ADUNHEL 24

Jihudi hel Pol poyok Ado Kikol

1Ni-phongo aphel Ananiyas bor-bangthepo angkhan akisarhel pen Tertulas amen ihut ukil pen Sisiriya yok damsi, gobornor Pheliks po angot Pol po yok ado alam ojoro. 2Lalong Pol poyok pataramsi, Tartulas po anang ojorsi pulo, “O loseng kangsam aghai Pheliks, nang kido parasi hali nengsamdo hlongdo; aro nang aphel-ango langsi katiki pon parasi, 3ahuwit along ahuwit athem labang ajat aphan kachokem asal tikido, bangpo anat hali kido-kangwe chingduksi chidengdo, 4manta nangpen aporpo aro la-an padamdesi, lasi nang chingdukdo, aro nang jinsone hali lam bekso onenot. 5Piyok pu tene hali thek hlongo, labang arlengpo awur khanangpen, aro ahuwit pirthepe dung kido Jihudi hel asitem karwulsalpo, aro anang Najareth arleng hel duwar ki-etpon arleng; 6la-aparta, anang Arnam ahem kapasuwa yok chiron si kido; la-amunsi hali anangyok nepmo. 7Manta sonturi aghaipo Lusiyas po wangsi apharan pensi hali-ri para anangyok khardetsi pono. 8Nang labang arleng bisar-ote tene, hali anang yok potsi ka-ojor alam pomar, labang ahuwit alamthe than det une.” 9Lalong Jihudi helta chilokdun rensi pulo, “Lamehel alam pomar khanang,” pusi pulo.

Pol po Pheliks po Ango Kachiral

10Laparake gobornor po Pol po ayok lam kapathanyok atewa kipisi, anang labang pulo, “Nang jokha anengkan para labang ajat bisarpo chiplangsi dolo, labang than unsi neneng arongsi ne lam thando. 11Piyok pu tene nang bithang than-une, te kachirdom ayok Jerusalem kidam mini para ni-kere hi-ni det dolang; 12la aparta, anali kangthir athem, lale Arnam ahem longta, lale rongpelong ne inghone bak pensi lamthe kachirwal, lale rat kapangrum nethekngo, labangta kalek; 13aro minon potsi ado ni-ojordo, labangpo aporman nang ngot pi un-eh ye. 14Manta nang ngot ne hoi chodo, te kanong long ahuwit alam, aro turkihel alo-long potsi kiwido, labang ahuwit krolsi, pot aduwar yok analike suwa puman, labang aduwar badisi ne sar-lar hel Arnam yok chirdom man; 15aro dhorom kangthir aro suwa la hi-ni arleng kithi para burphaknge pusi anali chihadingsi inghong do, Arnam pen neta labangsi chihado; 16Lasi Arnam pen munusi angot mesosi kangthir kachiron kachiral yok ne ta arniten tiki sido. 17Aro bekso anangkan parkansi nebithang ajat aphan nohok kirap banta kiwan piyok aro nibot kipi ayok Jerusalem kiwang. 18Labadi katikijong amun, arleng hel neyok Arnam ahem long chipangthirsi kido nethekngo; ne pen arleng hel ta ingjongo, aro ahul ta wangwe yongo; manta angkhan Asia para kiwang Jihudi helsi ahul pawango. 19Ne long kilang un-eh ka-ojor alam anali kido, pu tene anali bithang nang-ngot wang than uno hoi. 20Lale ne ason amel angot karjapdam amun, kithi hel kibur phak alamthe mini nali ngotsi bisar chiplango, labang ithe alam ne anali asitem arjapsi hangchersi kithan hlong, 21la aparke, aro pot ado pahlongo, bangpo anali abithang pathan nang. 22Pheliks po labang aduwar alam me-atsi kithek apot, bisar pasangsi analiyok pulo, “Lesiyas hajar sonturi aghaipo wang tangsi, nali lampo than phlen une.’ 23La-aphel anang aphoro sonturi aghaipo ayok thano, nang anangyok pahon dingne binot; manta anang neng pangsamne padopon; aro anang al ki-en ayok, anang adon-arat arleng ihutyok tengek.

Pheliks po Pen Drusilape Ango Pol po

24Bekso adin aphel Pheliks po, Drusilape kipuman Jihudi apisope pen wangsi, Pol po yok taram ponsi, anang para Jisu Khristo yok kikrol, lamehel alam anang para onelo. 25Pol po damsi dhorom kangthir, abang kachingdom, aro monphel bisar ka-ote alam harlek-harlusi kipaklang amun, Pheliks po pheresi pulo, “Minon jongke dammot; ne sal-jolo tene, aphel nangyok taramsi pawan phaknge.” 26Aro isi anengke Pol po nohok piye pusi chihasi, anang yok taram jong jongsi lam chirwal jongo. 27Manta, nengkan hini aphel Porsiyas Phestas po si Pheliks po aholan gobornor cholo; la-amun Pheliks po Jihudi helyok neng pangsam ayok anangsi, Pol po ayok anang akrol long tikangsi damo.

Currently Selected:

ADUNHEL 24: AMRI-BSI

Highlight

Copy