ROMIYA 16
16
Pol Riemtuk Na
1Kenkhriah abom ah tullu lu ah am ani sarnu Phaebi ta keina nangei amna hla inge. 2Arengpu Chungthieng minga amota ariemma lah pi oh mee ngeina na ae phung shuk ha ae pi oh, hana amota nangei san nea ha sanpi oh amona nangeita darkar am ja-ae. Amohi mee eja kolla akha chu kakolla kom arha mee sa ae.
3Khrista Jisu tullu ae ha katonpi Aquila akha chu priscilla ta kom ka riemtuk hla inge; 4Mani na kataranga athi atri amno ae. Kathei chak na manuita ariem ma dom ah no ae, hana Gental Abom ah meelim na kom domme. 5Hana Abom mee ngei kom mani inn na bomtul ha lim ta kom riemtuk pe inge.
Kalungshit katonpi Epaentus Asia ram sunga masha ah Khrista ta ngoiring Spa takom riemtuk pe inge. 6Mary takom riemtuk pe inge, amona nangei taranga ratta tullu lu sa-ae. 7Andronicus akha chu Junias rel ta kom riemtuk pe inge, manuiha kei hitta areu inn sunga am ha katonpi ae, Rouron ngei; kar sungako mee ngeina rha bakta amel dang mee sa ae. Manui ha kama tinga khristen changsowe.
8Ka riemtuk hi arengpu minga kalungshit tonpi Amphliatus ta kom pe inge. 9Hana Khrista minga tullu lu ha am Urbanes akha chu Stachys takom riemtuk pe inge, 10Riemtuk hi Khrista taranga alung lok Apelles takom,hana Aristobulos ngei ulea nao ngei takom. 11Riemtuk hi Jehudi Herodian akha chu Narcissus Khristen uleanao mani inn sung ngeitakom pe inge.
12Ka riemtuk hi Tryphaena akha chu Tryphosa Arengpu tullu ron na am akha chu kalungshit katonpi Persis amona arengpu taranga tullu leima tan pi ae. 13Arengpu tullu ma hella ahra tullu lu Rufus kolla keina ariem na hla inge, hana manu ta kom. Manuna keita apha chang honna keita masanao hekta an pi ae. 14Hana ka riemtuk hi Asyncreitus, Phlegon, Hermes Patrobas, Herma akha chu mani hitta am Khristen ulea nao lim ta kom pe ing. 15Ariem hi Philologus Julia ta hana Nereua akha chu masarnu, Olympas akha chu mani hita am ha Chungthieng mee limpa ta.
16Uleanao ngei hekta akha lea akha lungshi hlakka be chup hlakko. Khristen ahalsha lim na ariem ma nagei ta riemtuk pe ah hla ae.
Atreem Na Ah Chupi Takpi Na
17Ulea nao ngei kolla keina mokka aminge.Adong ratto nangeita ahran akha chu hoino shuk kang lim chunga. Nangei ta chupi takpi nujuija nangei ngoiring hana hata thingo, mani hai thou wa adanga am mo! 18Hajong tullu lu manita chu ani arengpu Khrista tullu lu no ngei ae.Mani ha chu mani taranga hal ngei sha ae. Mani tronglam ahoi akha chu alei lomma rou ril hana maral amno malmashi eja ta hung thei ae. 19Ahra tronglam taranga nangei alok tullu ha mee lim na thei pha ae. Hina sarukka nangei jarra kei leima ariem minge chuna keina nangei hi lungsinga ejongpa na ahra moti dangpi num minge, chuti weta hrano chu tong pi num nonge. 20Hana ani adai shuk na Chungthieng na apha sot no lutta saitan amota nangei kea hana to pi shi pi ange.
Ani arengpu Jisu hina lungshit na nangei hitta am ha shu oh.
21Kei hitta tullu lu ha Timothi na kom hana tonpi Jehudi sanao ngei Lucius,Jasan akha chu Sosipater manina kom riemtuk pe ah hla ae.
22Na trongleng jiekka hla Tertius keina Khristen ngei ariem riemtuk nangeita pe ah hla inge.
23Ahalsha mee ngei na bomtul na amunt inn mitpu Gaius na kom Eraster hupi hina sum rungpa akha chu ani ton pi Quartus mani makhai na kom ariem riemtuk pe ah hla ae. 24[Arengpu Jisu Khrista lungshit na hi nangei lim chunga am shu oh. Amen.]
Atreem Na Ah Domma Niek
25Chungthieng tarang chang shu oh ariem hi! amona nangei ngoiring hata lingno lutta am pi nea ae.Nangei kolla ahra tronglam ka rou ril anu juja akum sot matienga thuppa shi ripisha adiek hana nujuija. 26Chuna atun chu adiekka thiempu ngeina jiekka shi jarra choija shuk so ae. Atreem neino Chungthieng hana tronglam pek na chu jati lim na dang lea chu manina ariljuija ngoiring pha shu oh tina sha ae.
27Chungthieng amo chakkea eheilim dangne, Jisu Khrista heithou wa mahung majai chang shu oh atreem nei no wa! Amen.
Currently Selected:
ROMIYA 16: CHOTBSI
Highlight
Copy
Compare
Share
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
