MATHAI 14

Baptisma rwnai Johonno butharmani

(Mar 6.14-29; Luk 9.7-9)

1Aphuru Galilini habugra Herod Jisuni kók khna kha. 2Bo bini tangphangrokno hai hwnwi sa kha, “O borok kubui’-no baptisma rwnai Johon se thangcha phi kha. Aboni bagwino bini bisingo omo tẃi samung khlainani phan tongo.”

3Herod Johonno rom rw kha, bono kha rwui alongo chop kha; bini takhuk Philipni bihik Herodiani bagwi se Herod omo khlai-o. 4Tamo wngwi hwn khe baptisma rwnai Johon Herodno “O bwrwino namani bai nini cha ya!” hwnwi sama tongo. 5Hai kheno Herod bono butharna nai kha, tamo khe bo bororokno kirijago, bórok le Johonno diyari hwnwi hwn bla.

6Herodni achaima sal pálai phuru Herodiani bwsajwk aswk borokni bwskango mwsa kha, hakhe Herod belai hamjagwi 7bono “Nwng ano jesa phano san khe ang abono nono rw anw,” hwnwi swmai tang kha.

8Bini bumani kók bai bo aphuru khe hai hwnwi san kha, “Baptisma rwnai Johonni bokhorokno mairango khe aro ano rw phai di!”

9Bugra belai khá hamya wng kha, hai phano panda phainairokni bwskango swmai tangma bai bo sanmano rw di hwnwi dagi kha. 10Hakhe bo alongo Johonno tan rw kha. 11Johonni bokhorokno mairango khe tubu-ui a bwrwimano rw phai kha, bo abono bumani thani tlang kha. 12Johonni sagrirok phaiwi bini mang kwthwino tlangwi phobwi kha; hakhe bórok thángwi Jisuno saui kha.

Borok khorok basaino Jisu chá rwmani

(Mar 6.30-44; Luk 9.10-17; Joh 6.1-14)

13A kók khna kheno Jisu aroni kutulwi rung bai siring siring kwrẃngsa-o tháng kha. Bororok abo saui manẃi taunrokni ongkhor baiwi ha tẃi bini thani tháng lai kha. 14Jisu rungni ongkhor phuru borok kwbángmano nugwi khairokjak kha, hakhe bórokni bere hamya tongnairokno ham rw kha.

15Sanja wng kheno bini sagrirok bini thani phaiwi hai hwnwi sa kha, “Belai lerwi tháng kha, oro mungsa phano manthok ya. Kamirogo thángwi chámung paiwi manna tẃi khe o bororokno rohor si di.”

16“Bórok thángna nang glak; norok’-no chá rw di,” hwnwi Jisu sa kha.

17“Chini thani bebagwi ruti lepba tei á maknwi se tongo,” hwnwi bórok sa kha.

18“Abórokno ani oro tubu di,” hwnwi Jisu sa kha. 19Bo bororokno jabra-o achuk di hwnwi hwn kha; hakhe bo ruti lepba bai á maknwino naui nokhasa naisaui Kaitorno hambai rw kha. Bo a ruti swkagwi sagrirokni yago rw kha, hakhe sagrirok a bororokno rw kha. 20Jotono ok pungwi chá kha. Hakhe bára tong rwkmano sagrirok khochamani ura khung chiknwi pung kha. 21Chánairok bwrwirok bai chwrairokno karwi chwlarok simi’-no basai ká twtwi.

Jisu twi saka tẃi himmani

(Mar 6.45-52; Joh 6.15-21)

22Hai kheno Jisu bini sagrirokno rungo kasa rwui twibom ayang naro bini slái swkang’-no rohor kha; yang khe bo lukuroknobo rohor kha. 23Bororokno rohor bai khe bo suri sanna bagwi tepsa khe hathái-o kasaui kha. Sanja wng khe Jisu aro saichung. 24Aphuru a rung twi rukung bai chalo; twi aphal bai rung didagwi tong kha, tamni hwn khe nokbar pail cha ya khe sibchajak. 25Phungni kaitham bai kaidokni kwcharo Jisu twi saka tẃi himwi bórokni thani phai kha. 26Sagrirok bono twi saka tẃi himwi tongma nugwi belai kirijak kha, “Omo ba burasa se bla!” hwnwi kirima cháui chirikhók lai kha.

27Jisu logi logi’-no bórokno “Ta kiri di! Omo ang se, khá tor di!” hwnwi sa kha.

28Aphuru khe Pitor hai hwnwi sacha kha, “Subrai omo kubui’-no nwng’-no hwn khe twi saka tẃi nini thani phai di hwnwi ano hwn di.”

29“Phai di,” hwnwi Jisu sa kha. Hakhe Pitor rungni ongkhorwi Jisuni thani thángna hwnwi twi saka tẃi him kha. 30Nokbar phaima nuk kheno bo kirijak kha, hakhe twi-o kwlwkna nai kha. “O Subrai, ano mwthang di!” hwnwi bo chirikhók kha.

31Logi logi’-no Jisu yak phologwi bono rom kha, “Nini poito bwswk se kisa! Tamo wngwi nwng bwkha udru mudru wngjak?” hwnwi bo sa kha.

32Bórok khoroknwi’-no rungo kasa lai kha, hakhe nokbarbo thak kha. 33Rungo tongnai sagrirok Jisuno khulum lai kha. “Nwng kubui’-no Kaitorni Sajla!” hwnwi bórok hwn lai kha.

Jisu Genesareto hamyarokno ham rwmani

(Mar 6.53-56)

34Bórok twibom láiwi Genesaret ha-o phai sók phai kha. 35Aroni bororok Jisuno sini sok kha, hakhe bórok “Hamya tongnairokno tubu-ui phai di,” hwnwi ha gwnangwi kók kwchár kha, hakhe bebak hamyarokno Jisuni thani tubu kha. 36Bórok Jisuno “Hamyarokno nini dulai buchuk phano tang rw jaba di,” hwnwi koiwi lai kha. Hakhe tangnairok bebak’-no ham rwjak bai kha.

Currently Selected:

MATHAI 14: KOKBSI

Highlight

Copy