Teev Npe 23
23
Npala-as Cevlus Thawjzaug
1Npala-as hais rau Npalaj tias, “Koj ciali teeb xya lub thaj rau kuv ntawm no, thiab muab xya tus txiv nyuj thiab xya tus laug yaj los rau kuv.”
2Npalaj thiaj ua rawsli Npala-as hais. Ib lub thaj twg Npalaj thiab Npala-as nkawd tua ib tug nyuj thiab ib tug laug yaj hlawv fij rau saud. 3Ces Npala-as hais rau Npalaj tias, “Koj nyob ntawm koj cov khoom fij no, kuv yuav mus rau tod seb tus TSWV puas los ntsib kuv. Yog Nws qhia dabtsi rau kuv, kuv mam qhia rau koj.” Yogli ntawd, Npala-as thiaj nce ib leeg mus rau saum ib lub ncov roob, 4ces Vajtswv txawm los cuag nws. Npala-as hais rau Vajtswv tias, “Kuv teeb tau xya lub thaj thiab tua nyuj tua yaj fij tso rau saum xya lub thaj ntawd ib lub ib tug nyuj thiab ib tug yaj.”
5Tus TSWV txawm cevlus rau hauv Npala-as qhovncauj kom nws coj tej lus ntawd rov los hais rau Npalaj. 6Npala-as rov los, nws los pom Npalaj thiab cov Mau-am tej thawjcoj sawv ntawm qhov chaw uas hlawv tej khoom fij ntawd.
7Ces Npala-as txawm cevlus qhiatshwm hais tias:
“Cov Mau-am tus vajntxwv Npalaj tau tos kuv
pem tebchaws Xilias, uas nyob pem cov roob sab hnubtuaj tuaj.
Nws hais tias, ‘Koj tuaj foom phem rau Yakhauj pub rau kuv,
Tuaj rautxim rau cov Yixalayees.’
8Kuv yuav ua licas foom phem rau cov neeg uas Vajtswv twb tsis tau foom phem rau?
Kuv yuav ua licas rautxim rau cov neeg uas tus TSWV twb tsis tau rautxim rau?
9Kuv tuaj saum hauv tsua uas siab ces kuv muaj peevxwm pom lawv;
Kuv muaj peevxwm tuaj saum ncov roob ntsiantsoov lawv.
Lawv yog ib haivneeg uas nyob twmzeej;
Lawv tsis suav hais tias lawv nrog lwm haivneeg koom ua ib pab.
10Yixalayees cajces yuav coob zooli tej hmoov av— leejtwg yuav suav tau?
Leejtwg yuav suav tau ib feem plaub hauv lawv?
Thov kom kuv tuag li ib tug neeg ncajncees tuag;
Thov kom kuv xaus kuv lub neej li lawv lub!”
11Npalaj hais rau Npala-as tias, “Uacas koj ua li ko rau kuv? Kuv coj koj tuaj, yog kom koj tuaj foom phem rau kuv cov yeebncuab, tiamsis koj ho tuaj foom koobhmoov rau lawv xwb!”
12Npala-as teb tias, “Kuv tsuas hais tau tej uas tus TSWV muab tso rau hauv kuv lub qhovncauj xwb.”
Npala-as Cevlus Zaum Thib Ob
13Ces Npalaj txawm hais rau Npala-as tias, “Koj ciali nrog kuv mus rau lwmqhov chaw uas ua rau koj pom cov Yixalayees ibtxhia thiab. Nyob rau qhov chaw ntawd, koj ciali foom phem rau lawv pub rau kuv.” 14Npalaj coj Npala-as mus rau pem Xaufees thaj teb uas nyob saum Roob Pixenkas. Thaum mus txog saud, Npalaj teeb tau xya lub thaj thiab ib lub thaj twg tua ib tug heev nyuj thiab ib tug laug yaj hlawv fij rau saud.
