MATHAI 4

Jisu belokjakmani

(Mar 1.12-13; Luk 4.1-13)

1Aphuru Phola Jisuno Soitan bai belok rwjakna hwnwi hasing panthoro tubu kha.#Hib 2.18; 4.15. 2Nokha sal brwichi hor brwichi chá yaui tong khe Jisu ok khuijak kha. 3Soitan bini thani phaiwi bono hai hwnwi sa kha, “Nwng Kaitorni Sajla khe o holongrokno ruti wng di hwn di.” 4Jisu hai hwnwi sa kha, “Elembago o kók tongo, ‘Borok ruti bai simi thangwi man ya, Kaitorni búkhúkni bebak kók bai se thangnai.’ ”#Uái 8.3. 5Aphuru Soitan Jisuno Taun Kwtharo tlangwi noktharni bosok kuchugo bacha rwui 6bono hai hwnwi sa kha, “Nwng Kaitorni Sajla khe ha-o bakhlai di; tamni hwn khe Elembago o kók tongo,

“ ‘Kaitor bini suarirokno nini

bagwi dagi anw;

nini yakung holong nang ya

tẃi khe bórok nono yak bai yachak sok anw.’ ”#Lob 91.11-12.

7Jisu bono hai hwnwi sa kha, “Elembago o kókbo tongo, ‘Nini Kaitor Subraino nwng ta potali di,’ ”#Uái 6.16. 8Hakhe Soitan bono hathái kuchukma kaisa-o tlangwi swngcharni aswk ha bai jolma jolsarokno phunugui 9hai hwnwi sa kha, “Nwng ano yáskú sungwi khulum khe omorok bebakno’-no ang nono rw bainai.”

10Hakhe Jisu hai hwnwi sa kha, “Tháng di Soitan! Elembago o kók tongo, ‘Nini Kaitor Subraino simi se suriui khulum di.’ ”#Uái 6.13. 11Aphuru Soitan bono yakarwi tháng kha, hakhe suarirok phaiwi Jisuno chuba phai kha.

Jisu Galili-o samung khlai gramani

(Mar 1.14-15; Luk 4.14-15)

12Johonno alongo klai kha hwnwi khna khe Jisu Galili-o tháng kha.#Mat 14.3; Mar 6.17; Luk 3.19-20. 13Bo Nasareto tong yaui Jebulun bai Naptalini amchoi-o Galili twibom rukungni Kapharnaumo thángwi tongwi kha.#Joh 2.12. 14Jisaia diyari hai hwnwi sa langmani abo nang phaina bagwi se omo wngo,

15“O ha Jebulun,

o ha Naptali,

twijlang bwkhak Jordanni

ayang nar,

buini bororokni Galili!

16Mwnakma-o tongnairok bórok belai pohor nuknai,

kwthwirokni ha-o mwnakma-o tongnairok

bórokni aro pohor wngnai.”#Jis 9.1-2.

17Aphuruni simi Jisu bini kók pírna cheng kha tei sa kha, “Norok sumsok yakar di, Kaitorni ha sampha kha!”#Mat 3.2.

Gabor khorokbrwino Jisu ringmani

(Mar 1.16-20; Luk 5.1-11)

18Jisu Galili twibom rukungo himwi tong phuru gabor takhuknwino twibomo chei bu-ui tongma nuhur kha. A takhuknwi wng kha Simon bai Andria (Simonno Pitorbo hwno). 19Jisu bórokno hai hwnwi sa kha, “Ani logi phai di, ang norokno borok romna phrwng anw.” 20Logi logi’-no bórok chei yakarwi bini logi tháng lai kha. 21Tháng te tháng te bo tei takhuknwirokno nuhur kha, bórok wng kha Sebedaini bwsarok Jakob bai Johon. Bórok bupha Sebedai bai rungo chei snamwi tong lai-o. Jisu bórokno ring kha; 22logi logi’-no bórok rungbo klangwi buphanobo klangwi Jisuni logi tháng lai kha.

Jisu phrwngmani, hamya ham rwmani

(Luk 6.17-19)

23Jisu Galili gwnangwi tháng kha, thumnokrogo phrwngwi kha, Kaitorni hani Kothoma Kaham pírwi kha, bebak bemuk gwnang hamyarokno ham rw kha.#Mat 9.35; Mar 1.39. 24Bini kók ha Siriya gwnangwi pírjak kha, aboni bagwi bororok bini thani podrepot bemukrokno, podrepot hamyarokno tubu kha. Bórok mwtai hamya kolobjakrokno, mirka gwnangrokno, yakung yak man yarokno tubu kha hakhe Jisu bórok bebakno’-no ham rw kha. 25Galilini tei Taun khungchini, Jerusalemni Judiani tei Jordan ayang narni borok kwbángma bono rwkthar kha.

Currently Selected:

MATHAI 4: KOKBSI

Highlight

Copy