Malakaus 10
10
Yexus Qhia Txog Kev Sibnrauj
(Mathais 19:1-12; Lukas 16:18)
1Yexus tawm hauv lub nroog ntawd mus rau nram xeev Yudas, thiab hla tus dej Yauladees mus rau sab tim ub. Muaj neeg coob-coob rov tuaj cuag Yexus dua, Nws kuj qhia lawv ib yam li Nws txeev qhia los.
2Muaj cov Falixais qeeleej tuaj cuag Yexus, thiab xav sim Nws. Lawv thom Yexus hais tias, “Peb txoj Kevcai puas pub ib tug txivneej nrauj nws tus pojniam?”
3Yexus teb lawv hais tias, “Mauxes tau hais tseg licas rau nej?”
4Lawv teb tias, “Mauxes yeej tsocai rau tus txiv ua ib tsab ntawv sibnrauj thiab muab nws tus pojniam xa mus.” #2Kev 24:1-4; Math 5:31
5Yexus hais rau lawv tias, “Qhov uas Mauxes sau txojcai no rau nej, twb yog vim nej lub siab tawv dhau. 6Tiamsis thaum chivkeeb uas Vajtswv tsim lub ntiajteb, rawsli Vajtswv Txojlus sau tseg hais tias, ‘Vajtswv tsim tus txiv thiab tus pojniam.’ #Chiv 1:27; 5:2 7‘Twb yog vimli no tus txivneej thiaj tso nws niam nws txiv tseg, thiab mus nrog nws tus pojniam tsheejxeeb uake,#10:7: Tej phau ntawv qub uas xuas tes sau tsis muaj mus nrog nws tus pojniam tsheejxeeb uake. 8thiab nkawd yuav koom ua ib lub cev.’ Nkawd tsis yog ob leeg, tiamsis yog ib leeg lawm xwb. #Chiv 2:24 9Yogli ntawd, yam uas Vajtswv tau muab lo tsheejxeeb uake lawm, neeg tsis txhob muab cais.”
10Thaum lawv mus rau hauv tsev lawm, cov thwjtim txawm rov nug Yexus txog zaj no. 11Yexus hais rau lawv tias, “Yog leejtwg muab nws tus pojniam nrauj thiab mus yuav dua ib tug pojniam, ces yog nws ua kev nkauj kev nraug txhaum nws tus pojniam lawm. 12Ib yam nkaus li ntawd, tus pojniam twg uas muab nws tus txiv nrauj thiab mus yuav dua ib tug txiv, kuj yog nws ua kev nkauj kev nraug thiab.” #Math 5:32; 1Klt 7:10-11
Yexus Foom Koobhmoov Rau Cov Menyuam Yaus
(Mathais 19:13-15; Lukas 18:15-17)
13Muaj neeg coj lawv tej menyuam tuaj cuag Yexus thiab thov Nws cev tes plhws cov menyuam, tiamsis cov thwjtim cem cov neeg ntawd. 14Thaum Yexus pom ua li ntawd, Nws tsis txaussiab, Nws thiaj hais rau cov thwjtim tias, “Cia cov menyuam yaus los cuag Kuv, tsis txhob tav lawv, rauqhov Vajtswv lub Tebchaws yog cov uas zooli cov menyuam yaus no tug. 15Kuv qhia tseeb rau nej hais tias, yog leejtwg uas tsis txais yuav Vajtswv lub Tebchaws zoo ib yam li cov menyuam yaus no, ces tus ntawd yuav nkag mus tsis tau rau hauv hlo li.” #Math 18:3 16Ces Yexus txawm puag cov menyuam yaus ntawd rau hauv Nws xubntiag, Nws cev tes plhws txhua tus thiab foom koobhmoov rau lawv.
Tus Txivneej Npluanuj
(Mathais 19:16-30; Lukas 18:18-30)
17Thaum Yexus tabtom sawvkev mus, muaj ib tug txivneej khiav los txhoscaug ntua ntawm Nws thiab nug hais tias, “Xibhwb tus uas zoo, kuv yuav ua licas es kuv thiaj tau txojsia ntev dhawv mus ibtxhis?”
