MALAKI 3
3
1Maglíngke Ruutum bí poyansudung, “Kaatola, ngokke kerang-kerape ngokke bedangem irung gedope, ngom agér ibinem ngo lulígyé. Delo noluke kaata-tatí bomnam Ruutum bí menang asak bíkke Kumkeng Ekumlo aayé. Noluke míítí bomnam kotokide pííla ngokke daapong ayonem lupa biyé.”
2Idola sékoda bíkke aadíku longedem donggap gelayén? Bíkke lengkan suyéme, sékoda dakka sulayén? Kapeila bí kampodope gubínna eme kísape iyé, demangkom deemangem arkutna sabon kísa iyé. 3Bí baldínem yolla kampodope ina kísa iyé. Bí Lebi kídíem deemo langkula, uun delokke baldínem imonam kísa, kampodope imoyéku. Delomin deenampe aman bomangkuna amie Ruutum ke keralo kayékune. 4Yéruktonam longe kísa, Jirusalem kelang Judah ke aman bomanam kídíem Ruutum bí torík suyéku.
5“Ngo nolum íngkí-bengkíkupe noluke pénsamlo aayéku. Delo jadu-montrong ina kídíem, abír-ayo ina kídíem, menampe hakii bina kídíem, agér ireem bimape yadna kídíem, mime meyéng emlang ane-abu kaimanem irééna kídíem, mibo-miyingem atímape iríkna kídíem delokke ngome pesomana kídíem, ngo hakii bidola aimangem lengkanyéku.” Sikepe Maglíngke Ruutum bí polendung.
Íying Sanpek Binam Legange
6“Ngo angupe ikup-ilatna Ruutum mang. Depeila Jakobke otíng-oyin nolu, nyokyinmayé. 7Noluke buku-neku longe lokke ila, ngokke idong-iyon kídíem igemape, delokke mesiimape nolu yédung. Ngokkíng aalat sutokula, delo ngote nolukíng aalatsuyéku. Idola nolu, ‘Kapekísa ngolu aalat suyékun?’ emla íídung. 8Tanie Shédíme yadla yénía? Idola nolu ngome yaddung. ‘Ngolu nome kape kísa yaddun?’ emla nolu íídung. Íying sanpek lolang aman kídí legalo nolu ngome yaddung. 9Nolu opín takam nolu pénam aralo kadung. Kapeila nolu takam ngome yaddung. 10Ngokke Kumkeng Ekumlo donam kadope íying sanpek tabungem kumsunglo bomalangka. Ngo teyong amo lokke eyabem iyabila, nolu mebo supeko kaimadupe, deddína utepooroem ruulík biyédí, ruulík bimayédí, deme nolu kéndope ngome ikang kítola. 11Ngo noluke ali-ayéme takom-tarugem domomayé, delokke noluke siipí-siiyé kídíe yaamayé, demangkom sumayé. 12Delo opín takame nolume utepooro kane emyé, kapeila noluke asi amode ardana moone amope iyé.”
Ayasukupe Shédíke Togesuname
13 Ruutum bí podung, “Nolu ngokke teyolo atírumana gomké em luto. Depe ilate, ‘Kape kísa ngolu nome gomké luton?’ emla nolu íídung. 14Nolu sikepe lupo bosudung, ‘Shédíme agér ibinam si asame. Bíkke míínampe agér-anam tabungem ibila, Maglíngke Ruutum ke keralo kapla-rííla igong gela ikolok ingko koda ainem paangkan? 15Idola ngolu kaadung; míngkímsula yéna kídíe ashéla yédo, atímape yéna kídíe miremla, gerepdo, delokke séko bulu Shédíme lakkéng sutla ikangla idudí, bulute yépípe sudung.’ ”
16Delokrongem Ruutum me pesona kídíe buluke aralo agom-aangem pobosuto, delokke buluke pobosunam tabungem Ruutum bí tatgapla kaayinbito. Bíkke keralo, míípang genana kitabkolo Ruutum me pesona, delo bíkke amínem mínggena kídíke legí-sigangem atkumto.
17Maglíngke Ruutum bí poto, “Si ami kídarsi ngokkepe iyé. Ngokke agér gérdí longe pííyém, bulu ngokke atekrupe mengusunam amipe iyé. Abu agom tatna oo teyolo kapekísa abue ayasududí, delok kísa buluke teyolo ngo ayasuyé. 18Delo nolu lekoda, deena ami kelang deemanake, delokke Shédíme agér ibina kelang ibimana buluke rísonem kaapayéku.”
Currently Selected:
MALAKI 3: adiBSI
Highlight
Copy
Compare
Share
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
