MHATHOKO 21

Paul Jerusalem lü kevo

1Pü uko zü kekho ketasa ru thopü mezizo vo Coos (Cos) tsoyi, süsanha ta Rhodes lüvo, sülü ta Patara lü vo. 2Hako rupü Phoenicia lü voto kezü ngoyi de sülü lüyi side ru tho vota. 3Hako Cyprus ngoyi, ru süo khava hako veco, de sü ru thopü Syria lü vo de tavo Tyre lü bayi, sülü ru püko khasüva ketola. 4Sülü kemelü miko bade ngoyi mu hako sülü zho thüna bata; sülü mipü Rüpü lü saju poti, Paul po Jerusalem lü kho hinota. 5Tüsozho süko tso ketasa hako ta hako cholü vota, uko metü uneko mu ucemineko züvo hako cholü hako zü vosü, hako nade cuta kemothe; side hako kezü jüpolü chütüyi de kecho thiyi. 6Hako hunehu zü kekho ketasa hako ru lü lüta, mu uko ta uko celü vota. 7Hako Tyre lü mhathoko thitso kevasa ta Ptolemais lü vori, de sülü kemelü miko kelu sü de uko zü zhopü bayi. 8Hako Paul züketako süsanha tavo Caesarea tsoyi, ta Philip Evangelist celü vo, pü mi thünako dolü mipü, pü bata. 9Pünu reli phosa mi da ba, mu uko metü saju kepomi. 10Hako sülü zho kekro bata, süce Judea lü saju kepo mipü püza Agabus. 11Pü ta hako ce vori, pü Paul chepha püyi de khipü püphe pübeko phayi, de poti, Kemesa Rüpü hizi poyo, Jerusalem lü keba Jewko chepha hio sopü zhü sheri püphapü Gentileko tsüva toshe. 12Mha süko se keyice, hako sheri mu thethi sülü kebako sheri püpo Jerusalem lü kho hitano posü. 13Süsa Paul hako ce poti, neko krapü alü thi mesu kesü püco dipü? Kekrelamori atüpü pha keva zo mori I Niepo Jisu zala sa ri süto tazo. 14Hako pü valayi ho ketace poti, Niepoo medo thi yite. 15Tüsozho süko salü hako mhanyoko khipü tasü, de tavo Jerusalem tsoyi. 16Kemelü miko humi Caesarea lü hako züvo mu Cyprus mipü püza Mnason celü bayi, therace melü keyi mipü.

Paul tavo James zü kesü keti

17Hako tavo Jerusalem tso keyice, kemelü miko unü shude hako züyi. 18Süsanha Paul hako züvo James zü kesü, mehi miko metü sülü ba. 19Pü uko kelu kesüsa, pü yitholü Jihova püzü Gentiles miko dolü mhathi kesüko pü ukoce posü. 20Uko süko sesüde Niepoo zapozale pota, uko puce poti, asazüo, no se mu ngoba, thüma nye kekro melü keyiko metüri thezholü urha thi ketakozo. 21Uko nju poti, no Jews miko Gentiles miko dolü hü ketakoce potale siti, Moses zhoko kha vate, neko nuneko yirü hite, mori thezho süko züri hite. 22Dipü bita? Makropo vori kenguyi moze sutho, kekrelamori no vori keba uko se süte. 23Süla hako nce kepoko thi süte, hako dolü mida reshu ti pü bate. 24No talü uko zü nthi kemesa yite, uko pe menu yite, uko pi tha vato, ukopo se keto miko n yo mhapo kebako kethomo ziti seyi ketola, vele no kemezilü tazo mu thezhoko zütazo keti seyi ketola. 25Gentiles kemelü miko la zo lize, uko lesi thopü uko tsü süve, ukopo thajü reshü ketako hitano, mu mhapü therü reshü ketako, keropü chokhri tiko mu thüzako ti hino, kerügüko thi hino posüte. 26Süsa Paul thümako züyi de süko zü püthi kemesayi, mu süsanha uko kereshücelü lü, püthi kemesa tsü keyi zasi, uko mipüpü la kereshü khasü ketotü.

Kereshü celü pü tü keyi

27Tüso zho thüna tso ketasa Jews miko Asia lü ketako kereshücelü püngo sü, thümako pükerhüsü, side uko püvüsü. 28Se metode poti, Israel miko, tavorite thüma hiohi, thüma metü methapü thümako zü kemetsu ketao, thezho varhü, mu thethi hio sheri metsu, sülebimo ri pü Greek miko züpü kereshücelü lüde thi merho bate. 29Kekrelamori hi mhüjü uko Trophimus Ephesian mipü püzü keta ngosü, uko kelüce Paul thüma süo zü kereshücelü lü keta la. 30Nade metü melüta, thümako kezüde ta vorita, Paul tüyi, pü tüpü kereshü cekhü kegüdüva, side cekhako khava. 31Uko pü dokhri va tozüta, theju süo sevo thipahe krapi kezhoo tsota, Jerusalem nade metülü kebu ketala. 32Rekri thipaheko mu kezhoko züde ta ukoce vo, uko dolü krapi kezhoo mu thipaheko ngo kesüce, uko Paul vüsa mota. 33Süsa krapi kezhoo taphe pü menoyi, de püpüyi, thegi ro kenapü pü phayi no posü, pü sopü sheri ketso, mu pü dipü thiva sheri. 34Thüma krolü humi mhapü po mu kekremiko kekrepüpo, pü makrola mhapüri se kemetsüyi mota, pü püde kezhomi ce pükeba thilü vota no posü. 35Pü ta cekerekrülü kho keyice, thipaheko pü kekripü khosü thümako mhakebu shu ketala. 36Kekrelamori makro püsamejide se ketako poti, “püpo tatate” (mori pü dokhri vate)

Paul pü mezi kepo

37Paul zü kezhomi celü vokeyice, pü krapi kezhoo ce poti, apo nce mhapo yi veme? Püjü kela kesü, No Greek mi jü poyi veme? 38No Egypt mipütsü mome? Himhüjüce mhakebu kesüo, pü mhakebu kesüsa kedokhrimi mi nye da ketsüpü nhatsalü sü kevao mome? 39Vele Paul poti I Jew mipü, I Tarsus lü kevorimi, Cilicia lü nadepü, nade süo melekemo pümo, I nce choyo apo thümako ce jü posüte. 40Püpo jüpoyi keve thisü, metha Paul pheniejulü thayi de thümakopo kemekrede püfü reniyi no pübe chopü uko kekhasü. Süsa thümako kemekre züzi bata, pü Hebrew mi meyilü jü posü.

Currently Selected:

MHATHOKO 21: NAG5BSI

Highlight

Copy