KOLOSIA 2
2
1Nangni rang le Laodisia mingai ranga hale Kei ka tak khet hi an na la jet luingai rang iduk ranak neia chuan ka tho tihi na hong manjet rong. 2Anmanin kan lungsiat a om thei na rang, hale khat le khat kan jot thei na rang, han Pathian chong ruk ha Khrista ani tihi man jetru. 3Puma Pathian jiang ching na thei na, irakip a kan thup a alui om.
4Hiva jarra kei ning ka na hong manjet ani, en na ko misat an puoh, an leisei ko thona bui hava leisei ha ning man kan huong ma rase u. 5Nan karra ka tak khet ka om mak innom, ka thavang ko nan kara ka om, Khrista jiang nan takngai ha adet a nan ngir ha ka jet karra ka ning asat.
Khrista Jiang lungdo tung ringkhuo
6Khrista Jisu ha puma ke tia nang nin nan lui jarra, ama le omchak taru. 7Nang nin nan ring thei na ang han ama jiang nan rajung ha a thuk a man om ru, ama jiang lungsiat na ha tet nang, nan takngai na ha a khel la man ngarru.
8Hiva jarra, ching le thei tak a omru, Khrista jiang ni luia ramuol chunga thavang satlui in miringngai chingna theina chunga, a nem na an man om miring manmang ranga chingna thei na tenna kan ning theiru. 9Hiva jarra Khrista jiang a mi lungsiat na lungdo tunga Pathian a chang torna ha a om. 10A ma ko nang ni le a kan ruoi chak a an om hale ranak rakip neipu chung nung ha ani.
11Nangni ama le nan kan chun jarra vuntan ha nan hong chang jui, hivahi miring in an sin vuntan ha nimak; Khrista tianga vuntan ha ani. 12Tuia baptais kan tho han ama le an na phum suam jui, hale puma a thi ngai kar tenna Pathian ning aman ringkhir, hava takngai jarra nang ni jom ama le na ringkhir jui. 13Nangni siatna le vun nan tan mak jarra thina tenna nangni ha Pathian thavang ning ana sanring jui hale Puma ning ama le ring suam na ranga nan siatna rakip ha ana ngaidam jui. 14A man kan siatna iom ha ana rasuk man thiang jui, hava kan siatna ha Khros chunga thir hem ma an hem de jui. 15A man ranak rakip ha a manmang pe suale mitamngai madonna aman kan mua achung suak na rakip ha alei man kan mu jui.
16Hiva jarra chak le in, ut suak nikhuo, animakle, thathar nikhuo, hale sernikhuo hiva rakip chunga tu khat in nom nan chunga chong ri ma rase u. 17Hiva ngaihi ahong suak rang aramil ke, tak-ha a tak khet ha ko Khrista ha ani. 18Vanram thaneithiangngai chubeibuk na rang lo man ha, tu khat innom nang niha na sut ma rase u; Hiva jarra a man a mu phur nuk juia a taksa lungdo han a man kan lian na rakip ha anemna bui rong alui ni. 19Hi ang chat mingai ning a lu tir Khrista otit ma u, alutir tenna a honga a khit tharui rakip a man kan jom taksa Pathian lungdo ani.
Khrista le Thi le Ring suam na
20Nang ni ramuol la omchan munchan ha Khrista le nan thi suam inko nang nin ramuol la nan ring ke, nang nin veikhat dan chong pek thuaija om lai ma che u. 21“Them maru, atuimo ti jom chak maru,” 22Hiva rakipngai hi miringngai omchan nunchan le chong pek mang na rang ani. 23Hiva chuan rakipngai hi an taksa an bing jak asat thei na rang nun chan khat ke, duk lut le an taksa dik na rang chingna theina a om in nom taksa lungdo ranga ite a nem na om ma.
Currently Selected:
KOLOSIA 2: AIMOLBSI
Highlight
Copy
Compare
Share
Want to have your highlights saved across all your devices? Sign up or sign in
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.
