1 SAMUEL 5
5
Philistiasarokni bisingo swmai bokhok
1Philistiasarok Kaitorni swmai bokhok segwi na kha, bórok abono Ebenejerni Asdodo tlang kha; 2hakhe Philistiasarok Kaitorni swmai bokhokno tlangwi bórokni mwtai Dagonni nogo bini songphang saka bini gana-o khe ton lai kha. 3Asdodni bororok phung aidrobo bachaui nai phai ba Subraiyungni swmai bokhok bwskango Dagon mwkhang sutubwi klaijak khe nuk bai kha. Hakhe bórok abono tisa laiwi bini tongthai’-ono ton lai phi kha. 4Teini phung aidrobo bórok bachaui nai ba Kaitorni swmai bokhok bwskango Dagon tei uáisa klaijak nuk phi lai kha, nai di tabuk le bini bokhorok bai yak kongnwi báiwi tháng baiwi duglam gana-o se klai tong si-o, bwsak simi se tong rwk si-o. 5Abo bai’-no tini jora Dagonni ochairok tei Asdodo bono khulumnairok aro yapri ká lai li ya.
6Subraiyung Asdodni bororokno belai khe sátogwi sikiri kha tei a amchoini bororokno bo kula bemuk bai manjak rw kha. 7Asdodni bororok abo wngma nuk khe hai hwnwi sa lai kha, “Israilrokni Kaitorni Swmai bokhokno tei chini bisingo tonwi se man glak, tamni hwn ba bo chwngno tei chini mwtai Dagonno belai khe sátok kha.” 8Hakhe bórok bebak Philistiani habugrarokno thum laiwi hai hwnwi sa lai kha, “Chwng Israilni Kaitorni swmai bokhokno tamo khlainai?” Bórok hai hwnwi sa lai kha,
“Abono Gato tlang si di.” Hakhe bórok Israilni swmai bokhokno Gato tlang lai kha. 9Tamo khe abo aro sók phai khe, Subraiyung a kamiyungnobo sátok kha, aroni bororoknobo kwbángma bemuk manjak rw kha. Aro bebak siklarok tei chakrarok kula tháijak bai kha. 10Hakhe bórok Ekrono Kaitorni swmai bokhokno rohor lai phi kha. Ekrono Kaitorni swmai bokhok sók phai khe aroni bororok chirigwi hai hwnwi kap lai kha, “Chwngno butharna bagwi se bórok Israilni Kaitorni swmai bokhokno chini thani tubu lai si-o.” 11Hakhe bororok tẃiphangrokno hai hwnwi koiwi sa kha, “Israilni swmai bokhokno bini ha-o kiphilwi rohor ja si di, wng ya obo chwngno buthar bainai laha.” Tamni hwn ba Kaitor a kamiyungno belai khe swprakna chengwi tongma bagwi ha gwnangwini bororokni bwkha-o sundruma hap kha. 12Kwthang tongnairokbo kwbángma kula tháijak bai kha, hakhe bórokni kamiyungo kap laimani nokha jora sógwi kha.
Currently Selected:
1 SAMUEL 5: KOKBSI
Highlight
Copy
Compare
Share
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
