TIMOTHY KÜRAO 4
4
Kümütha kücejü voküto
1Siri Rüpüno potü küsü vo künukünuco thüma humi u kümülü khavade uswükütse küti hupühko müdzi tato. 2Mu thürü kürüzüko sümi müthaküti dzüko rünyi tato. Therü küsu thümaküve muveva küzhoko. Cejüyo küzhoko mu uko külü ri thügithe müthipuzasi vü küvako bide süko zü mhathi tato. 3Thüma süko mipon küsuküri hino mu u Kümünupüh pu kümülüko mu küthoo sekütako pon sükopü putsüde süde ucho thino de thi küsüko tihino tato. 4Siri u Kümünupüh mhathiküsü khüko vetsüzo mu mhakühopüri u süde puza tsüde yiyi kütasa theta morive. 5Kükrelamoli u Kümünupüh dzüo la mu u küchola süko thi kümüsayikütala.
Jisu Khrista yitho küvemi
6No dzü hiko pü nzüko lü mu kütüsü lizo no ntho zori züta küta kümülü dzü mu kümütha dzü küveko thon n thüküpüh n pon Khrista Jisu yitho küvemipü thiyito. 7Siri dzü küthüvako mu kütsapüko kühanya küti dzü küpoko rünyi hide küthokülü cho ntho n küphra sü tayite. 8Thüma umo küzhophra küti zono küdopü kümüve zo, siri küthokülüno puküpra kükroba mu tsüdori mu thasa cori kürhü ngoyi küto dzü sülü ba. 9Dzü hikohi küthotüzo mu zü kütsükütsoyi ri züzo. 10Süsüla u rhütayoküzho u Kümünupüh yolü u sadzü bataküti la sürhü mu utütso thitayo zo. U Kümünupüh sü thüma mütüko külaküyiyo zo, süyi kümülümi la muku. 11Dzü hikohipü mipon züyi node posü mu süko pu uko müthayite. 12Non khriesa bazolu lino mipüri pon ntha nmülüküta thita hite, sikütamoli kümülümi mhuzülü non n dzü lüri mu n zhorüle lüri. Sülize kükhrü, kümülü mu müsade lhü kütilü ri thaka pü thipüh uko müka zoyite. 13In vo kümothe non kütholüsi phripüh mikaküti mu mitahitarho küti mu mi mütha kütiko lü n yhe thi bazoyite. 14Non kütsako ubekha n yolü küsüce sadzüküse dzüla Rüpü mhaphrü kha n phrüküvayo sün mhathi mo ba tahite. 15Non mhakühopulüri vekühieyi ba küta thüma kühopü pori seyi kütola non dzü hiko lü terü zode süko thi mu zü bazoyite. 16N zho n rülelü zori mu non mi kümütha lüzori münuyite. Non dzü hiko zü bazoyi, kükrelamoli non süzi ba zoyi lize ntho ri mu n dzü kürünyiko ri külayi to kütila.
Currently Selected:
TIMOTHY KÜRAO 4: NAG5BSI
Highlight
Share
Copy
Want to have your highlights saved across all your devices? Sign up or sign in
Chakhesang Chokri Naga New Testament © Bible Society of India, 2015. Used by permission. All rights reserved worldwide.
