MATI 4
4
Jisume Aro-menam Ikaaname
(Mk 1:12-13; Lk 4:1-13)
1Delokrongem Jisume Darkaana Uyue ikaa darkaape emla Aide mooruk amolo gíboto. 2Delo looying appi kolang yooying appiko doma tímape duurongem bí kenue ikai. 3Depe iduem Darkaanade bíkkíng aala, “No Shédíke Uemílo sim elíng kídar sim ettípe imoto” emla poto.
4Dem Jisu bí poyansuto, “Tanie ettíng petomlok turgemang, idola ‘Shédíke nappalok lenna agom miyong lokmin turgedune’, emla attung.”
5Delokrongem Darkaana Uyude bím deena taonlo gíbopala delo bím Kumkeng Ekum lokke míílong teyong yalumlo dakmodola poto, 6“No Shédíke Uemílo no agísue yopyi kítoku. Kapeila sikepe attung: kapeila nok alem elínglo onyam supelo:
“ ‘Bí agí kotoki kídíem nokkepe políkyé,
delo bulu agí alaglok gakpít bomyé.’ ”
7Jisu bí poyansuto, “Dooying kitabe sikepekom attung, ‘Ruutumme, nokke Shédíme no darkang mapeka.’ ” 8Lekoda darkaana Uyude bím kedonruna díítelo gíbodola tani amosokke yéta tabungem delokke buluke angunem lengkanto. 9Delo bí pokai, “No ngom lebíng koníla kummílo, sim ngo nom biyé.”
10Jisu bí poyansuto, “No Soitan no, gígéétoku! Kapeila sikepe attung, ‘Ruutumme, nokke Shédí petomme kumlangka delokke bím petom agér ibilangka!’ ”
11Delo Darkaana Uyude bím megeyéla gíkaku, delo teyong kotoki kídíe aala bím igulto.
Galillo Jisuke Agér Gérlenname
(Mk 1:14-15; Lk 4:14-15)
12Edílo Jisu bí Joanme pateklo líkto emnamem tattodí, delo bí Galillo gílat sutoku. 13Delo Najareth em enboola, Jebulun kelang Naptali rísulo, sine robelo duuna Kapernaumlo gíla duuto. 14De Kaaluna miri Isaiahke sikepe ponam agomem aromope emla ito:
15-16“Jebulun delokke Naptali among Jordan ayirlok gíla siyénglo píína bedang, Mipak kídíke Galil amolo duuna kídíe Botteruna angunem kaato.
Sékobulu siko amolo duutuadí delo píange angkai.”
17Depe irong delokke ila Jisu bí “Míílat suto langku, kapeila teyong amonge anín kaabong” emla pogooto.
Esap Kuuna Appikonem Jisuke Tomname
(Mk 1:16-20; Lk 5:1-11)
18Jisu bí Galil siyéng robelo gígoo dungem bíro kumsu annyiko, Simon melang bíkke bíro Andriame kaato. Bínyi siyéng delo esap kuudungai, kapeila bulu esap kuuna amipe ito.
19Jisu bí bínyim poto, “Aatola ngokkíng gímín getola, ngo nonyim amiem esaplok kuudope iyé.”
20Delo bínyi menang asak esabem metola bíkkíng gímín geto.
21Delokke gílangala, bíro kumsu, Jebedike oo Jemslang bíkke bíro Joan bínyim bí kaato. Bínyike abu Jebedikíng bínyi lekope etkung aralo esap pomola dungai. Jisu bí bínyim tomto, 22delo bínyi etkung demlang bínyike abudem megeyéla bíkkíng gímín geto.
Jisuke Luyilla, Pogoola, Delokke Kinem Ipíkuname
(Lk 6:17-19)
23Jisu bí Galil among takamlo gígoola, buluke kumkeng ekum kídílo ngiitom sigla, Shédíke amo lokke tatporuna agomem pogoobila, ami kídílokke takam kinam ramnamem delokke angu anguna kinam kanem ipígooto. 24Bíkke pobo ibonam agomem Siria among tabuulo kényinkai; delo bíkkíng ami kídíe angu angu kina ramnem, yagorupe kinam kanem, urompe tumnem, simatnem, amíl amue sanla kinem bomato, delokke takamem bí ipítoku. 25Deddína amie Galil lokke, Dekapoli lokke, Jirusalem lokke#4:25 Dekapoli: De taon íyingko. Judia lokke, delokke Jordan ayirlokke bíkkíng mamín geto.
Currently Selected:
MATI 4: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
