MATI 3
3
Joan Baptist
(Mk 1:1-8; Lk 3:1-18; Jn 1:19-28)
1Depe yédudelo Joan Baptist emnamko aala Judia lokke mooruk amolo gogyito. 2“Míílat sulangkuka, legade teyong amonge mongnyokai” emla pokai. 3Simin sékoke legangem Kaaluna miri Isaiah kelok potudíde:
“Mooruklo gogyinake agome;
‘Ruutumke bedangem iruulangka,
bíkke bedangem jonmo langka.’ ”
4Joanke egede uut simon amídlok inameke, delokke bí ugílo uugem ayolok getuai. Bíkke dotkéde takom tarie delokke tangut alange, 5Jirusalemlok, takam Judialok delokke Jordan ayirlokke amikídíe gíla bíkkelo aato. 6Buluke paabem pobeng sukolok, Jordan korolo bí bulum baptis ito. 7Dekom Pharisi elang Sadduki kídílokke bojéko bíkke baptis ikolo gínamem kaala, bí bulum sikepe poto, “Nolu tabí opín kídía! Yépenam mardí longe lokke duknyok yépe emla nolum séko potune? 8Noluke paab lokke mooteng kunana agérem ilangka. 9Delo nolu agísue ‘Abraham bí ngoluke abue’ emla míírí sumapeka. Ngo nolum podung, Shédíbí sok dabu kídar sokte Abrahamke uem pílen bilayé. 10Esing lerííso egíngem leelík tubong, delokke ingko ingko esinge aina ayé éémadudí beela emelo romyé. 11Aang míílatsuna pemin ngo nolum asilo baptis idune. Idakkom ngokke méélamlo aapena bímin ngompenem ralyane; ngo bíkke leyuk emte bombang bimane. Bí nolum Deena Aidlokla emelok baptis iyé. 12Bíkke epode bíkkelo duuyardung, delokke bí bíkke aamem deedope kabbínyé, aam agíem bíkke kumsulo gesiiyé, idola amyangem miyyimana emelo romyé.”
Jisuke Baptis Isuname
(Mk 1:9-11; Lk 3:21-22)
13Delokrongem Jisu bí Galil lokke Jordanlo Joanme baptis ikosupe emla bíkkíng anggeto. 14Idola Joan bí luya sudola sikepe poto, “Ngomin nokkíng baptis isupene, depe ilate no ngokkíng aalat gedung.” 15Idola Jisu bí poyansuto, “Supak dekepe ipootoka. Kapeila sikeru pemin Shédíke míínam takamem ipe aiyéne.” Delo Joan bí tolíkto. 16Jisu bí baptis isurodem asilokke menape lentoku. Delopak teyong eyabe siyyato, delokke Shédíke Aide pekí kísape tokla bíkke teyolo unaadope kaato. 17Delo teyong telok “Si ngokke ayaru sunam Ue, bíkke teyolo ngo mííyum sudung” emna agomko polento.
Currently Selected:
MATI 3: adiBSI
Highlight
Share
Compare
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