18Yexus teb nws hais tias, “Vim licas koj hu Kuv hais tias tus uas zoo? Tsis muaj leejtwg zoo, tsuas yog Vajtswv tibleeg xwb. 19Koj yeej paub tej kevcai uas hais tias: ‘Tsis txhob tua neeg; tsis txhob deev luag pojniam luag txiv; tsis txhob ua tubsab; tsis txhob ua timkhawv tsis tseeb; tsis txhob ntxo luag tus; thiab hwm koj niam koj txiv.’ ” #Khiav 20:13; 2Kev 5:17; Khiav 20:14; 2Kev 5:18; Khiav 20:15; 2Kev 5:19; Khiav 20:16; 2Kev 5:20; Khiav 20:12; 2Kev 5:16
20Tus txivneej ntawd teb tias, “Xibhwb, txhua nqe ko, kuv twb coj thaum kuv tseem yau los lawm.”
21Yexus tsa qhovmuag saib nws thiab hlub nws heev, Yexus thiaj hais tias, “Tshuav ib qho uas koj tseem tuncua. Koj rov mus muab txhua yam uas koj muaj muag huv tibsi, thiab muab cov nyiaj ntawd mus pub rau cov neeg pluag, koj thiaj yuav npluanuj nyob saum ntuj ceebtsheej. Tomqab ntawd koj ciali los nrog Kuv mus.” 22Thaum tus txivneej hnov li ntawd, nws ntsejmuag ntshaus ntsho, nws txawm tawm mus thiab nws nyuajsiab kawg li, vim nws npluanuj heev.
23Yexus tig los saib Nws cov thwjtim thiab hais rau lawv tias, “Qhov uas cov neeg npluanuj yuav nkag tau mus rau Vajtswv lub Tebchaws mas nyuaj kawg li!”
24Cov thwjtim txawm xav tsis thoob txog cov lus ntawd, tiamsis Yexus hais ntxiv tias, “Cov menyuam, qhov uas neeg yuav nkag tau mus rau Vajtswv lub Tebchaws mas nyuaj kawg li! 25Ib tug ntxhuav nkag lub qhov koob tseem yoojyim dua li ib tug neeg npluanuj nkag mus rau hauv Vajtswv lub Tebchaws.”
26Cov thwjtim hnov li ntawd, lawv xav tsis thoob li. Lawv sibnug zomzaws tias, “Yogli ntawd, leejtwg thiaj yuav dim tau?”
27Yexus ntsia cov thwjtim thiab hais tias, “Yam no mas neeg ua tsis tau tiamsis Vajtswv ua tau; rauqhov Vajtswv ua tau txhua yam huv tibsi.”
28Ces Petus txawm hais rau Yexus tias, “Saib maj, peb twb tso txhua yam tseg thiab nrog Koj mus lawm.”
29Yexus hais rau lawv tias, “Kuv qhia tseeb rau nej tias tus uas tso vaj tso tsev, tso kwv tso tij, tso nkauj tso muam, tso niam tso txiv, lossis tso menyuam, thiab tso liaj-teb tseg vim Kuv thiab Txoj Moo Zoo, 30nws yuav tau txais ntau npaug nyob rau tiam no. Nws yuav tau txais ibpuas npaug ntxiv, xwsli: vajtse, kwvtij, nkaujmuam, niam, menyuam, liaj-teb, thiab tseem raug kev tsimtxom tibyam nkaus; thiab tiam tomntej nws yuav tau txojsia ntev dhawv mus ibtxhis. 31Tiamsis muaj ntau tus uas nimno nyob tom hauvntej yuav tau mus nyob tom tw, thiab ntau tus uas nyob tom tw yuav tau mus nyob tom hauvntej.” #Math 20:16; Lukas 13:30
Zaum Thib Peb Uas Yexus Hais Txog Nws Kev Tuag
(Mathais 20:17-19; Lukas 18:31-34)
32Thaum lawv tabtom taug kev mus rau saum lub nroog Yeluxalees, Yexus txawm ciali ua cov thwjtim ntej, ua rau lawv xav tsis thoob, thiab cov neeg uas lawv qab ntshai kawg li. Yexus txawm rov coj cov thwjtim mus rau ibcag thiab qhia tej xwm uas yuav los raug Nws rau lawv mloog. 33Yexus hais tias, “Ua tibzoo mloog nawb, peb yuav mus rau saum lub nroog Yeluxalees. Yuav muaj neeg ntes Neeg Leejtub coj mus rau cov thawj povthawj hlob thiab cov xibhwb uas qhia Kevcai. Lawv yuav txiavtxim tuag rau Nws thiab muab Nws cob rau Lwm Haivneeg, 34lawv yuav ua saib tsis taus Nws, nto qaubncaug rau Nws, nplawm Nws, thiab muab Nws tua; tiamsis hnub thib peb Nws yuav ciajsia sawv rov los.”
