MOTHIQ 2

Shedong Mungti Kito

1Jesuq ka Judia wang na Bethlehem chela na chiito. Kra akhing na hokham jati ka Herod riito. Kra jai maq jaqlo sijai niili Jerusalem maq shedong mung na siti, ra na raiqsaiq jipi khumshiim shri ra liiwanti taksu maiqsebi ka Jerusalem na kito. 2Raüta akha waito, “Jehudinok hokhamwe ma jati no dotaq kra ümchaü ümbano? Naishiq raq apaiq raiqsaiqpo ka shedong mung nü na atiiji arki chhi kai. Kra chhi laita naishiq ka apaiq shomnoq kai ana kikai.”

3Hokhamwe Herod raq kra tsütsa ka tai raüta apaiq ka pinthum chapato. Kiimaq apaiq rai Jerusalem na siti maiq tarü chapato. 4Kiimaq apaiq raq ramwe jongbi nai Thungtri shrinketibi shrabi thun ka adam na triitam hea raüta tiingato. Raüta tsangshiq ma akha waito, “Riita Khristo ka ümriiba niiwa michii?”

5Kiijiishe, tsangshiq raq, “Judia wang na Bethlehem chela na michii,” nguta treto. “Jamkhano ngukla, shammibi raq akha waiqthüto:

6‘Judia wang wa Bethlehem chela lei,

ümniika Judia wang na chela phong na akhek ashi;

ümchela wa munglangti wela ashi michii,

Apaiq raq i sengi Israil mung ka mirüm wan.’ ”

7Krai mren she, Herod raq shedong mung wa aki wanwetiim ka ahukse maq hea raüta, tsangshiq raq no raiqsaiqpo chhitaq rahiq akhing ka riikhaqli tiitsang rii waito. 8Kra tiitsang wai lot raütiishe, apaiq raq tsangshiq ma, “Ahea namshiq ka kironglaq. Lanta no ka samhea ritho ronglaq. Kiimaq namshiq raq no ka hum jai, ana ngi miiri tiitai rongliijo. Ngi riimin apaiq ka shomnoq kai ma,” nguta nguto.

9-10Krai mren tsangshiq ka kihoto. Kiimaq akai lam maq tsangshiq raq shedong mung maq chhitaq raiqsaiqpo kra hali chhi nongto. Kra chhi raüta tsangshiq ka kai khoqriiq siqto! Tsangshiq chochisi wa ka jako michong! Achong lot mai chochito! Raiqsaiq po ka tsangshiq ma sinkhu na lamsheaho kihoruq maq kihoto. Raüta no sichang ba na khing kito. 11Tsangshiq ka kiijaq saü raüta jam mong na wato. Kiimaq no ka anyung Meriq rai chhito. Raüta tsangshiq ka lakü maq nga raüta apaiq ka shomnoq wanto. Kiimaq tsangshiq raq ahoho kongphiq chaq, pechong mong wa alam homseng tsai, kiimaq penaihomseng thop kra tsangshiq thongkhiiq mong wa lam raüta, no jichong niishe kai shreng raüta tokuq wanto.

12Shiikeawe raq tsangshiq ma rawa ma maq Herod rai riihum wan nong raa mak she nguta honlam bom she chongkuqto. Krai mren, tsangshiq ka lamhin lam miishe tsangmung nü na jang wan nongto.

Ejip Mung Na Tiipaü Kito

13Shedong mungti wanwetiim ka wawan jai she, Tatiwe rase raq Joseph ma rawa ma maq chongkuq kito, “Herod raq noshii ka atsea ma nguta mitrit. Kriikha maq, ümchaü min tiidolaq. Laüta noshii nai nyung ka shea laüta Ejip mung na tiipaü kikiq. Kiimaq ngi raq ümniima bom michong kuqha shaq wiiwii Ejip mung niili silaq.”

14Krai mren, Joseph ka akon maq samkisaq raütli she, noshii nai nyung ka shea raüta, kra rawa li Ejip mung na tiipaü kai juhoto. 15Herod mitsai shaq wiiwii apaiq ka kiijiili sito. Arka Tatiwe raq ashammi we nübok maq riisham bomkham tiichongtaq kra tiikupi wan miitu hongtha wanto. Shammi we raq, “Ngi raq i Se ka Ejip mung wa hea wan kang,” nguta tiithai chongthüto.

Nosere Jiipbaiqto

16Herod raq shedong mung wa aki wanwetiim raq apaiq ka laoratto ngutiishe sapraüta, apaiq ka kai khiqto. Kiimaq apaiq raq Bethlehem chela na siti nai kra tro binjü na siti maiqwe sere, arawii wiinai nai wiinai takiq na ümchuwa siwan tlaq kra tsea baiq miitu aming kuqto. Apaiq raq ara aming kuqtaq arka wanwetiim raq raiqsaiqpo chhitaq akhing rahiq jipi kra shiiton raüta aming kuqto.

17Arka shammi Jeremia raq riisham bom achongthü kra phan- phan she kuwanto. Shammi raq akha chongto:

18“Rama Chela na maiq achhang ahang trang tlo,

maaho maanyi maiqho trang tlo.

Rechel ka asetiim maaho hoqsii tlo;

maiq raq tiijaiq raü min jaiq mak,

asetiim wiita jiimto.”

Ejip Mung Wa Jang Wato

19Herod tsaijai she, Tatiwe rase raq Joseph ma rawa ma maq Ejip mung na kiraüta akha chongkuq kito, 20“Tiidolaq, laüta, nonai sinyung ka Israil mung niishe shea wan nong laq. No tsea baiq tantibi maiq thun ka ümchaü atsai kaiwi she.” 21Krai mren, Joseph ka akon wa sam wantlii raüta, noshii nai nyung ka shea wan raüta, Israil mung niishe jang wan nongto.

22Shatmaq, Joseph raq Arkelas ka awe Herod changkhü na Judia wang thaq na hokham jatlo nguta tsütsa ka taito. Kra tai raüta apaiq ka Judia wang siwa nong miika ahai riito. Kiimaq Shiikeawe raq apaiq ma rawa ma maq tsii ka samheawiq hali chongkuq nongto. Krai mren, nono nai nyung ka shea wan raüta apaiq ka Gelili wang na wawanto. 23Raüta Najareth chela na siwato. Krai mren shammibi raq achongthü riisham bom ka riikhaqli she kuwanto. Tsangshiq raq, “Apaiq ka Najareth hiqti we nguta mingu,” nguta chongthüto.

Currently Selected:

MOTHIQ 2: TANGSBSI

Highlight

Copy