JOHON 14
14
Jisu se Kaitorni aro thángnani lama
1Jisu hai hwnwi sa kha, “Norok ta uana di. Kaitorno poito khlai di, anobo poito khlai di. 2Aphani nogo tongthai kwbángma tongo. Ang norokni bagwi tongthai snam sokna thángo. Wng ya khe norokno ang o kók sa glak kha mun. 3Ang tháng baiwi tongthai snam anw, ulo ang kiphilwi phaiwi norokno ani aro tlang phai anw, hakhe ang tong thani o norokbo tongwi man anw. 4Ang thángna hwnmani aroni lamano norok saui mano.”
5Thoma bono hai hwnwi sa kha, “Subrai, nwng buro thángnai chwng saui man ya; bahai khe aroni lamano chwng saui mannai?”
6Jisu bono hai hwnwi sa kha, “Angno lama, ang’-no kubui, ang’-no langma; ani bising tẃi phai ya khe khoroksano phano Aphani aro phaiwi man ya. 7Norok ano sini kha ba Aphanobo sini anw. Tabukni simi norok bono sibo sini kha, nubo nuk kha.”
8Philip bono hai hwnwi sa kha, “Subrai, nwphano chwngno phunuk di, aswk kheno wng kha,”
9Jisu hai hwnwi sa kha, “Aswk sal kwbángma ang ba norok bai máng’-no bla, ahai phano da nwng ano sini li ya, Philip? Ano nuknai borok bo Aphano nuk kha. Hakhe nwng bahai khe ‘Nwphano chwngno phunuk di,’ hwnwi sa de? 10Ang Aphani bisingo tongo, phiya Apha ani bisingo tongo hwnwi nwng poito khlai ya da? Ang norokno samarok abo ani bai ang sama ya. Tamo khe ani bisingo tongnai Apha bo bini samungno khlai-o. 11Ani o kókno poito khlai di, ang Aphani bisingo, Apha ani bisingo tongo; wng ya khe o samungrok bai phano poito khlai di. 12Ang norokno sóino kubui kók sa-o, ano poito khlainai borok bo ang samung khlaima hai khlai anw, phiya bo teibo samung kotor khlai anw, tamni hwn khe ang Aphani aro thángna naiwi tongo. 13Phiya ani mungwi norok mungsa swk san khe ang abono khlainai, hakhe Sajlani bising tẃi Aphani chẃngsacha phunukjak anw. 14Norok ani thani ani mungwi mungsa swk san khe ang abono khlainai.”
Phola Kwtharno rohornai hwnwi Jisu samani
15“Norok ano hamjak khe ani kók ma khnanai. 16Ang Aphano sa anw, hakhe bo norokno tei khoroksa Chubanai rohor anw. Abo’-no kubuini Phola, bo norok bai tong phlainai. 17Swngchar bono nubo nuk ya, sibo sini ya, aboni bagwi swngchar bono yachagwi man ya. Tamo khe bo norokni aro norokni bisingo tongma bai norok bono sininai.
18“Ang norokno saichung susuk khe klang glak, ang norokni thani kiphilwi phai phir anw. 19Tei srapsa tong khe o swngchar ano tei nuk glak, norok le nuk anw. Ang kwthang tongma bai norokbo kwthang tong anw. 20A salo ang Aphani bisingo tongo hwnwi norok saui mannai, phiya ang norokni bisingo tongma hai norok ani bisingo tongo hwnwi saui mannai.
21“Ani kókno khnaui abo hai khe tongnai borok bo se ano hamjaknai. Ano hamjaknaino Aphabo hamjaknai, angbo bono hamjaknai, phiya bo bai nukjaknai.”
22Juda (omo Judas Iskariot ya) hai hwnwi sa kha, “Subrai, nwng bahai khe chwng bai simi nukjagwi ba, swngchar bai nukjak ya wngnai?”
23Jisu bono hai hwnwi sa kha, “Ano hamjaknai borok ani kók khnanai. Hakhe Apha bono hamjaknai, phiya Apha bai ang bini thani phaiwi tong phainai. 24Ano hamjak ya borok bo ani kók khna ya. Norok kók khnamarok abo ani ya, ano rohornai Aphani se.
25“Ang norok bai tongsani’-no o kókrokno sa-o. 26Apha ani mungwi Chubanai Phola Kwthar rohor anw, abono norokno bebak phrwng anw, phiya ang norokno sa langmarokno bo muitu khlai rwui rw anw.
27“Ang norokno khá kwchang rwui klangnai, ang khá kwchangma hai ang norokno khá kwchang rwnai. O swngchar khá kwchang rwma hai khe ang norokno rw glak. Norok ta uana di, tabo ta kiri di. 28Ang thángnai, phiya norokni thani kiphilwi phai phinai hwnwi ang samano norok khna kha. Norok ano hamjak khe ang Aphani aro thángma bai norok tongthokjak anw, tamni hwn khe bo ani slái kotor kuk. 29Wng phuru khe norok poito khlai thung hwnwi wng ya sini’-no ang tabuk norokno omorokno sa-o. 30Ang norok bai tei kók kwbáng saui man lang glak kha, tamni hwn khe o swngcharni bugra phai-o. Bo ano mungsa phano khlai man ya, 31ahai phano ang Aphano hamjago hwnwi o swngchar saui manna nang anw; aboni bagwino Apha dagima hai ang samung khlai-o.
“Bacha di, oroni him si di.”
Currently Selected:
JOHON 14: KOKBSI
Highlight
Share
Copy
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.