Yakaunpaus Thiab Yauhas Tej Lus Thov
(Mathais 20:20-28)
35Thaum ntawd, Yakaunpaus thiab Yauhas uas yog Xenpedais ob tug tub txav los rau ntawm Yexus thiab hais tias, “Xibhwb, thov Koj pub yam uas wb xav tau rau wb.”
36Yexus nug nkawd hais tias, “Neb xav tau dabtsi?”
37Nkawd teb tias, “Thaum Koj ua vajntxwv zaum saum Koj lub zwmtxwv uas ci ntsa-iab, wb xav kom Koj cia wb nrog Koj zaum; ib tug nyob ntawm Koj sab xis thiab ib tug nyob ntawm Koj sab laug.”
38Yexus hais rau nkawd tias, “Neb tsis paub txog yam uas neb tabtom thov no. Neb puas haus taus lub khob iab khob daw uas Kuv yuavtsum haus? Neb puas raus taus txoj kevcai rausdej uas Kuv yuavtsum raus?” #Lukas 12:50
39Nkawd teb tias, “Wb haus taus.”
Yexus hais rau nkawd tias, “Lub khob uas Kuv haus, neb yeej yuav haus taus, thiab txoj kevcai rausdej uas Kuv raus, neb yeej yuav raus taus. 40Tiamsis qhov uas leejtwg yuav zaum ntawm Kuv sab xis thiab sab laug ntawd, Kuv tsis muaj cai uas yuav muab rau neb. Vajtswv yog tus yuav muab cov chaw no rau cov uas Nws twb npaj tseg rau lawm xwb.”
41Thaum kaum leej thwjtim i hnov li ntawd, lawv chim heev rau Yakaunpaus thiab Yauhas. 42Yexus thiaj hu cov thwjtim txhua tus los uake thiab hais rau lawv hais tias, “Nej twb paub tias cov uas suav hais tias lawv yog nomtswv saib Lwm Haivneeg, lawv muaj hwjchim kav tej pejxeem ntawd, thiab cov thawjcoj ntawd yeej siv hwjchim quabyuam tej pejxeem. 43Tiamsis ntawm nej tsis yog li ntawd. Yog nej leejtwg xav ua tus loj, nws yuavtsum ua sawvdaws tus tubtxib, #Lukas 22:25-26 44thiab yog nej leejtwg xav ua tus thawj, nws yuavtsum ua sawvdaws tus qhev. #Math 23:11; Malak 9:35; Lukas 22:26 45Txawm yog Neeg Leejtub los Nws tsis tau los kom leejtwg tu Nws, tiamsis Nws los tu sawvdaws, thiab muab Nws txojsia los txhiv ntau leej neeg.”
Yexus Kho Npatimes Uas Digmuag Rov Pomkev
(Mathais 20:29-34; Lukas 18:35-43)
46Tomqab ntawd lawv tuaj txog hauv lub nroog Yelikaus. Thaum Yexus thiab Nws cov thwjtim tabtom taug kev tawm hauv lub nroog ntawd, muaj neeg coob-coob nrog lawv mus, muaj ib tug txivneej digmuag hu ua Npatimes nyob ntawm ntug kev thovkhawv, nws yog Time-us tus tub. 47Thaum nws hnov tias, Yexus uas yog neeg Naxalev tuaj, ces nws txawm qw nrov-nrov hais tias, “Yexus, Daviv tus Tub, thov Koj tabncuab kuv lau!”
48Muaj ntau leej cem thiab cheem kom nws nyob twjywm, tiamsis nws yimhuab qw nrov hais tias, “Daviv tus Tub, thov Koj tabncuab kuv thiab lau!”
49Yexus txawm nres thiab hais tias, “Hu nws los.”
Lawv thiaj hu tus digmuag tias, “Yexus hu koj, koj ciali zoosiab thiab sawv mus cuag Nws.”
50Tus digmuag txawm hle hlo nws lub tsho ntev tseg thiab sawvtsees mus cuag Yexus.
51Yexus nug nws hais tias, “Koj xav kom Kuv ua dabtsi rau koj?”
Tus digmuag teb tias, “Xibhwb, kuv xav rov pomkev.”
52Yexus hais rau nws tias, “Koj ciali mus, koj txoj kev ntseeg twb kho koj zoo lawm.”
Tamsim ntawd nws txawm pomkev thiab nrog Yexus taug kev mus.
Currently Selected:
Malakaus 10: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
