MATHAI 9

Yakung yak man yano Jisu ham rwmani

(Mar 2.1-12; Luk 5.17-26)

1Jisu rungo kasaui twibom láiwi bini tauno kiphilwi phai kha. 2Borok khoroknwi khoroktham uaingo khe yakung yak man ya khoroksano balwi bini thani tubu-ui phai kha. Bórok aswk poito khlaimano nugwi Jisu a yakung yak man yano “Ta uana di, chwlasa. Nini sumsok nakarjak kha,” hwnwi sa kha.

3Hakhe Kerong phrwngnairok baksa khá bising bising hai hwnwi uansuk lai kha, “O borok ba Kaitorno se hamya sa bla!”

4Bórok uansukma kókno Jisu saui manẃi hai hwnwi sa kha, “Tamo wngwi norok omo hai kók hamya uansuk lai? 5‘Nini sumsok nakarjak kha,’ hwnwi sana da lai kuk, eba khe ‘Bachaui him gra di,’ hwnwi sana da lai kuk; bubo lai kuk? 6Hakhe o swngcharo Borokni Sajla sumsok nakarwi mano abono ang norokno phunuk anw.” Hakhe Jisu a yakung yak man yano “Bacha di, nini uaing khochaui nogo tháng di!” hwnwi sa kha. 7A borok bachaui nogo tháng kha. 8Abono nugwi bororok kirijak bai kha Kaitor bororokno omo tẃi phan rwma bai bórok Kaitorno lob lai kha.

Jisu Mathaino ringmani

(Mar 2.13-17; Luk 5.27-32)

9Jisu aroni kutulwi tháng kha, hakhe him te him te Mathai hwnwi teks romnai khoroksano bini tangnogo achugwi tongma nugwi kha. “Ani logi phai di,” hwnwi Jisu bono sa kha.

Hakhe Mathai bachaui bini logi tháng kha. 10Mathaini nogo Jisu mai cháui tong phuru teks romnairok bai basijak borok kwbángma bo bai tei bini sagrirok bai baksa chá thani achuk phai kha. 11Khoroknwi khoroktham Pharisairok abono nugwi bini sagrirokno hai hwnwi sẃng kha, “Norokni hodakra tamo wngwi teks romnairok bai tei basijakrok bai chá lai nung lai khlai sla?”#Luk 15.1-2.

12Jisu bórokni kók khnaui hai hwnwi sa kha, “Kahamni daktor nang ya, hamyani se nango. 13‘Ang pun tok nai ya, khairokma se nai-o,’ hwnwi elembakni o kók tamo hwnwi sa kha thángwi nai di. Bórom gwnangrokno ang ringna phai ya, tamo khe basijakrokno se bwkha kiphil thung hwnwi ang ringna phai-o.”#Hos 6.6; Mat 12.7.

Ubasni kók sẃngmani

(Mar 2.18-22; Luk 5.33-39)

14Aphuru baptisma rwnai Johonni sagrirok phaiwi Jisuno hai hwnwi sẃng kha, “Chwng bai Pharisairok ba tamo wngwi ubas tong tong lai sla? Nini sagrirok le kisa phano tong ya sla?”

15Jisu hai hwnwi sa kha “Káijaknaisa logi tong twtwi kái lai panda-o phainairok mogwi tong anw hwnwi da norok khá ka? I’nhi, ahai ya! Tamo khe omo tẃi sal phai anw, káijaknaisa bórok bai swkagwi tlangjak anw, aphuru khe bórok chá yaui ma tong anw.

16“Rí kwchamo khoroksa phano rí kwtal thap ya; omo tẃi khe thabmani abo rí kwchamno teibo kichik rwui bwlam uar rwnai. 17Eba khe khoroksa phano angur bwtwi kwtalno twk mosonjago ton ya; ton khe a twk rechek rachak wngnai, hakhe bwtwibo kwsarnai, twkbo báinai. Tamo khe angur bwtwi kwtalno twk kwtalo’-no tono, hakhe kwnwi nwi’-no kaham tong anw.”

