo toulanungri yane limlimei tlou rapne yunrilbi heirou Dunpuei thang'alya mathangbi klei heiya yanekhi mayekkur. Heirou Peter'ne kanthoubi kyun: 47“Thimirap heinekhi kai phakurnakne Lhawai Khying phayerwurla. Heiyanungri hukounakne yaya yui lupnarei toudongkur manerouko?” 48#Pao 11.4-17. Heisitoubi ane yaya Jesu Christaei minra yui lupnanungei chay pikur. Heirouri yane aya yakou kalhonbi tlaini bei leikhounanungei buchakur.

Currently Selected:

PAOCHA 10: MARIBSI

Highlight

Copy