RUIHNGEI TULLU 10
10
Pitar Lea Kornelius
1Roman ralmee ah luching Kornelius ti spa akha kasariah am Italian ral mee akha am meh. 2Amo hi dramochel spa ae; Amo akha chu ma inn shung lim na Chungthieng ta mokka am meh. Amo na sara Jihudi sanao ngei ta sanpi ah apha changhon na Chungthieng kolla nie ah am meh. 3Nahanie niesoun apha na inthum takjuija nahi amo na ripha ae. Naha-na thienga mari chu Chungthieng wanrui na tum ma jung weh ta makolla “Kornolias!” ta kokka ril.
4Amona wanrui ha ta atri hitta munt ha ah ril, “Alo wa meh, ocha?” Hana wanrui hana sang, “Lungshi thei natullu akha chu naniek ha Chungthieng na lungshi pi sho ae, chuna amo na sang ang nga ae am sho ae. 5Chuna Joppa ram ma Simon Pitar am na ah spa ahre hla oh. 6Tuipi hou wa ring nga am shavut tu Simon inn na amo ha chu tung nga am meh.” 7Hana takka chu wanrui ha shukka thing so ae chuna Kornolias na dramo ehekta am ma am na ah apha chang honna mashi ralmee spa ani ta koke. 8Amo na shukka am ha manui kolla ril weta Joppa ram tieng nga hla so ae.
9Hana mathang pa rungnie hana mani lam ha Joppa ram nei ah wakka, Nisoun pha ah wa ah Pitar chu inn chung tieng nga nie rang kal sho. 10Bu ann semma am lei ah awon tam ma ejongpa ahre te baknum ma, ma am lei ah amo na ripha so. 11Amona thangwan inn har honga akha chu aleiram tunga ehekta atam maru hi tumma jung ripha sho. 12Hana shunga asha anga lim, awon na lonna thing asha akha chu ram wa kom tol ae. 13Sanrol akha na ril, makolla, “Pitar thou wa thing weta that ta bakko!” 14Chutiweta Pitar na ril, “Arengpu bak nea ang nonge! Rouram chu kei na hijongpa thiengno amut lim hi bak no songe.”
15Woiha sanrol akhana ril, “Chungthieng na thieng hap pi sha lim ha thiengno ae ta hal no oh.” 16Nahi woithum shukpi weta na lim pa ha thangwan tienga choi ja kal sier so.
17Pitar na maripha hana taranga artha dang nea no wa angak shukka am lei sunga, Kornolias hla spa ani na Simon inn hina am so ae ta dang pha ah akha chu manui na inn lam ha hana mai ah ngir ra am meh. 18Manui na mani ta kok ka shukka sai, “Na hi na sunga Simon Pitar ti spa akha inn tung mee am ma meh?”
19Hana lei sunga Pitar chu maripha hana tarang sharukka alo ta ril na mo nu ta halla shuk rang halla am meh, muihla na makolla ril, “Anno! Spa inthum na nangta hakka am meh. 20Chuna nang na tum ma jung weta mani hitta thing ha rang ae oh hana ngei num no ae no oh, rouram chu mani ha kahla sha ae.” 21Chuna pa chu Pitar na tum ma jung weta spa ngei hata ril, “Nangei jong mee ha kei ing nge, Ejongpa tullu sharukka hina phao ah chau?”
22Mani na sange, “Ralchang Kornolias na kani ta hla ae” spa hi ehekta ahra mee ae hana amo hi Chungthieng ta mokka am mee ae akha chu Jihudi mee ngei na kom ajak ati mee ae. Chungthieng wanrui ngei na nangei ta ma inn na kok ko hana nangei na amo ta ejong rou rillang mo theipha ange. 23Chuna Pitar na mani hata nani jantieng ha chu ma inn na am ha so. Joppa ram ma ngoiring ngei ahre lea manina hu warra chu sem sha weta thing so. 24Hana waitak rungnie ah Kornolias ma-u-manao akha chu makok atonpi ngei am na Kaisariya ram am tung so. 25Pitar na inna na luttang tienga Kornolias na tuk shu ka makae mun nai ah amo ta mokkae. 26Chuna Pitar na amo ta ngir thou pi ah, ril; “Kei hi kom meechamp singe” “ngir thou oh.” 27Pitar na inn sunga malut lam ma hata Kornolias kolla trong thou pi ah amona mee tamma rachun na am tukhlak so. 28Amo na mani ta ril, “Nangei na dang ang chau ae hrabakta, ha chu Jihudi ngeina jat adang ngei dramo hitta akha chu lut hlak bakhlak no hi. Chutiweta Chungthieng na keita dangpi ae atu akha kolla athieng thiengno halla am nonge. 29Chuna sha rukka kei ta nangei kok rang nga hla juija ngei num no am no lutta phao singe ejong akha te chu sai num minge ejeranga keita kokphao pi ah chau?