Hodani bwsajwk bai Jisuni dulai tangnaijwk

(Mar 5.21-43; Luk 8.40-56)

18Jisu o kókno bórokno saui tong phuru hoda khoroksa phaiwi yáskú sungwi hai hwnwi sa kha, “Angsajwk tabuk’-no thwi dorop. Phai di, nwng bini sago yak bera kheno bo thangchanai.” 19Hakhe Jisu bachaui bini logi tháng kha bini sagrirokbo bo bai baksa tháng kha.

20Bwrwima khoroksa nokha bisi chiknwi wng kha rí súma thak ya, bo uklok tẃi phaiwi Jisuni dulai buchuk tangwi rw phai kha. 21“Ang bini dulai buchuk tang kheno hamnai,” hwnwi bo khá bising bising uansuk kha.

22Jisu uphilwi bono naisigwi hai hwnwi sa kha, “Bwrwima, ta uana di. Nini poito nono ham rw kha.” Aphuru’-no a bwrwima ham kha.

23Hakhe Jisu a hodani nogo tháng kha. Kwthwini tamnairokno tei bebak borokno kutuk laijak nugwi. 24Bo hai hwnwi sa kha, “Jotono ongkhorwi tháng bai di! O chwrai thwi ya; bo thu-ui se tongo!”

Bui bebak’-no bono mwnwi bai kha. 25A bororokno tikhlai rw bai kheno a chwrai tongma nogo Jisu habwi bini yak romwi kha, hai kheno a chwrai bacha kha. 26O kók a ha gwnangwi pírjak kha.

Mokol phula khoroknwino Jisu nuk rwmani

27Jisu aroni kutulwi tháng kha, hakhe himwi tong phuru mokol phula khoroknwi bono rwkthar lai kha. “O Daudni Sajla, chwngno khairok jaba di!” hwnwi bórok chirik lai kha.

28Jisu nogo tháng kheno a mokol phula khoroknwirok bini thani phai kha. “Ang omo hai khlaiwi mano hwnwi norok poito da tháng?” hwnwi Jisu bórokno sẃng kha.

“I’n, poito thángo, hodasa,” hwnwi bórok sa kha.

29Jisu aphuru khe bórokni mokol tangwi “Norok poito tháng tẃi’-no wng thung!” hwnwi sa kha. 30Hakhe bórok mokol nuk kha. “O kókno khoroksano phano ta sa di,” hwnwi Jisu bórokno ragdama khe sa kha.

31Bórok thángwi Jisuni kók a ha gwnangwi pír kha.

Kók man ya khoroksano Jisu ham rwmani

32A borok khoroknwirok tháng kheno khoroknwi khoroktham bororok mwtai hamya kolobjak kók man ya khoroksano Jisuni thani tubu lai kha. 33A mwtai hamya rwkhlaijak kheno a borok kók sacha kha. Jotono uanajak bai kha. “Israilrokni bisingo omo hai chwng nuk ya kho,” hwnwi bórok sa lai kha.

34Pharisairok khe “Mwtai hamyarokni bokhorok bai se bo mwtai hamyarokno rwkhlai-o,” hwnwi sa lai kha.#Mat 10.25; 12.24; Mar 3.22; Luk 11.15.

Jisu lukuno hamjakmani

35Jisu bebak taunrogo kamirogo tháng kha. Bo bórokni thumnokrogobo phrwng kha, Kaitorni hani Kothoma Kahambo pír kha, bebak bemuk gwnang hamyaroknobo ham rw kha.#Mat 4.23; Mar 1.39; Luk 4.44. 36Bo lukurokno nugwi belai khairokjak kha, tamni hwn khe mwrwknai kwrwi merarok hai bórok khairok susuk piring-poroi gwja.#Lek 27.17; 1Ha 22.17; 2Bo 18.16; Esk 34.5; Sak 10.2; Mar 6.34. 37Aboni bagwino bo bini sagrirokno hai hwnwi sa kha, “Mai kwbángma munui tong kha, yang ranai se báng ya. 38Aboni bagwino bini mai rana bagwi ‘Teibo borok rohor di,’ hwnwi nokphangsano san di.”#Luk 10.2.

Currently Selected:

MATHAI 9: KOKBSI

Highlight

Copy