Xefaniyas 3
3
Yeluxalees Tej Kev Txhaum Thiab Raug Txhiv Rov Los
1Yeluxalees raug kev puastsuaj vim ua tsis ncaj, ntxeevsiab, thiab tsimtxom nws cov neeg. 2Nws yeej tsis mloog tus TSWV lus lossis tsis yuav tus TSWV tej lus ntuas. Nws tsis ciasiab rau tus TSWV lossis yeej tsis txav los nyob ze rau ntawm nws tus Vajtswv li. 3Nws cov nomtswv zoo yam li cov tsov ntxhuav uas nyoojlaws xwb; nws cov txiavtxim zoo yam li cov hma uas tshaib plab hmontuj, noj tagnrho txhua yam thiab yeej tsis tseg ib tug nyuag pobtxha cia rau tagkis li. 4Cov xibhwb cev Vajtswv lus los khavtheeb heev thiab ntxias noj ntxias haus xwb; cov povthawj hlob ua rau lub chaw dawbhuv ciali qias lawm, thiab ntxeev Vajtswv txoj kevcai rawsli lawv lub siab nyiam. 5Tiamsis tus TSWV tseem nyob hauv lub nroog; Nws ua ncajncees thiab yeej tsis ua txhaum hlo li. Txhua tagkis, Nws yeej coj kev ncajncees los rau Nws haivneeg tas mus li. Txawm li ntawd los cov neeg uas tsis dawbhuv yeej tseem ua txhaum qees tsis paub txajmuag li.
6Tus TSWV hais tias, “Kuv twb ua rau ntau haivneeg tu noob lawm; twb ua rau lawv tej nroog puastsuaj tag, tseg lawv tej ntsaloog thiab tej chaw tsomfaj tawg ntsoog ntxaws cia lawm xwb. Tej nroog nyob ntsiagto; thiab tej kev nphobxuav tsis muaj leejtwg taug li. 7Kuv xav tias Kuv haivneeg yuav hwm Kuv, yuav mloog Kuv tej lus ntuas, thiab lawv yuav ncontsoov#3:7: Tej co ntawv qub-qub thaum ub sau hais tias lawv yuav ncontsoov; phau los Henplais hais tias lawv qhov chaw nyob yuav tsis raug txiav tawm. tej lus uas Kuv qhia rau lawv. Tiamsis tibpliag xwb lawv rov mus ua phem li uas lawv ibtxwm ua tag los lawm.”
8Tus TSWV hais tias, “Nej tos mentsis, tos txog hnub uas Kuv sawv los komtxim rau txhua haivneeg tso. Kuv twb txiavtxim siab lawm tias Kuv yuav sau txhua haivneeg thiab txhua lub tebchaws los nyob uake thiab yuav muab Kuv txoj kev chim hliv rau lawv. Thoobplaws lub ntiajteb yuav raug kev puastsuaj los ntawm cov hluavtaws uas yog Kuv txoj kev chim.
9“Ces Kuv yuav ntxuav txhua haivneeg daim dincauj, mas lawv yuav thov txog Kuv tibleeg xwb, yuav tsis thov lwmtus nyuag vajtswv li. Lawv txhua tus yuav mloog Kuv lus. 10Txawm yog Kuv haivneeg uas tawg uasab uasua mus nyob deb rau tebchaws Itiupias#3:10: Phau lus Henplais hais tias Khuses: Khuses yog ib lub npe thaum ub uas nyob rau ib cheebtsam qabteb ntawm tus Dej Nais. Cheebtsam no, nyob rau tiam thaum nomtswv Loos kav tebchaws, yog hu ua Itiupias, uas tus ciam yog los ti nkaus rau tebchaws Xudas thiab tiam nimno hu ua Itiupias. lawm los, lawv yeej yuav coj khoom tuaj fij rau Kuv. 11Thaum lub sijhawm ntawd, nej cov uas yog Kuv haivneeg, yuav tsis txajmuag rau tej uas nej tau ntxeevsiab tawmtsam Kuv lawm. Kuv yuav muab txhua tus tibneeg uas khavtheeb thiab muajplhus tshem tawm kom tag thiab nej yuav tsis ntxeevsiab tawmtsam Kuv saum Kuv lub roob dawbhuv#3:11: roob dawbhuv: Roob Xi-oos (saib lolus Xi-oos uas nyob rau hauv cov lus teev rau tomqab.) ib zaug ntxiv li lawm. 12Kuv yuav cia cov neeg txo hwjchim thiab cov neeg poob qis-qis nrog nej nyob, lawv thiaj yuav tsosiab rau Kuv lub npe. 13Cov Yixalayees uas seem tuag yuav tsis ua txhaum rau leejtwg, tsis haislus dag, lossis dag-ntxias lwmtus. Lawv yuav vammeej thiab ua neej nyob kajsiab lug, tsis ntshai leejtwg li.” #Tshwm 14:5
Zaj Nkauj Zoosiab
14Cov Yixalayees, ciali hunkauj thiab qw zoosiab!
Au cov Yeluxalees, ciali zoosiab kom kawg nej lub siab lub ntsws!
15Tus TSWV twb tseg tsis rautxim rau nej lawm;
Nws twb muab nej cov yeebncuab tshem tag huvsi lawm;
Tus TSWV, uas yog cov Yixalayees tus Vajtswv, yeej nrognraim nej;
nej tsis tas yuav ntshai ib yam dabtsi li lawm.
16Thaum txog lub sijhawm ntawd lawv yuav hais rau lub nroog Yeluxalees tias,
“Lub Nroog Xi-oos, tsis txhob ntshai!
Tsis txhob cia koj ob txhais tes tsaugleeg hlo li!
17Tus TSWV uas yog nej tus Vajtswv yeej nrognraim nej;
Nws lub hwjchim ua rau nej muajyeej!
Tus TSWV yuav txaussiab heev rau nej,
vim Nws txoj kev hlub, Nws yuav pub nej muaj lub neej tshiab.#3:17: Tej co ntawv qub-qub thaum ub sau hais tias pub nej muaj lub neej tshiab; phau lus Henplais hais tias nyob ntsiagto.
Nws yuav hunkauj thiab zoosiab heev rau nej,
18yam nkaus li cov neeg uas zoosiab nyob hauv lub rooj noj rooj haus.”
Tus TSWV hais tias,
“Kuv twb tshem qhov uas yuav ua rau nej raug kev puastsuaj ntawd tawm lawm,
thiab twb tshem nej txoj kev txajmuag tawm lawm. #3:18: Nqe 18 no paub tsis meej tias lolus Henplais yog txhais licas tiag.
19Tabtom yuav txog sijhawm lawm!
Kuv yuav rautxim rau cov neeg uas tsimtxom nej;
Kuv yuav cawm txhua tus neeg uas cegtawv
thiab yuav coj cov neeg uas raug ntes mus rov los tsev.
Kuv yuav muab lawv txoj kev txajmuag hloov ua kev tau ntsejmuag,
mas txhua haivneeg hauv ntiajteb yuav qhuas lawv.
20Tabtom yuav txog sijhawm lawm!
Kuv yuav coj nej cov neeg uas tawg mus nyob uasab uasua rov los tsev;
Kuv yuav ua kom nej muaj koob muaj npe nrov-ncha mus thoob ntiajteb;
thiab yuav ua kom nej rov vammeej dua ib zaug ntxiv.”
Tus TSWV yog tus uas hais tej lus no.
Currently Selected:
Xefaniyas 3: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
