Mathais 9

Yexus Kho Tus Txivneej Uas Tuagtes Tuagtaw

(Malakaus 2:1-12; Lukas 5:17-26)

1Yexus txawm nce mus rau hauv nkoj thiab hla hiavtxwv rov los txog rau hauv Nws lub nroog.#9:1: Nws lub nroog: Kapena-us (saib 4:13). 2Txawm muaj neeg muab ib daim lev kwv ib tug txivneej tuagtes tuagtaw tuaj cuag Yexus. Thaum Yexus pom tias lawv muaj kev ntseeg heev, Nws thiaj hais rau tus txivneej uas tuagtes tuagtaw ntawd tias, “Metub 'e, tsis txhob txhawj! Koj lub txim twb raug zam lawm.”

3Ces cov xibhwb uas qhia Kevcai qeeleej txawm xav hauv siab tias, “Tus neeg no haislus saib tsis taus Vajtswv!”

4Yexus twb paub tej uas lawv xav lawm, Nws thiaj hais rau lawv tias, “Uacas nej lub siab yuav xav tej yam phem ualuaj li? 5Lolus uas hais tias, ‘Koj lub txim twb raug zam lawm,’ lossis lo uas hais tias ‘Koj ciali sawvtsees mus tsev,’ ob lolus no lo twg yoojyim hais dua? 6Kuv ua li no qhia rau nej paub tias Neeg Leejtub muaj hwjchim nyob hauv ntiajteb no zam tau neeg lub txim.” Yexus thiaj hais rau tus txivneej tuagtes tuagtaw hais tias, “Ciali sawvtsees, nqa koj daim lev thiab mus tsev!”

7Tus txivneej ntawd txawm sawvtsees mus tsev lawm. 8Thaum sawvdaws pom li ntawd, lawv ntshai kawg thiab lawv qhuas Vajtswv qhov uas Nws tau pub hwjchim rau neeg.

Yexus Hu Mathais

(Malakaus 2:13-17; Lukas 5:27-32)

9Thaum Yexus tabtom taug kev tawm qhov chaw ntawd mus, Nws pom ib tug txivneej sau se hu ua Mathais zaum ntawm lub rooj sau se. Yexus hais rau nws tias, “Koj ciali nrog Kuv mus.” Mathais txawm sawvtsees nrog Nws mus.

10Thaum Yexus tabtom noj mov hauv Mathais tsev,#9:10: hauv Mathais tsev; lossis hauv Nws (uas yog Yexus) tsev. cov neeg sau se thiab cov neeg muaj txim ntau leej tuaj nrog Yexus thiab Nws cov thwjtim noj mov uake. #Lukas 15:1-2 11Thaum cov Falixais pom li ntawd, lawv txawm nug Yexus cov thwjtim hais tias, “Ua licas nej tus xibhwb nrog cov neeg sau se thiab cov neeg muaj txim noj mov uake?”

12Yexus hnov lawv nug li ntawd, Nws txawm teb tias, “Cov neeg tsis muaj mob yeej tsis cheemtsum kws-khomob, tsuas yog cov muaj mob thiaj cheemtsum xwb. 13Nej ciali mus kawm Vajtswv Txojlus kom nej totaub lub ntsiablus uas hais tias, ‘Kuv ntshaw txoj kev tabncuab, tsis yog ntshaw tus tsiaj uas tua theej txhoj.’ Kuv tsis yog los hu cov neeg ncajncees, tiamsis yog los hu cov neeg muaj txim.” #Math 12:7; Hauxe 6:6

Nug Txog Kevcai Yoo Mov

(Malakaus 2:18-22; Lukas 5:33-39)

14Dhau ntawd Yauhas tus uas muab neeg ua kevcai rausdej cov thwjtim txawm tuaj nug Yexus hais tias, “Vim licas peb thiab cov Falixais pheej nquag ua kevcai yoo mov, tiamsis Koj cov thwjtim ho tsis ua li?”

15Yexus teb lawv hais tias, “Nej xav tias thaum tus nraugvauv tseem nrog nws cov phoojywg noj tshoob uake, lawv yuav nyuajsiab no lov? Lawv yeej tsis nyuajsiab li! Tiamsis yuav muaj ib lub sijhawm uas luag tuaj coj tus nraugvauv tawm ntawm lawv mus, thaum ntawd lawv mam yoo mov.

16“Yeej tsis muaj leejtwg yuav muab daim ntaub tshiab los ntxiv rau lub tsho qub, rauqhov thaum daim ntaub tshiab txoom, yuav ua rau lub tsho qub yimhuab ntuag loj dua qub ntxiv. 17Lossis tsis muaj leejtwg yuav muab cov cawv txivhmab tshiab ntim rau hauv lub hnabtawv qub, rauqhov lub hnabtawv qub yuav tawg, cov cawv txivhmab yuav xau tag, thiab lub hnabtawv yuav tsis zoo siv lawm. Yogli ntawd, yuavtsum muab cov cawv txivhmab tshiab ntim rau hauv lub hnabtawv tshiab, kom lub hnabtawv thiaj tsis tawg thiab cov cawv txivhmab thiaj tsis txeej.”

