MATHIU 4
4
Jisu Mathemna
(Mrk. 1:12,13; Luk. 4:1-13)
1Hale, Thavang ning Jisu ha ramtong lian na seitan ning mathemna rang a tuang jui. 2Sun sommanli le jan sommanli a man bu a ngei pha han, ama a von a chamjui. 3Seitan in a honga a ti, “Nang Pathian Pasalnai ha naninko, hiva lungngai hi bu chang na rang chong pero,”
4Jisun a hong sanga a ti, hingahin a kan jiak sake, mi ning bujak han ring na nimak, tak-ha Pathian baija an phut a hong suak chong han ring na ani.
5Hava suale seitan in Jisu ha a thiang khopui han a tuanga, hale biakinn chungshang tak han a man ong. 6A ma jiang a ti, “Pathian Pasalnai ha naninko, kan chom thakro, ajarko hingahin a kan jiak sake, Pathian in nang ranga thaneithiangngai ha chong benata, hale na ke na theng khiakmak na rang anmanin an kut an na lui pom rang ke”.
7Jisun ama jiang a ti, “Hingahin a kan jiak, nang in na Puma ha ensinthei noni che.”
8Veikhat seitan in Jisu ha tangbung shang tak khat chunga a tuanga, ramuol chunga rengram le ma hok lian na a man mu. 9A ma jiang a ti, “Nang in na kunna chubei nanabuk inko hiva rakip hi ki na pe rang ke.”
10Han Jisun ama jiang a ti, “Chetaro seitan, ajarko, hingahin a kan jiak sake, nang in na Puma na Pathian jak ha chubei na buk rang a suak.”
11Han, seitan in a mak jui, enru, thaneithiangngai an honga, Jisu ha an hong sanjui.
Jisu Galili A Chuan Aphut
(Mrk. 1:14,15; Luk. 4:14,15)
12Johon an churra ren inna an thunjuiti Jisun a jet pha Galili ramtiang a che jui, 13Nazaret khuo a mak Zebulun le Naphtali ram sunga tui sirra om Kapernam anti khuo han a om jui. 14Hivahi tashanthei Isaia ning alui ri chong ha tung na rang ani, 15“Zebulun ram le Naphtali ram, tui khamma om Jordon va ralla Galili jatdangmingai. 16Ajing mun na a om mingai ning var a lian khat an mu jui. Hale thina ram sung le thina nilim thuoia omngai chunga a hong varjui.”
17Hava pha tenna Jisun Pathian chong ri a phut a ti, “Nan lungthulru, ajarko vanrengram ha a nai jui.”
Jisun Ngachur Manli Akui
(Mrk. 1:16-20; Luk. 5:1-11)
18Jisun Galili tui khamma a hong lon na, Pitar, Simon om anti a naipangpa Andrew ngai ucha, ngachurmi anni jarra, tui sunga len an vorra nga an tok ha alui mu. 19A man anmani jiang a ti, “Kei na juiru, han kei ning len vorra michur na man changkati.” 20Hava phatak han an len an mak a ama an jui jui.
21Hava tenna an hong chea, Zebedi a nai, anni Jems le a naipangpa Johon, rokuang sunga an pa Zebedi le len an shui ha a mu uchangai ha a kui jui. 22Hava lai tak han anmanin rokuang le an pa an mak a manuk an jui jui.
Jisun Amanchu le A mandam
(Luk. 6:17-19)
23Hava suale Jisun Galili ram pumpuia a chea, Sainagok sunga rengram chongsat ruia alui man chu, hale nat rakip le ritong rakip mingai ha alui mandamjui. 24han ama chuan sat tho na ruihi Sairia ram pumpuia a thangjui, adamtorlui natsat, ritong khodengthei, khotangriabuk in a choi, a ke a pang her khat a thi rakip a kol la an hong choi a alui mandamjui. 25Hale Galili, Dikapoli, Jerusalem Judia, an khat om Jordan khel la om mitamtak in a nuk an lui jui.
Currently Selected:
MATHIU 4: AIMOLBSI
Highlight
Share
Copy
Want to have your highlights saved across all your devices? Sign up or sign in
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.