MIINIIÑ 23

1Ho Pol, bulyañ mi kadi lala, lutii, “Anubarmii atañ, ngo Pinii ka hataho siilo lohe pa hendi biidola santii.” 2Ho bukuñ nyibu Ananias lutii mohka aruñhoka danii mi mohka aguñ ho kiito hiila. 3Ho Pol mohmi lutii, “Pinii niimi hikiñ doke, no puloo tasi! No ngiimi dapo ka hanjuho haliipa dunii, ho no dapo mi chekho biidola ngiimi hidopa ludunii?” 4Hoka danii atañ lutii, “No Pinii ka bukuñ nyibu miha cherii dunii?” 5Ho Pol lutii, “Ngo chima, anubarmii atañ, mo bukuñ nyibu hiila; niimpalukoda hiila ketola do, ‘Nunu miyuatañ mika sangii bomi ayamapa luyo hiila.’”

6Hojalo Pol hendḛr lala khache si Sadusi atañ ho tange hii Parisi atañ hiila, mo bulyañ ho gyuritii, “Anubarmii atañ, ngo Parisi, Parisi ka oho; hengi nanii mika khiiko hopa ho shiinii ka turiturku kendo luko hopa ngiimi latutii.” 7Ho mo siimi lukele, Parisi atañ la Sadusi atañka punkoho chesuritii; ho dukuñ hii tache ritii. 8Niimpalukoda Sadusi atañ ludo turiturku kunii nyima, malo miidopopi, malo yajiyallo; hojalo Parisi atañ hikha hiimi do ludo. 9Ho hempḛr goropa chesu ritii; ho Parisi hoka pagenii tonge tongepa guritii ho uropa chekho tii, “Ngunu siika miyu kiiso hang miikha nii kapa ma. Nii yajiyallo malo miidopopi matiirḛ mohmi lutii?” 10Ho chesunii hadii risu kiile, akhojabo, biisoritii siika atañsi Pol mi miije lobii talyi hiila, sipahi atañmi lubiido akañ ho tonge la mohmi cheche pa sebiiku mohluka punko hokii ho mohmi patiihude ho atiito.

11Ayoh yohe yaho Attoh mohka aruñho datii ho lutii, “Haroto, niimpalukoda no ngiika piigo mi Jerusalem ho pyakotii, hiichulipa no Rom hotiirḛ haki bikiñ doke.”

Pol ka Sango Mika Rhuniiñ

12Allo kukele, Jew atañ rumyotii ho atoh atoh hemme nyatii nii dahepa Pol mi mente ma mohlu hang diite tante ma hiila. 13Hiiko alyañpiilye mi abu yapa datii siika runii siimi ka miinii atañ. 14Ho mohlu nyibu burii atañko ho amiabañ atañ ko ahtii, ho lutii, “Ngunu hempḛr uropa hemme siitii nii dahepa Pol mi mente ma ngunu diigo mi diika hetrḛ diika tama. 15Hopa nunu, bulyañ ka agiñho, akhojami pota bito mohmi nunuka agiñho selo biito hiila, nunu mohmi mohka lugo mi ludiko jaho lulyañ bichi ke hiila. Ho ngunu mohka aruñ ahma rampa mohmi menchi ke.”

16Siisi Pol ka barmii ka oho mohluka tulya niimi tapatii; hopa mo patiihude ho ahla ho Pol mi lukotii. 17Ho Pol sipahi sabii kone mi gyola lala ho lutii, “Siika yapa atu siimi akhojako ingii he; niimpalukoda mohko ngoya ako mohmi luko sanii doke.” 18Hopa mo mohmi ingiila ho mohmi akhojako agiitii ho lutii, “Pol pattiih tunkobo ngiimi gyola lala ho ngiimi siika yapa atu siimi niika ahgii hete hiila lutii, mohka ngoya ako niimi lusa do hiila.” 19Akhojabo mohmi alah la sebiila, ho aruñho ahhi giila mohmi tasiela takatii, “Nii niiko ngiimi luko sanii do?” 20Ho mo lutii, “Jew atañ lusu biine niimi arda Pol mi bulyañ ko togii tote lusa hiila, mohmi tadḛrla taka dupa miipa miido niihtañpa. 21Hojalo mohluka lunii mi talyayo; niimpalukoda alyañpiilye mi abuyapa mohmi rula ke donii, mohlu hemme siibii tola nii dahe pa mohmi mente ma hang diite tante ma hiila; ho siisi mohlu henju nyatii, niika luniiñmi kalya lake dunii.” 22Ho akhojabo yapa atu mi inke nentii ku, mohmi lubiido, “Kone mitrḛ siimi luko yayo ngiimi no luko to hiila.”

Pol mi Govonor Felix ko Kiiniñtii

23Ho mo sipahi sabii anye mi gyola la ho lutii, “Ayoh ka gunta takkowa ho lanye sipahi agiñho kanukhange gorayonii ho lanye adañbiinii mi Kaesarea ho indu pa miito. 24Pol patrḛ duko miibito yobo mondupa, ho mohmi ayapa Felix govonor ko ahchi giihe.” 25Ho mo siika drih mi siitipa ketii:

26“Klaudius Lysias no khiiniiñja govonor Felix, ayahelyi. 27Siika miyu si Jew atañka latu nii, ho mohlulo menko paka miinii, ngo mohluko sipahi atañ agiñho ahbiila mohmi lupya biikiile, chimbii lyimi kiile mo Rom hoka dunii hiila. 28Ho niihpana mohlu mohmi halii tiinii hiila chinnala, ngo mohmi mohluka bulyañ ho togiibi. 29Ngo chimpa biilyi mikele mohmi mohluka dapo ka piigo pa halii tiimi, hojalo mohmi mendo malo pattiih tundo pa halii sanii giima. 30Ho ngo hiila tapa lala mohmi chekhola, siika miyu mi rula do hiila tapa lala, ngo nyibya loda niiko kiiniñ biilyi ke, mohmika haliinii atañ miina mi lubii lyike nii lukiñdo niiko lungete hiila.”

31Hopa sipahi atañ, mohluka lukonii chulipa, Pol mi ingiila ho mohmi ayoh ho Antipatris ko ahgii bitii. 32Ho allo lohe yaho mohlu patiihude ho ahkur tiiku, gorayonii atañmi mohka agiñho atii tela. 33Mohlu Kaesarea ko ahtii ho siiti mi govonor mi bitii, mohlu Pol mitrḛ mohka hataho ahgii bitii. 34Siiti mi puri lala, mohmi takatii no nii ganda hokii hiila. Mo chila lala mo Silisia hokii hiila 35mo lutii, “Ngo taka talyike niimi ka halii atañ ahlyi milo.” Ho mo mohmi Herod ka raddeduko lengo ho dagur biitote hiila lutii.

Currently Selected:

MIINIIÑ 23: APATBSI

Highlight

Copy