Teev Npe 25

Cov Yixalayees Nyob Ntawm Pe-aus

1Thaum cov Yixalayees tseem nyob ntawm lub Hav Akaxias, cov txivneej txawm mus deev cov pojniam uas yog neeg Mau-am uas yeej ibtxwm nyob rau ntawd. 2Cov pojniam ntawd txawm yaum cov txivneej nrog lawv mus ua kevcai fij khoom ntawm qhov chaw uas pe cov Mau-am tej nyuag vajtswv. Cov Yixalayees txawm mus noj tej zaub-mov uas fij ntawd thiab pe cov Mau-am tej nyuag vajtswv 3uas yog Pe-aus tus mlom Npa-as. Yogli ntawd, tus TSWV thiaj chim heev rau cov Yixalayees. 4Tus TSWV hais rau Mauxes tias, “Ntes tagnrho cov Yixalayees cov thawjcoj, coj mus tua thaum nruabhnub nrig#25:4: nruabhnub nrig; lossis rau sawvdaws ntsia. tabmeeg tus TSWV, mas Kuv thiaj yuav tsis chim rau cov Yixalayees.” 5Mauxes thiaj hais rau cov nomtswv tias, “Nej nyias yuavtsum muab txhua tus neeg hauv nyias xeem uas mus pe Pe-aus tus mlom Npa-as tua povtseg.”

6Muaj ib tug txivneej Yixalayees tau coj ib tug pojniam Midias los hauv nws tsev tabmeeg Mauxes thiab cov pejxeem, thaum lub sijhawm uas lawv tseem tabtom quaj ntsoogqees ntawm lub qhovrooj uas mus rau hauv lub Tsevntaub Sibntsib. 7Thaum Ele-axas tus tub Finehas uas yog povthawj hlob Aloos tus xeebntxwv pom li ntawd, nws txawm sawvtsees ntawm cov neeg ntawd mus. Nws mus nqa tau ib rab hmuv 8raws tus txivneej thiab tus pojniam ntawd qab mus rau hauv lub tsevntaub, thiab xuas rab hmuv ntawd nkaug nkawd tshab plaws. Yogli ntawd, tej vijsub vijsw uas tabtom raug cov Yixalayees thiaj tu lawm, 9tiamsis cov neeg uas raug tua tuag twb muaj 24,000 leej lawm.

10Tus TSWV hais rau Mauxes tias, 11“Vim Ele-axas tus tub Finehas, uas yog tus povthawj hlob Aloos tus xeebntxwv, tau ua tej no tiav, Kuv thiaj tsis chim rau cov Yixalayees lawm. Vim nws tiv tsis taus qhov uas cov Yixalayees mus pehawm lwmtus tej nyuag vajtswv, thiab xav kom tsuas pehawm Kuv xwb, vimli ntawd, txawm Kuv chim npaumtwg los Kuv thiaj tsis ua kom lawv puastsuaj. 12Koj ciali mus qhia rau nws hais tias Kuv coglus yuav muaj kev thajyeeb nrog nws ib tiam rau ib tiam mus li. 13Nws thiab nws cajces yuav tau ua cov povthawj hlob mus ibtxhis rawsli Kuv tau coglus tseg lawm, vim nws mobsiab txog nws tus Vajtswv, thiab tau ua kom muaj kev zamtxim los rau haivneeg Yixalayees.”

14Tus txivneej Yixalayees uas raug tua tuag nrog tus pojniam Midias ntawd hu ua Xilis, nws yog Xalus tus tub uas yog xeem Xime-oos tus thawjcoj ntag. 15Tus pojniam hu ua Kauxenpis. Nws yog Xawj uas yog cov Midias tus thawjcoj tus ntxhais.

16Ces tus TSWV hais rau Mauxes tias, 17“Ciali mus uarog rau cov Midias thiab tua kom lawv puastsuaj mus, 18vim tej kev phem kev qias uas lawv ua rau nej thaum lawv dag-ntxias nej ntawm Pe-aus, thiab vim Kauxenpis tus uas tau raug tua tuag rau lub sijhawm uas tabtom muaj tej vijsub vijsw nyob ntawm Pe-aus.”

Currently Selected:

Teev Npe 25: MWW2022

Highlight

Copy