Galatiamiko 6

1Sazüjürako, mhace humi kekri keta püyo vorita lize, ne rüpüthümako sübi tiko züla pü uthilü sü vate, rüpü kemenülü, netho nerelece medo sü, molize nesheri medo kephi sübiti neyo ku tari semo tila. 2Neko humelü luni khiyite, mu Khrista zho thitso süte. 3Kekrelamori humi mhapüri zomosheri utho ulüpü mhapü bizo ba lize pütho püshü kedo tate. 4Thüma kehopüri pü mhatho seyi te, mu pütho pü mhatho lü pünü yito, kekremi mhatholü mori. 5Kekrelamori thüma kehopüri utho ulü ni (umezhe) püyi zoto tila. 6Pü mi kemethao jülü mhakeve popü mipo seyi keve thisü te. 7Mipo neshu va hite, Jihova sü thekrü thenyü zomo kekrelamori kehopüri tsava (prü) kesüo pü süo rüla zoto. 8Kekrelamori uthi upholü tsava kesüo, pü uthi upholü keka rü sala zoto tila. Vele Rüpülü tsava kesüo pü Rüpülü kechothe kerhü rüla zoto. 9Mu mha keve kethilü ho meza ta hikhe, kekrelamori pütü tülü uko rüla zoto tila, uko mhace phesa tamo lize. 10Uko pütü keve kebace bi uko thüma metü koyo mhakeve thisü khe, metüko ceri kerekri thipü kemelü lü kebako cekroyo thisü khe. 11Neko ngo bate, atho abe khipü lesi kecho thopü neko tsü kesü. 12Thüma kekro ukemenyü uthouthi upho khipü neko meka kesü neko kemu thipü yirü keto thi bate, Khrista Cross-o methimeni sü keto lebizo. 13Kekrelamori uko yi kerüko lebi thezho kezümi zomo, vele neko po yirü keto menyü ba, side nethi nepho pi uko zapozale thiyi ketola. 14Vele Jihova po khavate (kenithove) I nekoyo zapozale thi ketosa, uko Niepoo Cross lebizo. Püyo ala cejükemenyü metü khipü guve; mu I sheri cejüo la agu sü vazo. 15Kekrelamori Khrista Jisu la yikerü sü mhapüri zo tamo, mori yirü kemo sheri, vele thüma kesa thi keta. 16Thezho hibi tilü kelakhü, mikekro sheri, thelü kemenüpo uko zü tate, mu phi kemezhe, mu Isreal Rüo yo ketako. 17Tsüyovi mipü pori akebü hite, ayo athiapho yo thekuko ta Niepoo Jisu la. 18Sazüjürako Niepo Jisu Khrista ngokemezhe po neko rüpü zü ta keyi thite. Amen.

Currently Selected:

Galatiamiko 6: NAG5BSI

Highlight

Copy