15Npala-as hais rau Npalaj tias, “Koj ciali sawv ntawm koj cov khoom fij uas hlawv nyob rau ntawm no, kuv yuav mus cuag Vajtswv lawm tid.”
16Tus TSWV tau los cuag Npala-as thiab qhia tej uas Npala-as yuav mus hais rau Npalaj, ces Nws txawm hais kom Npala-as rov mus hais tej lus ntawd. 17Npala-as rov los pom Npalaj tseem sawv nrog cov Mau-am tej thawjcoj ntawm qhov chaw uas hlawv nws cov khoom fij ntawd. Npalaj nug seb tus TSWV hais licas, 18ces Npala-as txawm cevlus qhiatshwm hais tias:
“Npalaj, uas yog Xipaus tus tub, koj ciali sawv,
Thiab mloog tej lus uas kuv yuav hais.
19Vajtswv tsis zooli tej neeg uas pheej haislus dag.
Nws tsis zooli noobneej uas pheej yuav hloov siab.
Nws coglus licas, Nws yeej ua li ntawd;
Nws hais licas, ces yeej muaj rawsli ntawd.
20Kuv tau txais lolus xaaj kom foom koobhmoov,
Thaum Vajtswv foom koobhmoov lawm,
Kuv tsis muaj cuabkav yuav thim tau tej lus ntawd rovqab.
21Kuv twb pom uantej lawm hais tias cov Yixalayees lub neej yav tomntej
Yuav tsis raug teebmeem lossis kev txomnyem ib zaug li.
Tus TSWV uas yog lawv tus Vajtswv, yeej nrognraim lawv;
Lawv qw hais tias Nws yog lawv tus Vajntxwv.
22Vajtswv coj lawv tawm hauv tebchaws Iziv los;
Nws pab lawv ntaus rog ib yam li tus phaw nyuj qus.
23Yeej tsis muaj tej yeessiv thiab tej khawvkoob twg,
Uas yuav muaj cuabkav siv tawmtsam haivneeg Yixalayees.#23:23: Yeej tsis muaj … Yixalayees; lossis Yeej tsis muaj kev ua yeessiv nyob rau hauv Yixalayees, thiab tsis muaj kev ua khawvkoob nyob rau ntawd.
Nimno tej neeg yuav hais txog cov Yixalayees hais tias,
‘Saib tej uas Vajtswv tau ua rau cov Yixalayees seb!’
24Haivneeg Yixalayees zoo ib yam li tus tsov ntxhuav uas muajzog heev:
Nws yeej tsis so mus txog thaum nws muab tej uas nws tom tau noj
Thiab haus ntshav kom tag tso.”
25Ces Npalaj hais rau Npala-as tias, “Yog koj tsis kam foom phem rau cov Yixalayees, mas koj yuavtsum tsis txhob foom koobhmoov rau lawv li thiab!”
26Npala-as teb tias, “Kuv tsis tau qhia rau koj lov, hais tias kuv tsuas ua tau tej uas tus TSWV kom kuv ua xwb?”
Npala-as Cevlus Zaum Thib Peb
27Npalaj hais tias, “Koj ciali nrog kuv mus, kuv yuav coj koj mus rau lwmqhov chaw ntxiv thiab. Tejzaum Vajtswv yuav kam koj foom phem rau lawv nyob rau qhov chaw ntawd.” 28Yogli ntawd, Npalaj thiaj coj Npala-as mus rau saum lub ncov Roob Pe-aus uas ntsiantsoov pom rau tim tiaj suabpuam. 29Npala-as hais rau Npalaj tias, “Koj ciali teeb xya lub thaj rau kuv nyob rau ntawm no, thiab muab xya tus heev nyuj thiab xya tus laug yaj los rau kuv.” 30Npalaj ua rawsli Npala-as hais; ib lub thaj twg fij ib tug heev nyuj thiab ib tug laug yaj rau saud.
Currently Selected:
Teev Npe 23: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
