1 HABUGRA 9
9
Kaitor haino hai Solomon bai nukjakmani
(2Bo 7.11-22)
1Bugra Solomon nokthar bai bini noyung tangwi pái khe bini tangna hwnmani nokno tangwi pái khe, 2#1Ha 3.5; 2Bo 1.7.Subraiyung Gibeono nukjakma hai hai’-no hai Solomon bai tei uaisa nukjak phai kha. 3Subraiyung bono hai hwnwi sa kha, “Ang nini surimano khna kha. Nwng, ang mol brúm surijakna bagwi tangmani o noktharno kwthar khlai kha; ani mokol tei khá aro tong phlainai. 4Nini nwpha Daud hai nwng ano khá kubui khe tei kwthama bai ani samung tang khe tei nwng ani kerongrokno tẃi khe tei ang nono dagimarokno khlai khe, 5#1Ha 2.4.hakhe ang nwpha Daudno kók rwma hai, ‘Israilrok bini bosong bai máng’-no tẃitherjaknai hwnwi kók rwmano ang narwknai.’ ” 6“Phiya nwng eba nini bosongrok ano rwktharma thak khe tei nwng ang rwmani kerongrokno tei dagimarokno khna ya hwn khe tei kubun mwtairokno khulum khe, 7hakhe ang ani borok Israilrokno ang bórokno rwma hani nornai. Ang surijakna bagwi tangjakma tei ang kwthar khlaima-o noktharnobo ang yakarnai. Ha gwnangwini bororok Israilno mwnwi lainai tei muchung tẃi’-no thwng bainai. 8#2Ha 25.9; 2Bo 36.19.O nokthar kwbaini burung#9.8: kwbaini burung: Baksa kwcham kók séma-o khe kwbaini burung; Hibru-o khe kuchuk. wngnai tei a gana tẃi lainairok nugwi uanaui mwlang ma chánai tei a gana tẃi lainairok nugwi uanaui mwlang ma chánai. ‘Subraiyung tamo wngwi o hano tei o noktharno hai khlai lang? Hwnwi bórok sẃngnai.’ 9Bororok hai hwnwi sa anw, ‘bórokni Subraiyung Kaitor bórokni chuchusongno Ijipni tikhlaiwi tubunaino yakarma bai se abo hai wngo. Bórok bórokni bokhorok tei kubun mwtairokni thani khá bera kha, aboni bagwino Subraiyung bórokno omo hai digi-sigi manjak rw-o.’ ”
Solomon Hiram bai Kók kha laimani
(2Bo 8.1-2)
10Nokthar tei bini noyung tangnani Solomon nokha bisik nwichi nang kha. 11Tur hani bugra Hiram bono a samungni bagwi nangsak sidar buphang, pain buphang tei bo sanma swkno rangchak rw kha. Abo pái khe, bugra Solomon Hiramno Galili amchoini kamiyung nwichi rw kha. 12Tamo khe Turni Hiram Solomon bono kamiyung rwmano naina phai khe bórok bono bwkha phur rw li ya. 13Hakhe bo Solomonno hai hwnwi sa kha, “Hakhe ani takhuk nwng ano o kamiyungrokno ano rw kha hai da?” Aboni bagwi a amchoini mung tabukbo Kabul#9.13: Kabul: O bumung khe “Kabul” hwnma hai; Hibru-o khe “Samung chúk ya” hwnma se. hwnjagwi tong kho. 14Phiya Hiram Solomonno kilo brwisaini sláibo kwbáng rangchak rohor kha.
Solomon teibo manmarokni kók
(2Bo 8.3-18)
15Bugra Solomon nokthar tangna bagwi tei bini noyung tangna bagwi phiya salkabaini hano supungna bagwi romwi mula tang rwjaknairokno samungo phnangjak kha tei kamiyungni chokdeual tisa thanibo thepa kha. Bo abono Hajorni kamiyung tang phuru, Megido tei Gejerni kamiyungrok tisa phurubo samungo phnang kha. 16(Ha Ijipni bugra Gejerno choba bachaui segwi na kha tei aro tongnai Kanansarokno butharwi a kamiyungno hór bai sógwi rw kha, bo abono bini bwsajwk Solomon bai káijak phuru hili khe bwsajwkno rw kha, 17tei Solomon abono tang phi kha), Bet-horonni kháma bwkhakno, 18Balat, Tamarni hani hasing haphar, 19Solomonni nangmani rúngnani kamiyungrok tei bini koraini malkhungni bai korai kanai sengkrakrokni bagwi kamiyungrok tei bo tangna muchungma bebak tei Jerusalemo tangna muchungmarok, Lebanon tei bini yago tongma harogo tangna muchungma tẃi’-no tang rw kha. 20Choba-o karwi klangjak Amorsasong, Hitisasong, Peressasong, Hibisasong tei Jebussasong, bórok Israilni bororok ya gwja, 21bórokni bosongrok khibiui klangmani, bórokno Israilni bororok sokomor súgwi man li ya, Solomon bórokno romwi mula tang rw kha, abo hai kheno bórok tabukbo seleng wngwi’-no tong lai kho. 22Solomon Israilrokno khe seleng snam li ya; tamo khe bórok bini sengkrak se wngo tei tẃiphangrok, sengkrak tei malkhungni sengkrak bokhorokrok tei korai tẃinairok se wngo.
23Solomonni samung chapmano khlai thani khorok 550 bororok wng kha samung tangnairokni bokhorok.
24Tamo khe Pharaoni bwsajwk Daudni kamiyungni nongkhorwi Solomon bini bagwi tangmani nogo phai kha: Yagulo khe bo Milo-o tang kha.
25 #
Lam 23.17; 34.23; Uái 16.16. Bisi-o uáitham Solomon, ratharmung sógwi yapharo tei kwthamungni yapharmung yapharo, bo Subraiyungni bwskango tongma-o satraibo sógo.#9.25: satrai sógo: Hibru-o khe tei kókthái bára tongo, aboni gujok srai-srai wng ya. Hakhe bo nokthar tang bai kha.
26Bugra Solomon rungtorbo tan kha abo Elatni gana Esiongebero. Akaba twijlang rukungo tei Idomni ha a klai-o. 27Bugra Hiram bini aroni rung choknai kwrwngrokno Solomonni bororok bai baksa tangna bagwi borok rohor kha. 28Bórok Ophirni ha-o tháng kha tei Solomonno kilo chibrwini slái kwbáng rangchak tubu-ui rw phai kha.
Currently Selected:
1 HABUGRA 9: KOKBSI
Highlight
Copy
Compare
Share
Want to have your highlights saved across all your devices? Sign up or sign in
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
