Loos 11

Vajtswv Tabncuab Cov Yixalayees

1Ces kuv txawm nug hais tias: Puas yog Vajtswv twb tso Nws haivneeg tseg lawm? Yeej tsis tau muab tsotseg li! Kuv tuskheej twb yog ib tug neeg Yixalayees, yog Anplahas cajces thiab yog xeem Npeeyamees. #Filipi 3:5 2Vajtswv tsis tau muab Nws haivneeg uas thaum ub Nws twb xaiv tseg lawm tso povtseg ib zaug li. Nej tsis paub Vajtswv Txojlus qhov uas hais txog Eliyas thov Vajtswv rautxim rau cov Yixalayees lov? Eliyas hais tias, 3“Tus Tswv, lawv muab Koj cov xibhwb cev Vajtswv lus tua povtseg, thiab muab Koj tej thaj fij tsoo tawg tag huv tibsi; tsuas tshuav kuv tibleeg lawm xwb, tiamsis lawv tseem niajhnub nrhiav kev yuav muab kuv tua povtseg thiab.” #1Vaj 19:10, 14 4Vajtswv teb nws licas? Vajtswv hais tias, “Kuv twb tseg tau 7,000 leej uas yeej tsis tau txhoscaug pe Npa-as li cia ua Kuv tug lawm.” #1Vaj 19:18 5Ib yam nkaus li ntawd, nimno Vajtswv twb xaiv tau ib pab uas tsis coob heev tseg, uas yog xaiv los ntawm Nws txoj hmoovhlub. 6Nws xaiv lawv los ntawm Nws txoj hmoovhlub, tsis yog los ntawm lawv tes haujlwm. Yog Vajtswv xaiv rawsli neeg tes haujlwm, ces Nws txoj hmoovhlub tsis yog hmoovhlub lawm.

7Yog licas cov Yixalayees thiajli nrhiav tsis tau tej uas lawv nrhiav ntawd? Tsuas yog pab nyuag neeg tsawg-tsawg uas Vajtswv xaiv lawm thiaj nrhiav tau xwb; dua li lwm cov ces ua ntsejlag muagdig tsis hnov Vajtswv lub suab hu li. 8Rawsli Vajtswv Txojlus tau sau tseg hais tias, “Vajtswv ua rau lawv lub siab thiab lub tswvyim ruam lawm; lawv muaj qhovmuag, tiamsis lawv tsis pomkev, muaj pobntseg, tiamsis tsis hnov lus; lawv ua li ntawd los txog niajhnub no li.” #2Kev 29:4; Yaxaya 29:10 9Thiab Daviv hais tias:

“Thov kom lawv tej rooj noj rooj haus ua yej ua ntxiab mag lawv;

thov kom lawv ntog, thiab thov kom lawv raug txim! #Nnkauj 69:22-23 (LXX)

10Thov kom lawv tej qhovmuag dig, kom lawv tsis txhob pomkev;

thiab thov kom lawv tsa tsis taus taubhau mus ibtxhis li.”

11Yogli ntawd, kuv nug hais tias: Thaum cov Yudais dawm ntog, lawv twb raug kev puastsuaj lawm lov? Tsis yog li ntawd! Tiamsis vim qhov uas lawv tau ua txhaum, thiaj ua rau Lwm Haivneeg tau txais txoj kev cawmdim, cov Yudais thiaj khib heev. 12Cov Yudais txoj kev txhaum tau ua rau neeg ntiajteb tau txais koobhmoov nplua-mias, thiab lawv txoj kev pluag ntawm sab ntsujplig tau ua rau Lwm Haivneeg tau txais koobhmoov nplua-mias. Yogli ntawd, yog tseem xam tagnrho cov Yudais los ntxiv thiab, mas xyov qhov koobhmoov ntawd tseem yuav loj npaum licas diam!

Lwm Haivneeg Txoj Kev Dim Txim

13Zaumno kuv hais rau nej cov uas yog Lwm Haivneeg. Vim kuv yeej yog ib tug timthawj rau Lwm Haivneeg, kuv yuav muab tes haujlwm uas kuv ua saib tseemceeb. 14Tejzaum qhov no yuav ua rau kuv haivneeg khib, tiamsis yuav cawm tau lawv qeeleej dim. 15Rauqhov thaum Vajtswv tso cov Yudais tseg lawm, ciali ua rau neeg ntiajteb uas ua yeebncuab rau Vajtswv hloov los ua Nws li phoojywg lawm. Yogli ntawd, yog Vajtswv rov txais yuav cov Yudais rovqab los, lawv yuav zoo ib yam li cov neeg tuag uas sawv hauv qhovtuag rov los.

16Yog qhov nyuag ncuav uas muab ntais tawm ntawm thooj ncuav uas xub muab fij rau Vajtswv ntawd dawbhuv lawm, ces tagnrho lub ncuav ntawd yeej dawbhuv; thiab yog cov cag ntoo yeej dawbhuv lawm, ces cov ceg puavleej dawbhuv ib yam nkaus. 17Muaj qee ceg ntawm tsob txiv ntoo-roj nyeg twb raug muab txiav thiab twb muab ib ceg txiv ntoo-roj qus los txuas rau ntawm tsob txiv ntoo-roj nyeg lawm. Nej cov uas yog Lwm Haivneeg, nej zoo nkaus li ceg nyuag txiv ntoo-roj qus, uas nimno nej tau los koom nrog cov dej uas tsob txiv ntoo-roj nyeg tus cag, uas yog cov Yudais, rub los yug nej. 18Yogli ntawd, nej tsis txhob saib tsis taus cov ceg uas raug muab txiav povtseg ntawd. Nej yuav khavtheeb tau licas? Nej tsuas yog ib tug nyuag ceg xwb, nej twb tsis yug cov cag, tsuas yog cov cag thiaj yug nej xwb.

