MATTHEW 2
2
Tingbang Lamsu Ningtingmai Phiuwangbo
1Herod niu chawang thiubo ken-ga Jesu tu Judaea ramlung Bethlehem ga mana khaide. Siga watheng makbo lungga tingbang lamsu ningting mai Jerusalem ga wanglujiu maniu-e. 2“Jehudimai wangpiu leng mana khai bambo ngenase delam bamlo? Pagu chaganse aliuniu tingbang lam ngao lubo donniu patu kahumra wangkinbo-e.”
3Haise chawang Herod niu chiuluboga palung magenthiu mide, khatdi Jerusalem ga bammai hinadi manang kammide. 4Paniu singkudung khatdi tacheng-tajaigu katipaodungtu ku aruang lujiu maniu-e “Messiah haitu debo bamga mana ralo?”
5“Judaea ramlung Bethlehem ga-e” chiujiu paliuniu paokakge. “Palamra phaimiukakung siniu haichiujiu raokhai bamme:
6 #
Mic 5.2. ‘Judah ramlungga bambo Bethlehem, nangra
Judah ramgu namdidung ruangga nang-hai siam thubo makge;
palamra nakhu gasu amai Israel maitu maluang khaira jupaose padrabo-e.’ ”
7Sijengniu tingbang lamsu wangmaidungtu Herod niu mahin kulujiu paliu khuga chagan ngaolen khaibo wansiaktu maniu lude. 8Sichiujiu paniu paliu khuga haichiu din khaijiu Bethlehem lam langkhai mide. “Tadsulo, ngena situ phiu mawijiu phiulo, sichiujiu naliuniu patu daosai, atu pisikhailo, sichiusai Idi patu kahumra tadne.”
9Sichiujiu paliuse tadmide, siga paliuniu tingbang lam ngaokhai mibo gan situ paliuniu ngaolande. Paliuniu haise ngaoboga, dejiukha paliu chun wijiu ringa kami gulo! 10Haisiniu paliu masuangga tadjiu ngena bam wangtang makthen paliutu majang khaide. 11Paliuniu kalunglam ngutboga ngena nai papui Mary tu ngaode, sichiujiu paliuniu khudung kiujiu patu kahumde. Paliuniu paliugu kalendung, kachia, maruta, khatdi parim wibo wasase kalen thiujiu paleng pikhaide.
12Sichiujiu paliu manglamsu Tingwang niu Herod khulam malan wangmakra kachan khaibo jengniu npui katam lamsu paliu dihlam malanwang mide.
Egypt Dihlam Maritad Mibo
13Paliu tadmibo sailam, Rapiu gu maza khatniu Joseph manglam madu khaijiu din-e, “Herod niu ngena haitu kamshatra phiuwang kin-e. Sijengniu sulujiu ngena nai papuitu puilujiu Egypt dihlam mari milo, sichiujiu Iniu nakhuga dinlan makthen siga bam milo.”
14Joseph niu sulujiu ngena nai papuitu puilujiu sibo n-chun gasu Egypt dihlam tadmide. 15#Hos 11.1.Siga paniu Herod shaimak then bam mide. Haise Rapiu niu pagu phaimiukakung khuga dinkhai mibose wangtang raleng-e, “Iniu Anahtu Egypt dih gasu kupadbo-e,”
Nahmaidungtu Kamshatbo
16Tingbang lamsu wangmai siniu patu son mide chiubo Herod niu silujiu palung pomchang pom mide. Siniu Bethlehem ga khatdi sibo wonjengga lungbo ngena hina, takum nia tangmibo khatdi sibo hanglam bambo npiumainah hinatu kamshat mira paniu chamtan pikhaide—haise tingbang lamsu wangbo maidung khugasu paliuniu chagan situ ngaolubo tingse paniu silubo saisuijiu kambo-e
17Haichiujiu phaimiukakung Jeremiah niu dinmibose wangtangra leng-e.
18 #
Jer 31.15. “Ramah gasu chakhuan khat chiu-e, kap-huijiu bambo khuan-e.
Rachel niu panahmaidung jengniu kap bamme,
patu hiambamdi pachun kiuta mide, palamra paliu shai mide.”
Egypt Dih Gasu Malan Wangbo
19Herod shaimibo sai Egypt dihga Rapiu gu maza khatniu Joseph manglam madukhaijiu din-e, 20“Sulo, ngena nai papuitu puilujiu Israel mai kadihlam malan wangmi sulo, palamra ngena situ kamshatra phiubambo maise shai mide.” 21Sijengniu, Joseph sulujiu ngena nai papuitu puilujiu Israel mai kadihlam wanglan mide.
22Chiudi Archelaus niu papiu Herod bam malinjiu Judaea ga chawang thiubambo silujiu siga tadra Joseph hai pingmide. Pamang lamsu Tingwang dinkhai bibo donniu Galilee lam wang mide. 23#Mk 1.24; Lk 2.39; Jn 1.45.Sichiujiu Nazareth namdakga wangjiu lung mide, palamra “Patuse Nazareth mai chiujiu kune”, haise phaimiukakungniu dinkhai mibose wangtang raleng-e.
Currently Selected:
MATTHEW 2: LIANBSI
Highlight
Share
Copy
Want to have your highlights saved across all your devices? Sign up or sign in
Liangmai Naga (Re-Edited) - Masanbo Bible
Copyright © 2014 by The Bible Society of India
Used by permission. All rights reserved worldwide.