RUIHNGEI TULLU 13
13
Barnabas Lea Saul Hi Halla Hla Na
1Antioch abom ah Thiempu ngei lea ocha ahre Barnabas, Simon (akokna chu ahang) Lucius (Cyrene haithou) Manaen (Herod hitta hang ha Govarnor ae.) akha chu Saul. 2Mani na bu hai weta areng pu tullu mani ae lei ah Muihla athieng na mani ta ril, “Barnabas lea Saul ha nangei am na thou hla oh, manui tullu lu rang keina manui ta kokka aminge.” 3Mani na bu haiweta nie na amunt hai thou wa manuita hla so ae.
Cyprus Ah
4Muihla athieng na hla nujuija Barnabas lea Saul na Selucia ah thing so. Akha chu hana hai thou wa Cyprus tuijai ramkang phao tungso. 5Manui na Salamis ram tungjui ja manui na Synagoge shunga Chungthieng rouril ae. Manui na Johon Mak kom rui ae manui tullu ma san rang nga.
6Manina Paphos tuijai ramkang nga thingha ah Jihudi Bar-Jisu ta mitrang lak mee akha tukhlakkae amo chu keikom thiempu inge ta ril mee ae. 7Amo ha chu tuijai ramkang (tuijai mullon). Governor hina atonpi ae. Segius Paulus spa hi athei asing mee ae hana Governor na Barnabas lea Saul ta kom am na ah kokkae rouram chu amona Chungthieng rou ngeinum jarra 8Chutiweta meetrang lak Elymas (Grik minge.) na ngeipi num no ae rouram chu Governor hana ngoiring ha nulea ranga. 9Pol ae ta kom dang hlak Saul kom muihla athieng na shihakta mitrang lak mee kolla mun na an weta. 10Akha chu rouril, “Hrano sanao nang hi! Nanghi chu ahra eja lim hina anda mee ae, nang hi chu hrano eheilim hina shi hakti che ae, hana nang na arengpu adiek hana hai thou wa nulea rang hot na mee ae! 11Chuna Arengpa kutna atun hi, na am na tum ma jung ang nge; Apha atan te shung nga nang na nisoun awar hi namit cho ah ri ang no che ae.”
Hana makka Elymas mit ta athiem na wurra jung nga amo na atujong akha na amo ta akut oh pi weta lamkai rang jong thou so. 12Governor na shukka am hi mari juija amo na ngoiring so; rouram chu arengpu hina rouram ma chupi takpi hina amona kom ehakta angak shukkae.
Antiok Akhachu Pisidiya
13Pol akha chu atonpi ngei na Pamphyliah hupi ah Paphos hai thou Perga ah tui chunga phao ae. Hana Johon Mak ta houphur ra Jerushalem ma lea so. 14Mani na Perga haithou hata thing nga Antioch Pisidiya ah Sabbath ni ah tung nga Synagoge sungnga luttolla ong nga am meh. 15Moses hina pek roukung akha chu rouphu pa ngei na jieksha pat shu takka synagoge shung nga offisar na manita rouril hla ae, “Uleanao ngei oh, mee ngei taranga thanum thathou pi rang ejong rou am lea chu kani na nangai rouril di ung nge.” 16Hana Pol na ngirthou wa akut dom ma, rou ril thou so.
“Israel akha chu jat adang lungshit tonpi ngei Chungthieng ta hina mokka am ngei oh karou hi thei pi oh! 17Israel ngei Chungthieng na ani pi pu ngei ta alok jaty akha sem phur ae Egypt pa hulang mee hekta mani na am lei ah. Chungthieng mane jaitha na Egypt hai thou wa rui ah shukka. 18Akha chu akum somly hi ramrukka amo na aol ana dongpi ae. 19Amo na Kanan ram ma jaty sari ta mang pi weta mamee ngei ta ram hana mitpu changpi ae. 20Na lim hi akum rihaly lea som nga lutte:
Hina waitakka chu Samuel rouphu pa pha malim chu mani ha routreem mitpu ta houphur ae. 21Chuna manina rengpa taranga Chungthieng kolla niekjuija Chungthieng na Benjamin sakai sunga Kish sanaopa Saul ta akum somly rengpa tarang nga pe pi ae. 22Hina amota hou shu takka Chungthieng na mani taranga David ta reng changpi ae, Marou ah Chungthieng ril chu hi ae: Jesse sanaopa David ta keina rengpa tarang nga kadit sha ae spa hina keina kadit tullu ha amo na ae ang nge. 23Jisu hi David atu ate hai thou jung nge makolla ae Chungthieng na masaro ei nu juija Israel ngei ta sanpi pa changpi ae. 24Jisu na matullu thou ma ah, Johon na Israel mee ngei kolla nangei pak hai thou wa lea oh, hana baptias ae oh, ta mee ngei kolla rouril. 25Johon na matullu shu ang nai ah wakjuija mee ngei kolla amo na sai, nangei na kei ta atu ae ta halla am chau? Kei hi nangei na hakka am mee ha nong nge. Amo ha chu kanutieng nga phao ange, kei chu machung honghup phao lippi ah matik cha nong nge.
