Titus 3

Cov Ntseeg Tus Cwjpwm

1Koj ncontsoov qhia kom cov ntseeg yuavtsum hwm tej nomtswv, mloog lawv lus, thiab npaj ua txhua yam uas zoo. 2Qhia kom lawv tsis txhob haislus phem rau ib leeg twg, tiamsis kom muaj kev sib haumxeeb thiab muaj kev phooj kev ywg, thiab coj tus cwjpwm uas mosmuag rau txhua leej txhua tus.

3Yav tas los peb yog neeg ruam, tsis mlooglus, thiab ua tej uas tsis zoo. Peb ua qhev rau kev phem kev qias thiab rau txhua yam kev lomzem. Peb ua neej nrog lub siabphem thiab lub siab khib; luag los ntxub yus, yus los ntxub luag. 4Tiamsis thaum Vajtswv uas yog peb tus Cawmseej, Nws qhia Nws txoj kev zoo thiab kev hlub rau peb, 5Vajtswv tau cawm kom peb dim, tsis yog vim ib yam zoo twg uas peb tau ua los, tiamsis yog vim Nws txoj kev tabncuab xwb. Vaj Ntsujplig tus Dawbhuv yog tus uas tau muab peb lub siab ntxuav dua tshiab thiab pub kom peb muaj dua lub neej tshiab. 6Vajtswv pub Vaj Ntsujplig tus Dawbhuv rau peb yam puvnpo los ntawm Yexus Khetos uas yog peb tus Cawmseej, 7kom los ntawm Nws txoj hmoovhlub ntawd, peb thiaj yuav dhau tau mus ua neeg ncajncees, thiab thiaj yuav tau txojsia ntev dhawv mus ibtxhis uas peb ciasiab rau. 8Tej lus no, yog lus tseeb.

Kuv xav kom koj qhia kom hnyav zog txog tej no, kom cov ntseeg Vajtswv thiaj yuav kubsiab siv lawv lub sijhawm los ua tej yam zoo, uas yog tej yam muaj qabhau thiab muajnqis rau txhua tus. 9Tiamsis koj yuavtsum zam tsis txhob nrog leejtwg sibcav txog tej zaj uas tsis muaj qabhau, sibcav txog cov yawgkoob tej npe uas muaj nyob hauv ntawv, thiab sibcav sibceg txog Mauxes tej kevcai. Tej ntawd siv tsis tau thiab tsis muaj qabhau dabtsi li. 10Tus uas pheej ua rau sawvdaws sibtawg ua pab ua pawg, koj yuavtsum ntuas nws kom txog ob zaug, dhau ntawd ces tsis txhob quavntsej nws li lawm. 11Koj twb paub meej lawm hais tias tus neeg uas ua li ntawd yog ib tug uas muaj lub siabphem thiab nyiam ua kev txhaum heev; nws yog tus uas rov rautxim rau nws tuskheej.

Tej Lus Qhia Thaum Kawg

12Yog thaum twg kuv txib Athemas lossis Tikhikus tuaj cuag koj lawm, ces koj ciali majnroos tuaj cuag kuv rau ntawm lub nroog Nikaupaulis, rauqhov kuv xav tias thaum txog lub caij ntuj no kuv yuav mus nyob rau ntawd. #Teshl 20:4; Efex 6:21-22; Kaulx 4:7-8; 2Tim 4:12 13Koj ua tibzoo pab xa Xenas uas yog tus hais plaubntug thiab Apaulaus nkawd mus, thiab ua tibzoo saib seb nkawd puas muaj txhua yam uas nkawd cheemtsum. #Teshl 18:24; 1Klt 16:12 14Peb cov neeg yuavtsum tau xyaum siv lub sijhawm los ua tej yam uas zoo, kom lawv thiaj yuav pab tau cov uas muaj kev tuncua; lawv yuavtsum tsis txhob ua lub neej uas tsis muaj qabhau.

15Txhua tus uas nrog kuv nyob ntawm no, lawv puavleej xa lus nojqab nyobzoo tuaj rau koj thiab. Thov koj hais peb tej lus nojqab nyobzoo rau cov ntseeg sawvdaws.

Thov kom Vajtswv txoj hmoovhlub nyob nrog nej txhua tus.

Currently Selected:

Titus 3: MWW2022

Highlight

Copy