JISAIA 40
40
Khatungmani kóktháirok
1Khá srang di, ani bororok khá srang di,
abo norokni Kaitor sa-o.
2Jerusalemni lukurokno kwchang kwchang
khe kók sa di tei bórokni thani kókno sakhlai di,
bórokni chobani#40.2. Chobani: Samungni jora. jora pái súk kha,
tei bórokni cha yarok nakarjak kha,
sumsokrokbo nakarjak súk kha.
3 #
Mat 3.3; Mar 1.3; Joh 1.23. Borok khoroksa khorang chirikhógwi hai hwnwi sa khlaiwi tongo:
“Hasing hapharo Subraiyungni bagwi lahar snam di;
chini Kaitorni bagwi hasing hapharo lamano kepleng khlai di!
4Bebak harungrok kuchuk khlaijaknai,
bebak hachukrok tei hatháirok hache rwjaknai;
ha milik yarok milik rwjaknai,
lahar thatra butra ma miliknai.
5 #
Luk 3.4-6. Subraiyungni chẃngsacha phunukjak anw,
tei bebak bahan bwthẃini bororok baksa khe abono nuknai,
tamni hwn khe Subraiyung sakphangni khúk bai o kókno sa-o.”
6 #
Jak 1.10-11; 1Pi 1.24-25. Khoroksa chirikhógwi hai hwnwi sa-o, “Sa khlai di!”
“Tamono ang ma sakhlainai?” hwnwi ang sẃng kha.
Bebak bahan bwthẃini bororok sam hai tei bini bebak
naithokmarokbo hapharni khum bubar hai se.
7Sam rampraui thángo, khum bubar kwrai-o;
Subraiyungni hama abórokni saka-o nangwi-o;
kubui’-no bororok bo sam hai se.
8Samrok mwrano, khum bubar babwrai wngo;
phiya ba chini Kaitorni kóktháirok le
mol brúm brúmno tong phlainai.
9O Siyon, kothoma kaham pírnairok
hachukni kuchugo kasaui di;
o Jerusalemo kothoma kaham#40.9: Jerusalem ... kothoma kaham: Jerusalem ... kothoma kaham! Eba hathái kuchugo tháng di tei Jerusalemo kothoma kaham pírwi di! Khorang kotor khe Siyonni thani kothoma kaham sakhlai di. pírnairok
phan khe chirikhók lai di;
khorangno kotor khlai lai di, ta kiri di;
Judani kamiyungno naiwi bebakno’-no hai hwnwi sa di;
“Norokni Kaitorno naisik di!”
10 #
Jis 62.11; Phu 22.12. Nahar di Subraiyung Kaitor phan thonwi phai-o,
tei bini phankrak yak bini wngwi naikolwi tongo;
nahar di bini sokat bini thani’-no
tei bo supungwi rw phimabo bini bwskango’-no tongo.
11 #
Esk 34.15; Joh 10.11. Bo mera mwrwknairok hai khe mwrwgwi chá rwnai,
bo bini yago merarokno thumwi tubunai,
bo mera bwsarokno bini yaktwk bai bamsaui tẃinai,
tei bwsa gwnangrokno kwchang kwchang khe tẃinai;
Israilni Kaitorno khoroksa baibo suchana kwrwi
12Sabo yapha bai hayungni twirokno su kha,
eba nokharokno muk bai khe su-ui nai kha,
ha sakani hadlwirokno ura khung bwswk su-ui nai kha,
hachukno sumani bai tei hatháino
sukong bai su-ui man kha ba?
13 #
Rum 11.34; 1Ko 2.16. Sabo Subraiyungni pholano dagiui mannai tong?
Eba kókbiti rwnai wngwi bono sabo phrwngnai tong?
14Saboni thani sinani bagwi bo kókbiti sẃng kha ba?
Tei sabo bono bujsóino phrwng kha ba,
sabo bono rwngmungno phrwng kha ba?
Rwngmungni lamano sabo phunuk kha ba?
15Nai di dopharok golani twi thopsa hai se,
tei rwtamungo hasing kolsa hai khe se lekha jago,
nai di bo hasing kolsano tisama hai khe
twi rukungno tisaui mano.
16Lebanon hór mwchẃngna nangmani
bol swk se wng ya. Tei aro tongmani mal-matarokbo
sógwi yapharna se ká ya.
17Bini thani bebak dopharokbo mungsa buya,
Bo abórokno kwrwini slái bo kwrwi
tei bukcha hwnwi uansugo.
18 #
Sam 17.29. Hakhe norok Kaitorno sabo bai súchanai?
Taknairok bini mangno tago,
19takjak mwtairok!
Taknairok mangpilino takma manwi-o gele rw-o;
tei rangchakni manwi taknairok
abórokno rangchak silo.
Tei aboni bagwi rukphaini buduk snamo,
20bigrarok khe hilini bagwi sók ya buphangno saiwi na-o;
sakni bagwi khoroksa tang kwrwng rutugo;
bo abo bai khe kutulwi man ya mwtaino tak rw-o.
21Norok saui man ya da?
Norok khna ya kho da?
Cheng phuruni simi norokno sajak ya kho da?
Hayung snam phuruni simi norok saui man ya diba?
22Bo’-no hayungni kitingjak nokha sakani
achukthayungo achukjak,
tei aro-o tongnairok kúkthora hai máng;
rí swngma hai khe bo’-no nokhano swngwi rw kha,
tongnani bagwi ríni nok tang tẃi khe
abono khatonwi rw kha.
23Bo habugrarokni phanno samung chúk ya khlai kha,
tei o hani tẃiphangrokno chúk ya manwi hai khlai kha.
24Bórokno nangpleple khe kái kha,
bórokno nangpleple khe ha-o kái kha,
bórok ha bisingo
nangpleple khe yarwng sukhlai kha,
bo abórokni saka-o ahaino sup khe,
abórok ahaino ransaui thángo
phiya nokbar sibwi phai khe chwkap hai khe,
bórokno kobon rwui tlango.
25Aboni bagwi norok ano sabo bai baksa wng anw hwnwi sabo bai súchanai?
Kwthar kuk khoroksa sa-o.
26Norok nokha phaising naisaui
naisigwi nai di;
omorokno sabo snam kha?
Bo athukirirokno kolsa kolsa
khe tikhlaiwi tubu kha,
bo bórokno bebak bumung khu-ui ringo;
bo bini phan kwrak bai khe,
tei bini suar kwrakni bagwi abórok kolsa phano
kwmaui man ya.
27O Jakob, nwng tamni bagwi o kók sa,
o Israil nwng tamni bagwi o kók sa,
“Ani lama Subraiyungni lama bai huijak,
tei ani manthaino ani Kaitor sak nangjak ya?”
28Nwng saui man ya da?
Nwng khna ya kho da?
Subraiyung’-no mol brúmni Kaitor,
hani páithak jora Takchengnaisa.
Bo lengjak ya tei sak belwi tháng ya,
bini simungno naitugwi pái rwui man ya.
29Bo lengjakrokno phan rw-o,
tei phan kwrwi bororokno phan boksinwi rw-o.
30Phiya siklarok bo lengjago tei belo,
tei siklabo lengwi klai-o.
31Phiya ba Subraiyungno khatungwi naisingwi tongnairok,
bórok phan kwtal mannai,
bórok tolingrok hai khe bwkrang
phehelwi kuchugo bir anw,
bórok khabrum phano leng glak,
bórok him phano bel glak.
Currently Selected:
JISAIA 40: KOKBSI
Highlight
Copy
Compare
Share
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