26Kalungshit Abraham tu te Israel ngei oh, akha chu Chungthieng ta hina mokka am jat adang ngei oh. Samla ringchang hi ani tarang nga ae ta rou hina ril sha so ae. 27Jerushalem ma mee ngei lea lamkai ngei na chu amo hi sanpipa ae ta mani na dang pha no ae hana rouphu pa ngeina Sabbath rungnie chang honna pat ha adiek takka wakjuija kom mani na neinunt non na hla ae. 28Hana mani na amo ta athit phao wa maral eja jong hal kom tukno wa Pilate kolla manina amo hi athat rang nga ril ae. 29Jieksha rou na matarang nga eheilim pa ril shu takka khross chung nga thou lah ah tum ma hlan shung nga phom meh. 30Chutiweta Chungthieng na chu rungnie nathum sunie ah athi hai thou ring pi ae. 31Hana amo na Galily hai thou Jerushalem phao ah amo hitta thing ha ngei mai ah mel muh ah rungnie atam pa na am phur ae. Atun hi mani na mataranga saro ei nea ang nga Israel ngei mai ah. 32-33Chuna nangei tarang nga atun hi kani na ahra trongsan ronna phao unge ani pithou puthou ngei ta saro ei ah ma ae pi tullu ha atun kom ani tarang nga ae pi am meh. Jisu ringthou ringchang hina tu te mani tarang ani sunapa laabok ka jieksha hekta, ‘Nangei hi kasanao ae; awoni hai thou wa kei hi nangei pa sing.’ 34Hi so ae Chungthieng ril athi hai thou ring pi ang nge hlan hur sung nga shotta am pi ang nong nge:
‘Kei na athup akha chu linglou jaihra pe ang
nge David kolla kasaro ei sha so ae.’
35Adang amunt na kom amo na rillea,
‘Hlan hur shunga nang
na nasuuk athieng amota am pi ang no che.’
36David na chu Chungthieng hina ahal hata hrabakta jui ae apha hana jui ja, mathit juija amo kom mapi mapu ngei hlan hur shunga apum ha tui ae. 37Chutiweta Chungthieng na athi hai thou ringthou pi amo ta chu na hi shukpi no ae. 38-39Kalungshit Israel ngei oh nangei ta kani dit chu, Jisu khrista majar ah pak lim sanpi na rou hi nangei kolla rilla am mung nge; chuna atu jong nu atu jongpa na amota ngoiring lea chu Moses roukung hana pak san nea no kom nangei pak hai thou san pi ang nge. 40Chuna hrabakta am mo, chu lea chu rouphu pa ngei na ril rou ha nangai kolla shukno shu oh.
41‘Anno, trongshi ril ngei oh,! Ngakka mang ang chao ae!
Rouram chu kei na ejongpa tullu akha nangei tarang
ae ang nge chuti weta nangei na ephao ngoiring
ang no ae atujong akha na nangei kolla ril halkom!’ ”
42Pol lea Barnabas na Synagoge houphura thingpa chu hana am malmashi ngei na mathang pa sabbath rungnie ah kom phou weta hina rouram hella manita rillang kok sier ae. 43Mani bomtul shu waitakka Jihudya am Jihudi akha chu jat adang leimatam ngei na Pol Lea Barnabas nutieng nga juija, ahal sha rou ron rel na manita thanum thathou pi ah Chungthieng lungshit jarra ring rang rou rillea. 44Mathangpa sabbath rungnie ah hulok hana am meelim pa na arengpu rou ril ngei ang nga phao ae. 45Wairul riha mel hi Jihudi ngei na rijuija mani lungshung hi anar na shihakta Pol na ejong rou rilla am ma meh ta amota ajak pe ah trong jet hlakso. 46Chutiweta Pol lea Barnabas na hella tieng ratta rou ril, “Chungthieng marou hi masha ah nangei kolla ril hi apeksha ae chuti weta nangei na la num no wa akha chu nangei na samla ringchang ta halnum no sou chu, kani na nangeita hou phurra jat adang ngei kolla thing ang nge. 47Arengpu na kanita trongsan pek chu hi ae:
‘Kei na jat adang ngei tarang nga nanghi
awar war pi singe chuna jarra simlei
ram lim na sanpi pha shu oh.’ ”
48Jat adang ngei na rou hi mathei juija, mani na ariem ma areng pu rouril lim hana tarang nga dommeh. Akha chu samla ringchang tarang nga ahalsha ngei na ngoiring so.
49Arengpu marou hi hatieng nak ram lim ma thangso. 50Chuna hana am Chungthieng ta ajak ati am nameinu ngei akha chu hupi ha lamkai ah am spa ngei ta Jihudi ngei na trong jet hlakka thou so. Mani na Pol lea Barnabas am na kolla aol ana pe ah mani ram hai thou julla hla so. 51Chuna pa chu ahalsha rui na mani kaebur ah wakphul tha houphurra Ikonium ma thing so. 52Antiokka am ngoiring ngei na muihla athieng na shi hakta ariem meh.
Currently Selected:
RUIHNGEI TULLU 13: CHOTBSI
Highlight
Copy
Compare
Share
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