Tus Nom Tus Ntxhais Thiab Tus Pojniam Uas Kov Yexus Tw Tsho

(Malakaus 5:21-43; Lukas 8:40-56)

18Thaum Yexus tseem tabtom hais li ntawd, cov Yudais ib tug nom txawm tuaj txhoscaug ntua ntawm Yexus kotaw thiab thov hais tias, “Kuv tus ntxhais nyuamqhuav tusiav nrho, thov Koj mus tsa tes rau nws, kom nws rov muaj sia.” 19Yexus txawm sawvtsees nrog tus nom ntawd mus, Nws cov thwjtim los kuj nrog Nws mus thiab.

20Thaum ntawd muaj ib tug pojniam uas muaj mob txomnyem kawg li vim nws nchuav cev tau kaum-ob lub xyoos, txawm lawvliag Yexus qab thiab tib kov Yexus lub tw tsho. 21Nws xav hauv siab tias, “Yog kuv tau kov Yexus lub tw tsho, kuv tus mob yeej yuav zoo xwb.”

22Yexus tig hlo thiab pom tus pojniam ntawd, Nws thiaj hais tias, “Mentxhais 'e, koj tsis txhob txhawj! Koj txoj kev ntseeg twb kho koj zoo lawm.” Tamsim ntawd tus pojniam ntawd tus mob txawm zoo kiag lawm.

23Thaum Yexus mus txog hauv tus nom ntawd lub tsev, Nws pom cov neeg tshuab qeej ntaus nruas thiab sawvdaws quaj-nyiav ntshoo nrooj. 24Nws txawm hais tias, “Nej txhua tus ciali tawm mus! Tus mentxhais no twb tsis tau tuag, nws tsuas yog tsaugzog xwb!” Ces sawvdaws txawm luag Yexus zomzaws. 25Tiamsis thaum cov neeg tawm mus tag lawm, Yexus txawm mus rau hauv chav uas tus ntxhais ntawd pw thiab tuav nkaus nws txhais tes, ces tus mentxhais ntawd txawm sawvtsees. 26Zaj no nrov-ncha moo lug mus thoobplaws sab tebchaws ntawd.

Yexus Kho Ob Tug Neeg Digmuag

27Thaum Yexus tawm ntawm qhov chaw ntawd mus, muaj ob tug txivneej digmuag txawm lawv Nws qab. Nkawd hu nrov-nrov hais tias, “Daviv tus Tub, thov Koj tabncuab wb thiab lau!”

28Thaum Yexus mus rau hauv tsev lawm, ob tug txivneej digmuag ntawd txawm los cuag Nws. Yexus nug nkawd hais tias, “Neb puas ntseeg tias Kuv muaj cuabkav kho tau neb?”

Nkawd teb tias, “Tus Tswv, wb ntseeg.”

29Ces Yexus txawm kov nkawd lub qhovmuag thiab hais tias, “Ciali muaj rawsli qhov uas neb ntseeg!” 30Ces nkawd txawm rov pomkev lawm. Yexus txwv nkawd hais tias, “Neb tsis txhob qhia zaj no rau leejtwg li!”

31Tiamsis nkawd tawm mus piav txog Yexus lub moo thoobplaws sab tebchaws ntawd.

Yexus Kho Tus Txivneej Uas Hais Tsis Tau Lus

32Thaum ob tug txivneej digmuag ntawd tabtom tawm mus, txawm muaj neeg coj ib tug txivneej uas raug ib tug dab thiab hais tsis tau lus tuaj cuag Yexus. 33Thaum Yexus ntiab tus dab ntawd tawm kiag lawm, ces tus txivneej txawm hais tau lus tamsim ntawd, ua rau sawvdaws xav tsis thoob li. Lawv hais tias, “Peb tsis tau pom dua tej yam zooli no nyob hauv lub tebchaws Yixalayees no ib zaug li!” 34Tiamsis cov Falixais hais tias, “Twb yog ntxwgnyoog uas yog cov dab tus thawj pub hwjchim rau Yexus ntiab cov dab ntawd tawm.” #Math 10:25; 12:24; Malak 3:22; Lukas 11:15

Yexus Hlub Cov Neeg Sawvdaws

35Yexus mus txhuanrho tej nroog thiab tej zejzog. Nws cobqhia hauv tej tsev sablaj, qhuabqhia txog Txoj Moo Zoo uas hais txog Vajtswv lub Tebchaws, thiab kho tej neeg uas muaj txhua yam mob, tsis hais yam mob twg. #Math 4:23; Malak 1:39; Lukas 4:44 36Thaum Yexus pom cov neeg coob-coob ntawd, Nws hlub lawv kawg li, rauqhov lawv ntxhovsiab thiab tsis muaj leejtwg pab lawv, zooli pab yaj uas tsis muaj tus tswv yug. #Teev 27:17; 1Vaj 22:17; 2Xwm 18:16; Exek 34:5; Malak 6:34 37Ces Nws txawm hais rau Nws cov thwjtim tias, “Cov nplej uas zoo hlais lawm muaj ntau, tiamsis cov tubzog uas hlais muaj tsawg. #Lukas 10:2 38Nej ciali thov tus Tswv teb kom txib dua ib co tubzog mus pab hlais Nws cov nplej.”

Currently Selected:

Mathais 9: MWW2022

Highlight

Copy