30Kornolias na sang. “Rungnie nathum ma tienga ka inn na apha na ennthum tak jui nieshung na pratha ka ae lei ah, “Edang dang no wa langphoty pun seng nga am spa akha ka amatieng ngirra. 31Ril, Kornolias! Chungthieng na naprathana niek ha thei pha so ae akha chu sara ring ngei ta nasan ha kom dang pha so ae. 32Joppa ram shunga am aming na Simon Pitar am na ah atujong akha ta kok pi thing ngo. Amo ha chu tuipi tuihou wa am shavut phot Simon inn na tunga am mange. 33Chuna taranga nang ta kokpi thing singe hana naphao pi hi leima hra so ae Arengpu na nakolla ejong rou rillo ti mo ha atun kani lim pa Chungthieng maikunga rachun na hakka am mung nge.
Pitar Rouril Na
34Pitar na rouril thou so. “Atun chu keina hrabakta halla shuk sange ha chu Chungthieng na meelim ta akha chakka anna am meh. 35Atu tieng jaty halkom atu adang jati hal amo ta hrabakta mok mee akha chu ma ngei rang nga ae meh eta chu amo na akha chakka hallea. 36Nangei na dangpha ang chau ae Israel ngei ta marouril mahla meelim chunga Arengpu Jisu khrista hina ahra trongsan hina adai rouram lim. 37Judiah ram ma shukka am rou lim nangei na dang ang chao ae Johon na baptias ae shu takka rouril Galily haithou weta. 38Nazareth ah Jisu ta Chungthieng na akha chu muihla athieng hina jaitha tolla amo na rol weta dejabol thuija am eja ta ahra tullu lu ah dampi ae rouram chu Chungthieng na amo hitta am ha jarra. 39Jerushalem ma akha chu Israel ramma ma tullu lu eheilim ha kanina saro pe ung nge. Hana mani na khross chunga jotpi hamma that ae. 40Chutiweta Chungthieng na rungnie nathum shu nie ah ringpi ae hana waitakka amel muh pi ae. 41Chutiweta meelim ta no ae, Chungthieng na ahalsa athi hai thou wa maring thouwa bakha eenha ani ha ta ae. 42Chuna amona ani ta routhar rou hi malmashi ngeita ril ranga trongsan pe ae hana amo hi ae Chungthieng na athi akha chu aring ngei ta routreem ae rang ahalsha so ae. 43Rouphupa lim na marou hana taranga rouril shu so ae. Ha chu atujong meelim na amota ngoiring lea chu mapak ha sanpi so weh maming hana jarra.
Jat Adangei Na Muihla Athieng Pha Na
44Pitar na rourilla am lei ah marou ril ngei ah am meelim chang honna muihla athieng na tumma jung so. 45Joppa ramma thou Pitar hitta phao ha Jihudi ngoiring ngei na Chungthieng na muihla athieng hi jat adang ngei kolla kom pe sho ae ta angak shukka am. 46Rouram chu mani na hulang mee na trongha dangpha nea ae Chungthieng malok mashai Pitar na dom ma tarang nga am ha. 47Na mee ngei na muihla athieng hi pha so ae ani pha chu hekta. Atu jong akha na tui sung nga mani baptias ae hi thing nga shi nea ang meh? 48Chuna amo na Khrista Jisu ming nga manita baptias ae pi rang nga rou peso. Hana mani na rungnie ahre te mani hitta am ha rang sai ae.
Currently Selected:
RUIHNGEI TULLU 10: CHOTBSI
Highlight
Copy
Compare
Share
Want to have your highlights saved across all your devices? Sign up or sign in
Chothe Naga NT - ATHARKUTHROU
Copyright © The Bible Society of India, 2014.
Used by permission. All rights reserved worldwide.
