Mathais Lus Tawqhia
Lus Tawqhia
Phau Mathais no yog qhia txog Txoj Moo Zoo uas hais tias Yexus yog tus Cawmseej uas Vajtswv tau coglus tseg lawm; yog tus uas Vajtswv ua kom tiav rau Nws haivneeg rawsli Vajtswv tau coglus tseg rau hauv Phau Vajluskub Qub. Txoj Moo Zoo no tsis yog muab rau haivneeg Yudais uas Yexus tau los yug rau hauv thiab nrog nyob xwb, tiamsis yog muab rau txhua haivneeg hauv qabntuj no.
Tej lus sau hauv phau ntawv Mathais yeej ua tibzoo muab tso kom rawsli sijhawm. Nws pib thaum yug Yexus, qhia txog qhov uas Nws ua kevcai rausdej thiab raug simsiab, dhau mus rau Nws tes haujlwm uas yog qhuabqhia, cobqhia, thiab kho mob hauv Kalilais. Dhau ntawd, Txoj Moo Zoo no tau hais txog Yexus kev ua haujlwm pib ntawm Kalilais mus rau Yeluxalees, hais txog tej xwmtxheej uas los raug Yexus ntawm lub limtiam kawg, los xaus rau qhov uas Yexus raug ntsia rau saum ntoo khaublig thiab sawv hauv qhovtuag rov los.
Txoj Moo Zoo no qhia hais tias Yexus yog ib tug Xibhwb zoo uas Nws muaj peevxwm txhais Vajtswv txoj kevcai, thiab qhia txog Vajtswv lub Tebchaws. Nws cov lus qhia muab sau zog los ua tsib zaj tseemceeb li no: (1) zaj lus Qhuabqhia saum Roob uas hais txog tus yamntxwv, tes haujlwm, tej samxeeb zoo, thiab lub chaw xaus ntawm cov pejxeem hauv Vajtswv lub Ntuj Ceebtsheej (tshooj 5-7); (2) tej lus qhia rau kaum-ob tug thwjtim kev mus ua haujlwm (tshooj 10); (3) tej lus pivtxwv hais txog Vajtswv lub Ntuj Ceebtsheej (tshooj 13); (4) tej lus qhia hais txog lub ntsiablus ntawm kev ua thwjtim (tshooj 18); thiab (5) tej lus qhia txog thaum lub ntiajteb kawg thiab Vajtswv lub Tebchaws uas yuav los (tshooj 24-25).
Txheejtxheem
Yexus Khetos cov yawgkoob thiab yug Yexus (1:1—2:23)
Yauhas tus uas muab neeg ua kevcai rausdej tes haujlwm (3:1-12)
Yexus ua kevcai rausdej thiab raug kev simsiab (3:13—4:11)
Yexus tabmeeg ua haujlwm hauv Kalilais (4:12—18:35)
Pib ntawm Kalilais mus rau Yeluxalees (19:1—20:34)
Limtiam kawg nyob hauv thiab nyob ze lub nroog Yeluxalees (21:1—27:66)
Yexus kev sawv hauv qhovtuag rov los thiab tshwm rau sawvdaws pom (28:1-20)
Currently Selected:
Mathais Lus Tawqhia: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.