1 SAMUEL 11
11
Sol Ammonsarokno mechenmani
1Aphuru Ammonni habugra Nahas Giliad amchoini Jabes kami kotorno segwi na phai kha; tei Jabesni bebak bororok Nahasno hai hwnwi sa kha, “Chwng bai kók kha lai si di, hakhe chwng nono mon lai si anw.” 2Tamo khe Ammonsa Nahas bórokno hai hwnwi sa kha, “Omo hai khe kaisa soi khe se ang norok bai kók kha lainai, norokni bebak yagrani mokol ekhregwi khibinai, hakhe Israilo ur phnangnai.” 3Jabesni tẃiphangrok bono hai hwnwi sa kha, “Chwng bebak Israil amchoirogo tẃitun rohorwi sa hornani bagwi salsni jora rw di, chwngno khoroksa phano chuba ya khe, chwng sakno nini thani yapharnai.” 4Tẃitunrok Sol tongmani Gibea-o sók phaiwi bororokni thani sa phai khe bebak bororok chirik laiwi kap lai kha.
5Tabuk Sol khe musuk bai khe panthorni kiphilwi phaidrop se tei Sol hai hwnwi sẃng kha, “Tamo wngwi bororok kap lai?” Bórok Jabesni bororok sa phaimani kókno sa kha. 6Sol abono khna khe Kaitorni phola bini thani phankrak khe phai kha, bo belai joli kha. 7Bo musuk chwla jorsa naui abono bophon bophon khe helebwi abono tẃitunrokni yak tẃi bebak Israil amchoirogo tlangnani rohor kha tei hai hwnwi sa kha, “Sol bai Samuelni logi tháng ya bororokni musuk chwlabo abo hai khlaijaknai!”
Aphuru Subraiyung tamo khlai langno Israilni bororok belai khe kiriui bebak thansa khe ongkhorwi phai lai kha. 8Sol bórokno Bejego thum kha, aro Israilni khorok 300,000 tei Judani khe khorok 30,000 wng kha. 9Bórok phainai tẃitunrokno hai hwnwi sa kha, “Jabes Giliadni bororokno norok abo hai khe sa di, khwna omo hai sal kutungni jora norok phiyókjak bainai.” Tẃitunrok phaiwi Jabesrokno sa phai khe bórok belai tongthok lai kha. 10Hakhe Jabesni bororok Nahasno, “Khwna chwng sakno nini thani yapharnai, hakhe nini muchung tẃi nwng khlai di,” Hwnwi sa kha.
11Teini salo aidrobo Sol bini bororokno bodol kwtham khe khak kha, bórok kena arirokni bathamo phaiwi sal dibor wng ya sak Ammonsarokno buthar lai kha tei kwthang tongnairok khárwi tháng bai kha, bórokni bisingo khoroknwi suda yakarwi klangjak li ya.
12Hakhe Israilni bororok Samuelno hai hwnwi sa kha, “Sol de chini bugra wngnai hwnnairok biyang? Abórokno butharnani oro tubu di.”
13Phiya ba Sol, “Tini khoroksabo butharjak glak, tamni hwn ba Subraiyung tini Israilsarokno phiyókmani sal,” hwnwi sa kha. 14Hakhe Samuel bororokno hai hwnwi sa kha, “Phai di, chwng Gilgalo tháng laiwi tei uáisa Solno chini habugra hwnwi sakhlai anw.” 15Hakhe bórok bebak Gilgalo tháng laiwi aro Subraiyungni bwskango Solno habugra hwnwi sakhlai kha. Bórok aro khakchang yapharmung yaphar lai kha, Sol tei bebak bororok belai khe tongthok lai kha.
Currently Selected:
1 SAMUEL 11: KOKBSI
Highlight
Copy
Compare
Share
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
