Teev Npe 30
30
Kevcai Coglus
1Mauxes qhia rau cov thawjcoj ntawm txhua xeem Yixalayees hais tias: 2“Thaum ib tug neeg twg coglus yuav muab ib yam dabtsi rau tus TSWV lossis coglus yuav caiv ib yam dabtsi lawm, nws yuavtsum tsis txhob thim nws tej lus cogtseg ntawd, tiamsis nws yuavtsum ua txhua yam rawsli nws tau coglus lawm. #2Kev 23:21-23; Math 5:33
3“Thaum ib tug ntxhais hluas uas tseem nyob hauv nws txiv lub tsev, tau coglus yuav muab ib yam dabtsi rau tus TSWV lossis coglus yuav caiv ib yam dabtsi lawm, 4yog nws txiv hnov tej lus cogtseg ntawd tiamsis nws txiv tsis txwv tej lus cogtseg ntawd, ces nws yuavtsum ua txhua yam rawsli nws tau coglus tseg lawm. 5Tiamsis yog nws txiv hnov tej lus cogtseg ntawd thiab txwv tsis pub nws ua, ces tsis tas nws yuav ua rawsli nws tej lus cogtseg ntawd. Tus TSWV yeej yuav zamtxim rau nws, rauqhov nws txiv txwv tsis pub nws ua.
6“Yog nws tsis tau yuav txiv tiamsis nws tau coglus tseg lawm, txawm yog nws tsis ua tibzoo xav lossis tsis ceevfaj los xij, lossis nws coglus yuav caiv ib yam dabtsi lawm, tomqab ntawd nws ho yuav txiv, 7yog nws tus txiv hnov nws tej lus cogtseg ntawd thiab tsis txwv nws, ces nws yuavtsum tau ua txhua yam rawsli nws tau coglus tseg lawm. 8Tiamsis yog nws tus txiv hnov tej lus cogtseg ntawd thiab txwv tsis pub nws ua, ces tsis tas nws yuav ua rawsli nws tej lus cogtseg ntawd lawm. Tus TSWV yeej yuav zamtxim rau nws.
9“Ib tug pojntsuam lossis ib tug pojnrauj twg, yog nws tau coglus tseg licas lawm, nws yuav tau ua txhua yam rawsli nws tau coglus tseg lawm; yog nws coglus yuav caiv ib yam dabtsi lawm, los nws yuavtsum tau ua rawsli ntawd.
10“Yog tus pojniam uas twb muaj txiv lawm, tau coglus tseg lossis coglus yuav caiv ib yam dabtsi lawm, 11yog nws tus txiv hnov nws tej lus cogtseg ntawd thiab tsis txwv nws, ces nws yuavtsum ua txhua yam rawsli nws tau coglus tseg lawm. 12Tiamsis yog nws tus txiv hnov tej lus cogtseg ntawd thiab txwv tsis pub nws ua, ces tsis tas nws yuav ua li nws tej lus cogtseg ntawd lawm. Tus TSWV yeej yuav zamtxim rau nws, rauqhov nws tus txiv txwv tsis pub nws ua. 13Nws tus txiv muaj cai pomzoo lossis tsis pomzoo rau tej uas nws tau coglus tseg ntawd. 14Tiamsis yog tias hnub uas tus txiv hnov tej lus cogtseg ntawd thiab tsis txwv nws, ces nws yuavtsum tau ua txhua yam rawsli nws tau coglus tseg lawm. Vim tus txiv yeej pomzoo thiab yeej tsis txwv txij hnub uas nws hnov los lawm. 15Tiamsis yog tias tomqab ntawd tus txiv ho tsis pomzoo rawsli nws tus pojniam tej lus cogtseg uas nws tau hnov ntawd, nws yuav tau ris nws tus pojniam lub txim, vim nws tus pojniam tsis tau ua rawsli tau coglus tseg lawm kom tiav.”
16Nov yog tej kevcai uas tus TSWV muab cob rau Mauxes, hais txog tej lus cogtseg ntawm tej ntxhais hluas uas tseem nyob hauv nws txiv lub tsev lossis tus pojniam uas twb muaj txiv lawm.
Currently Selected:
Teev Npe 30: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
