MATHIU 28
28
Jisu Ringkhir
(Mrk. 16:1-10; Luk. 24:1-12; Jhn. 20:1-10)
1Sernikhuo suale, hapta, nikhuo a masat tak jingtiang manhan, Meri Magdalen le a dang khat Meri ning than en ranga an lui hong. 2Hale enru, hava han ning nu adik khan alui kan nik han puma thaneithianng, vanramtenna an lui hong chum, hale a honga lungkhur an lui khar na ha amalet a chunga a ong jui. 3Amaisua ha kolkanlet ang alui ni, hale a puan adiar ha vur anga alui chek. 4Hale arungai ha ning ama ha an lui chit jarra an lui kan nik, hale a thisa mi anga an lui ni.
5Tak-ha thaneithiang ha ning numeingai jiang a hong shanga a hong ti “Nang ni chit maru ajarko khros an lui that Jisu ha nang nin nan tok ti ha kein ka jet. 6A ma hin om lai ma ajarko a man alui ri anga ama a ringkhir jui; hongru, puma an phumna mun ha hong enru. 7Hale a rak tak a che unang ama a thiamruoingai jiang variperu, ama ko a thi tenna a ringkhir jui hale a tak balla a man nang ni nek mandet Galili a che jui, hava mun han nang nin ama ha mu nanti, enru kein nang ni jiang kanaripe hi ngairu.”
8Han anmanin chit, ningsat le kan ruai than tena ha an hong suak a rak tak an chea a thiamruoingai jiang varipe na ranga an tan jui.
9Hale anmanin a thiamruoingai jiang hongripe na rang an che han, enru, Jisun anmani ha an kan mupuia a hong ti; “Nan ning man satru,” hale anmanin ama ha an hongdep a ke kung a chubei an hong buk jui. 10Hava han Jisun anmani jiang a ti, “Chitmaru, cheru kei ka u ka naingai ha Galilia che nang variperu; hale anmani hava mun han kei na mu nanti.”
Than Ngak Chong ri
11Anmanin an che lai han, enru, aluirung mingai karra a lek in an honga chuansuak rakip ha thiampulianngai jiang an hong manjet jui. 12Anmanin ulianrupngai le an kan chun han chong an kansiama, anmanin ral mingai jiang peisa tam tak an pek. 13An hong ti “Nang nin nanjal kar ama a thiamruoingain Janna an honga, ama ha an rukjui tia nang nin tiru. 14Hale hivahi ram vaihompa kuorra a hong tungleko, ama ha mathem kanta hale nang ni ha i om na man tho nonising.”
15Han anmanin peisa anluija an manchu ang han anmani ning an tho jui; hale hiva chong hi Jiwngai karra atuntunga an lari.
Jisun A thiamruoi le A kan Mupui
(Mrk. 16:14-18; Luk. 24:36-49; Jhn. 20:19-23; Tir. 1:6-8)
16Hava suale thiamruoi somleikhat in Jisun anmani jiang a ti pe anga Galili ja a om tangbung han an che jui. 17Hale anmanin ama an mu pha, anmanin ama ha chubei an buk jui; tak-ha aviar inko an kan ching na jui. 18Hava suale Jisun a hong anmani jiang a hong ti, “Vanram le simlei chunga torna rakip kei jiang an napejui. 19Hiva jarra cheru, jat rakip jiang thiamruoi sinru; anmani ha a pa, a pasalnai le thavang thiang minga tuija baptais man thoru. 20Kein nang ni jiang kinabe chong rakipngai ha jui na rang nang nin anmani ha man churu; hale enru a pha rakip hale ramuol a torna khan na kein nang ni ka na ompui chak.” Amen.
Currently Selected:
MATHIU 28: AIMOLBSI
Highlight
Share
Copy
Want to have your highlights saved across all your devices? Sign up or sign in
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.