KEYUM KERO 32
32
Jakobke Esaume Kaaríksupe Leemosuname
1Jakobkom bík entíngpe endungkuem, Shédíke teyong kotoki kídíe bím ríksuto. 2Jakob bulum kaarík sudola, “Si Shédíke duupomko,” emla manto. Depeila moolop delok amínem Mahanaim emto.
3Jakob bí Edom among lokke Seir doolunglo, kotoki kídíem bík bíro Esau kíng mege líkdola, 4sipe poyil líkto, “Ngokke ruutum Esaume, nolu sikepe polangka: ‘Nokke béérang Jakob bí sipe podung, ngo supak loope Laban kíng duumín getíto. 5Ngo mére, sobéne, gadoe, goorue, milokong béérange lang mime béérange kadung. No ayang kaapang suyékupe emla mííla ruutum nom agomem megedungku.’” 6Edílo kotoki kídíde píílat sutokudí bulu Jakobme, “Ngolu nok bíro Esaume kaaríksuto. Bí supak nom kaaríkpe midum língko appiko gíbola aadung,” emla pobitoku. 7Jakob dem tatla yagorupe míídírla pesoe ila, ami kídídem opéé annyikope ipansuto. Gooru sobén delokke abíd simon-sili demte depe ito. 8Legade, Esau bí opéé konem mimak iya bomyémílo, opéé kone dugpu gedokupe emla Jakob mííto.
9Delo Jakob kumsuto, “E ngok abu Abraham ke Shédí delokke ngok abu Isaak ke Shédí, ngom ‘Nok agíke amolo, agíke edung-eranglo gílat sulangkuka, ngo nom ardamoyé,’ emna E Ruutum, 10nok béérang ngo, nok ayang emla míngkeng lengkanem paaba manako. Jordan korongem ngok kooduem, banggén petomem ngo bomto, idola supak ngo opéé annyi kope ikai. 11Ngok bíro Esauke alaglok ngom mopítyika, ngo kumdung. Bí mimakpe, ngomla ngokke ome-uem itaksula buluke ane kídarsim iyabomyé.” 12“Nokke, ‘Nom ngo arope ardamoyé delokke nok otíng-oyinem siyéng asi robeng lokke yépol kísa, hanla yimadupe iyé,’ emla nok pésunamem míípang subilangka.” 13Bí adeng dem deloi doopong dola, bíkke sérang bomnam ara delok bík bíro Esauke aman legape ullento. 14Bénne líínyiko, bénboe íying annyiko, mérne líínyiko, mérboe íying annyiko, 15mime uute íying appi kolang buluke ngange, rune íying appi kolang ruboe íyingko, mime gadoe íying annyi kolang milo gadoe íyingko. 16Dekedem bí béérang kídíem opéé-opéépe kaabom moto. Delo bí bulum poto, “Nolu ngok kerape gíge dola opéé kídílo pénsam melangka.” 17Kerang gígena béérang dem bí sikepe poyilto, “Edílo ngok bíro Esau nom kaarík sula, ‘Nok ruutume séko? No ingkolo gídakne? Nok keraso yéna simon-sili kídísim séko bomdune?’ emla nom ingkíyédí, 18delo no sipe poyan sulangka, ‘Si tabung si nok béérang Jakob ke. Bí bíkke ruutum Esaume amanpe bidope melíktung, delokke bí agí sude, ngoluke méélam esi enmín gedung.’ ” 19Dekepe bí béérang annyi nana dem lang angumnana demte delokke simon-sili dem goomín gena tabung dem teng poyilto, “Nolu Esaume kaarík suyém sikepe polangka, 20‘Aroe nok béérang Jakob bí ngoluke méélam esi.’ ” Kapeila Jakob sikepe mííto, “Ngo bím aman sok aapíem ashéng mola, ngokke bím kaaríksuyém bí ngom ayang mesam dokupe.” 21Depeila Jakobke aman kídíde bík kerape gígeto, idola bí agíe notko delo yoh dem duupoto.
Jakobke Ruutum me Laamín Suname
22Delo yoh delo Jakob gerepla, bík mime annyi demla béérang annyidem delokke bík oo íying kolang atel dem gíbola, Jabbok korong dem konggemoto. 23Bulum kooyin morodem bík ekuserang tabung dem teng kooyin líkto. 24Idola bí agí atele duusu poto. Delo ami kone aala bíme roh doonyi saadolope laamín suto. 25Amide bíme elkum lamape kaayéname bí Jakobke arkéng dem kídla along dem luddope ito. 26Delo amide pokane, “Ngome gímo tokuka, longe angune píídak.” Delo Jakob, “Ma, no utepooro ruulíkmang tetedem gímokumayé,” emto. 27Delo amide, “Nok amíne ingkue?” emla tatkíto. Bí “Jakob,” embisuto. 28Delo amide poto, “Nok amíne Jakob pe iyimayé idola Israel emla iyé; kapeila no Shédí melang tani kídíem laamínsula ikumto.” 29Jakob delo, “Ayangsula amínem pobi sutola” emla roguto. Idola bí poyan suto, “No kapeda ngok amínem íídun?” depe empala bí Jakob ke teyolo utepooroem políkto.
30Delo Jakob, “Ngo Shédí me mikmope kaarík sulate turdung,” depe emla moolop delokke amínem, Penuel emla mínto. 31Penuel dem bík gíbongdoku delo doonyie saadobong. Bík arkéng delok legape bí lebyato. 32Depeila silo-melo pete Israel ami kídíe arkéng lokke adínem domang, kapeila arkéngke adín oong delokmin Jakob me kídbettone.
Currently Selected:
KEYUM KERO 32: adiBSI
Highlight
Copy
Compare
Share
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