19Tiamsis koj yuav hais tias, “Cov ceg ntawd raug muab txiav povtseg kom thiaj tau chaw muab kuv txuas rau.” 20Yeej yog li ntawd ntag. Twb yog vim lawv tsis ntseeg, lawv thiaj raug muab txiav povtseg; qhov uas nej tseem txuas khovkho twb yog vim nej ntseeg. Tiamsis nej yuavtsum ceevfaj; nej tsis txhob khav hais tias nej tau los nyob lawv qhov chaw lawm. 21Yog Vajtswv twb muab cov Yudais uas zooli tej ceg txiv ntoo-roj nyeg txiav povtseg; nej xav tias Nws yuav tseg nej thiab no lov?

22Xav kom nej pom tias Vajtswv siabzoo npaum licas thiab Nws rautxim hnyav npaum licas: Nws rautxim hnyav rau cov neeg uas ua txhaum, tiamsis Nws ua lub siabzoo rau nej, yog tias nej rausiab ntso ua nej lub neej nyob rau hauv Nws lub siabzoo ntawd mus li. Tiamsis yog nej tsis ua li ntawd, nej yuav raug muab txiav povtseg thiab. 23Yog cov Yudais tso lawv txoj kev uas tsis ntseeg tseg, Vajtswv yuav muab lawv rov los txuas rau ntawm lawv qhov chaw; rauqhov Vajtswv yeej muaj hwjchim ua tau li ntawd. 24Nej cov uas yog Lwm Haivneeg, nej zoo nkaus li ceg nyuag txiv ntoo-roj qus uas twb raug muab txiav povtseg lawm tiamsis Vajtswv tau muab los txuas rau tsob txiv ntoo-roj nyeg lawm. Cov Yudais ces zoo ib yam li tsob txiv ntoo-roj nyeg ntawd ntag; yog Vajtswv yuav muab cov ceg uas twb raug muab txiav lawm coj rov los txuas rau ntawm nws yam ntoo mas tseem yuav yoojyim dua.

Vajtswv Txoj Kev Tabncuab Rau Txhua Tus

25Cov kwvtij, kuv xav kom nej paub txog ib txojlus tseeb uas tsis muaj neeg paub, kom nej thiaj yuav tsis khav hais tias nej ntse heev. Qhov ntawd yog li no: Cov Yixalayees tsuas tawv ncauj ib ntus xwb, yuav tsis yog tawv ncauj tas mus li. Lawv tsuas tawv mus txog thaum uas Lwm Haivneeg los puv tus lej rau ntawm Vajtswv xwb. 26Thaum ntawd, cov Yixalayees txhua tus yuav dim; rawsli Vajtswv Txojlus hais tias:

“Tus Cawmseej yuav los saum lub roob Xi-oos los;

thiab Nws yuav muab txhua yam kev txhaum ntawm Yakhauj li cajces tshem huvsi mus. #Yaxaya 59:20-21 (LXX)

27No yog Kuv cov lus cogtseg rau lawv,

thaum Kuv zam lawv tej kev txhaum lawm.” #Yaxaya 27:9 (LXX)

28Vim cov Yudais tsis kam lees txais yuav Txoj Moo Zoo, lawv thiajli ua Vajtswv li yeebncuab. Qhov ntawd, ua rau nej cov uas yog Lwm Haivneeg kuj tau los cuag Vajtswv; tiamsis Vajtswv suav hais tias lawv yog Nws cov phoojywg vim Nws twb xaiv lawv cov yawgkoob lawm. 29Rauqhov Vajtswv yeej tsis hloov siab rau tus uas Nws twb xaiv thiab foom koobhmoov rau lawm. 30Nej cov uas yog Lwm Haivneeg, thaum ub nej yeej tsis mloog Vajtswv lus thiab, tiamsis nimno nej tau txais Vajtswv txoj kev tabncuab vim cov Yudais tsis mloog Vajtswv lus. 31Tibyam nkaus li ntawd, vim nej tau txais Vajtswv txoj kev tabncuab lawm, nimno cov Yudais thiaj tsis mloog Vajtswv lus, kom nimno#11:31: Tej phau ntawv qub uas xuas tes sau, tsis muaj nimno. lawv thiaj yuav tau txais Vajtswv txoj kev tabncuab ib yam li nej thiab. 32Vajtswv ua rau txhua tus zooli cov neeg raug kaw vim lawv tsis mloog Nws lus, kom Nws thiaj tabncuab tau lawv txhua tus.

Qhuas Vajtswv

33Vajtswv txoj kev npluanuj mas ntau tiag-tiag li! Nws tej tswvyim thiab kev txawjntse mas tob tiag-tiag li! Leejtwg thiaj yuav paub piav txog Nws txoj kev txiavtxim siab? Leejtwg thiaj yuav totaub txog tej uas Nws ua? #Yaxaya 55:8 34Rawsli Vajtswv Txojlus hais tias,

“Leejtwg twb paub txog tus Tswv lub siab lawm?

Leejtwg twb pab tswvyim rau tus Tswv lawm? #Yaxaya 40:13 (LXX)

35Leejtwg tau muab ib yam dabtsi rau Vajtswv lawm,

es Vajtswv yuavtsum tau pauj rovqab rau nws?” #Yauj 41:11

36Rauqhov txhua yam yog Nws tsim, txhua yam yog los ntawm Nws los, thiab txhua yam yog tsim los rau Nws. Thov kom Vajtswv tau koobmeej mus ibtxhis li! Amees. #1Klt 8:6

Currently Selected:

Loos 11: MWW2022

Highlight

Copy