Xekhaliyas 6
6
Zaj Yogtoog Pom Plaub Lub Tsheb Nees
1Kuv rov pom dua ib zaj yogtoog. Zaumno kuv pom plaub lub tsheb nees uarog tabtom tawm hauv kis nruabnrab ntawm ob lub roob toojdag tuaj. 2Thawj lub tsheb yog pab nees liab luag, lub thib ob yog pab nees dub luag,#Tshwm 6:4; Tshwm 6:5 3lub thib peb yog pab nees dawb luag, thiab lub thib plaub yog pab nees daj-doog luag. #Tshwm 6:2 4Ces kuv nug tus timtswv ceebtsheej hais tias, “Tus tswv, lub ntsiablus ntawm cov tsheb nees uarog no yog dabtsi?”
5Nws teb kuv tias, “Cov no yog plaub nthwv cua; lawv nyuamqhuav tawm ntawm tus TSWV uas kav lub ntiajteb no lub xubntiag los.” #Tshwm 7:1
6Lub tsheb nees uarog uas pab nees dub luag yog mus rau sab qaumteb uas yog mus rau pem Npanpiloos, pab nees dawb yog mus rau sab hnubpoob, thiab pab nees daj-doog yog mus rau nram lub tebchaws uas nyob sab qabteb. 7Thaum pab nees daj-doog tawm tuaj, mas lawv tos tsis taus yuav rawm mus tshuaj saib lub ntiajteb. Tus timtswv ceebtsheej thiaj hais tias, “Nej ciali mus tshuaj saib lub ntiajteb!” Ces lawv txawm mus lawm. 8Tus timtswv ceebtsheej hu nrov-nrov rau kuv tias, “Pab nees uas mus rau sab qaumteb uas yog mus rau pem Npanpiloos, tau ua rau tus TSWV txoj kev chim txias lawm.”
Xaaj Kom Muab Lub Kausmom Yeebkoob Rau Yesuas Ntoo
9Tus TSWV muab cov lus no cob rau kuv. 10Nws hais tias, “Koj nqa tej khoomplig uas cov raug ntes mus thiab nyuamqhuav rov tim tebchaws Npanpiloos los tej nyiaj tej kub uas yog Heledais, Taunpiyas, thiab Yedayas muab, thiab ciali mus rau hauv Yauxiyas uas yog Xefaniyas tus tub lub tsev. 11Ciali muab tej nyiaj tej kub uas lawv muab ntawd nchuav ua ib lub kausmom yeebkoob, thiab muab rau Yehauxadas tus tub Yausuas, uas yog tus Tuam Povthawj Hlob ntoo. 12Koj qhia rau nws tias tus TSWV uas muaj Hwjchim Loj Kawg Nkaus hais tias, ‘Tus txivneej uas hu ua Tus Ceg, yuav vammeej nyob ntawm qhov chaw uas nws nyob thiab yuav rov txhimkho tus TSWV lub Tuamtsev.#Yelemi 23:5; 33:15; Xekhali 3:8 13Nws yog tus uas yuav ua tus TSWV lub Tuamtsev thiab txais lub meejmom ua tus vajntxwv, thiab nws yuav kav nws haivneeg. Yuav muaj ib tug povthawj hlob sawv ntawm nws lub zwmtxwv, ob lub meejmom ntawd yuav ua haujlwm sib haumxeeb thiab nyob kajsiab lug.’ 14Muab lub kausmom yeebkoob ntawd khaws cia rau hauv tus TSWV lub Tuamtsev ua lub cim nco txog Heledais,#6:14: Ib phau ntawv qub-qub thaum ub sau hais tias Heledais; phau lus Henplais hais tias Helees. Taunpiyas, Yedayas, thiab Yauxiyas.”#6:14: Ib phau ntawv qub-qub thaum ub sau hais tias Yauxiyas; phau lus Henplais hais tias Hees.
15Cov neeg uas nyob deb yuav tuaj pab txhimkho tus TSWV lub Tuamtsev. Thaum txhimkho tau lub Tuamtsev lawm, nej yuav paub tias tus TSWV uas muaj Hwjchim Loj Kawg Nkaus txib kuv tuaj cuag nej. Tej no yeej yuav tshwmsim yog tias nej mloog tus TSWV uas yog nej tus Vajtswv tej lus.
Currently Selected:
Xekhaliyas 6: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
