Tshwmsim 17

Tus Niamntiav Uas Nto Moo

1Tomqab ntawd ib tug timtswv ceebtsheej ntawm xya tus uas nqa xya lub tais txawm los hais rau kuv tias, “Koj ciali nrog kuv mus, kuv yuav coj koj mus saib tus niamntiav nto moo, uas yog lub nroog loj uas nyob ze rau ntawm ntau tus dej, seb nws yuav raug txim licas. #Yelemi 51:13 2Tej vajntxwv uas nyob hauv ntiajteb no puavleej nrog tus niamntiav ntawd ua nkauj ua nraug, thiab tej neeg ntiajteb tau qaugcawv vim lawv haus tus pojniam ntawd cov cawv txivhmab uas yog nws txoj kev ua phem ua qias.” #Yaxaya 23:17; Yelemi 51:7

3Ces tus timtswv ceebtsheej ntawd txawm coj kuv ntawm sab Ntsujplig mus rau tom tiaj suabpuam. Thaum mus txog tod, kuv txawm pom ib tug pojniam caij ib tug tsiaj nyaum liabploog uas muaj ntau lub npe txobthuam Vajtswv, sau thoobplaws tus tsiaj ntawd lub cev; nws muaj xya lub taubhau thiab kaum tus kub. #Tshwm 13:1 4Tus pojniam ntawd hnav ib ce tsoostsho tsamxem thiab liabploog. Nws coj saw kub, coj tej qe zeb ci-ci uas muajnqis, thiab coj tej hlaws thoobplaws ib ce. Nws txhais tes tuav rawv ib lub tais kub uas ntim puvnkaus tej kev phem kev qias uas yog los ntawm nws tej kev nkauj kev nraug. #Yelemi 51:7

5Muaj ib lub npe sau rau ntawm tus pojniam ntawd lub hauvpliaj uas muaj lub ntsiablus tob-tob hais tias, “Tuamceeb nroog Npanpiloos, yog cov niamntiav thiab tej neeg ntiajteb uas ua phem ua qias leejniam.” 6Thiab kuv pom tus pojniam ntawd twb qaug zujzis rau kev haus Vajtswv cov neeg cov ntshav thiab cov neeg uas raug luag tua cov ntshav lawm, cov neeg ntawd yog cov uas ua timkhawv txog Yexus.

Thaum kuv pom tus pojniam ntawd, kuv xav tsis thoob li. 7Tus timtswv nug kuv hais tias, “Ua licas koj thiaj xav tsis thoob? Kuv mamli qhia txog tus pojniam ntawd thiab tus tsiaj nyaum uas muaj xya lub taubhau thiab kaum tus kub uas tus pojniam ntawd caij lub ntsiab uas tsis muaj leejtwg paub li rau koj paub. 8Tus tsiaj nyaum uas koj pom ntawd, yav tas los nws muaj sia, tiamsis nimno nws tsis muaj sia lawm; nws yuav tawm hauv lub qhov tob-tob los, thiab nws yuav mus raug kev puastsuaj. Tej neeg ntiajteb uas lawv lub npe tsis tau muab sau uantej thaum tsis tau tsim ntuj tsim teb rau hauv phau ntawv uas muaj txojsia, thaum lawv pom tus tsiaj nyaum ntawd, lawv yuav xav tsis thoob li, rauqhov yav tas los tus tsiaj ntawd muaj sia, tiamsis nimno nws tsis muaj sia lawm, nws tseem yuav rov tshwm los thiab. #Dani 7:7; Tshwm 11:7; Nnkauj 69:28

9“Qhov no yuavtsum siv lub hlwb uas muaj kev txawjntse. Xya lub taubhau yog xya lub povroob uas tus pojniam ntawd zaum. Xya lub povroob ntawd yog xya tus vajntxwv: 10tsib tug tuag lawm, tshuav ib tug tseem kav tebchaws, thiab muaj dua ib tug tseem tsis tau los; tiamsis thaum nws los lawm, nws tsuas yog yuav kav ib ntus xwb. 11Tus tsiaj nyaum uas yav tas los muaj sia, tiamsis nimno tsis muaj sia lawm, nws yog tus vajntxwv thib yim uas nrog xya tus vajntxwv ntawd ua ib pab, thiab nws yuav mus raug kev puastsuaj.

12“Kaum tus kub uas koj pom ntawd yog kaum tus vajntxwv uas tseem tsis tau los ua vajntxwv, tiamsis lawv yuav tau txais lub hwjchim los tswj ib yam li vajntxwv, uas yog yuav nrog tus tsiaj nyaum ntawd kav li ib txoosteev. #Dani 7:24 13Kaum tus vajntxwv ntawd puavleej muaj tiblub homphiaj xwb, thiab lawv muab lawv tej hwjchim tso rau tus tsiaj nyaum ntawd. 14Lawv yuav tawmtsam tus Menyuam Yaj, tiamsis tus Menyuam Yaj, nrog rau cov uas Nws tau hu los, cov uas Nws tau xaiv los, thiab cov uas ncajncees rau Nws, yuav kovyeej lawv cov ntawd, rauqhov tus Menyuam Yaj yog tus Tswv ntawm txhua tus tswv thiab yog tus Vajntxwv ntawm txhua tus vajntxwv.”

15Tus timtswv ceebtsheej hais rau kuv ntxiv hais tias, “Cov dej uas koj pom tus niamntiav ntawd zaum rawv saud, yog txhua pab neeg, txhua xeem neeg, thiab txhua haivneeg tsis hais cov uas hais yam lus twg huv tibsi. 16Kaum tus kub thiab tus tsiaj uas koj pom puavleej yuav ntxub tus niamntiav ntawd. Lawv yuav txeeb txhua yam uas nws muaj huv tibsi mus, thiab cia nws nyob liabqab; lawv yuav noj nws cev nqaij thiab muab hluavtaws hlawv nws povtseg. 17Rauqhov Vajtswv tau tshoov lawv lub siab kom lawv ua rawsli Nws lub homphiaj, los ntawm qhov uas lawv koom ua ib lub siab muab lawv tej hwjchim rau tus tsiaj nyaum ntawd kav mus txog thaum uas muaj tiav rawsli Vajtswv tej lus tau hais tseg lawm.

18“Tus niamntiav uas koj pom ntawd yog lub tuamceeb nroog uas kav tej vajntxwv uas nyob hauv ntiajteb no.”

Currently Selected:

Tshwmsim 17: MWW2022

Highlight

Copy