Malakis 1
1
1Nov yog cov lus uas tus TSWV hais rau Malakis kom nws coj mus qhia rau cov Yixalayees.
Tus TSWV Txoj Kev Hlub Rau Cov Yixalayees
2Tus TSWV hais rau Nws haivneeg tias, “Kuv yeej ibtxwm hlub nej.”
Tiamsis lawv nug hais tias, “Koj hlub peb licas?”
Tus TSWV teb tias, “Exaus thiab Yakhauj yog ob kwvtij, tiamsis Kuv hlub Yakhauj thiab nws cajces, 3Kuv ntxub Exaus thiab nws cajces. Kuv muab Exaus tej tojroob rhuav kom puastsuaj thiab muab nws lub tebchaws tsotseg rau tej hma nyob.” #Loos 9:13
4Exaus cajces uas yog cov Edoos yuav hais tias, “Peb tej moos raug puastsuaj tag lawm tiamsis peb yuav rov txhimkho dua tshiab.” Tiamsis tus TSWV yuav teb tias, “Cia lawv kavtsij txhimkho dua tshiab ntag. Kuv mam rov muab rhuav povtseg dua. Tej neeg yuav hu lawv hais tias, ‘Lub tebchaws phem’ thiab ‘Haivneeg uas tus TSWV chim rau lawv mus ibtxhis.’ ”
5Cov neeg Yixalayees lub qhovmuag yuav pom tej xwmtxheej ntawd, thiab lawv yuav hais tias, “Txawm yog dhau ntawm cov Yixalayees tus ciam tebchaws lawm los tus TSWV tseem muaj Hwjchim Loj Kawg Nkaus.” #Yaxaya 34:5-17; 63:1-6; Yelemi 49:7-22; Exek 25:12-14; 35:1-15; Amaus 1:11-12; Aunpa 1-14
Tus TSWV Rautxim Rau Cov Povthawj Hlob
6Tus TSWV uas muaj Hwjchim Loj Kawg Nkaus hais rau cov povthawj hlob tias, “Tus tub yeej hwm leejtxiv, thiab tus qhev yeej hwm nws tus tswv. Kuv yog nej Txiv, vim licas nej tsis hwm Kuv? Kuv yog nej tus TSWV, vim licas nej tsis hwm Kuv? Nej saib tsis taus Kuv thiab nej tseem nug tias, ‘Peb saib tsis taus Koj licas?’ 7Qhov nej saib tsis taus Kuv yog li no nej muab tej zaub-mov uas tsis huv coj mus fij rau saum Kuv lub thaj. Tiamsis nej tseem nug tias, ‘Peb tsis hwm Koj licas?’ Kuv yuav qhia qhov uas nej ua saib tsis taus Kuv lub thaj rau nej. 8Thaum nej coj tej tsiaj digmuag lossis muaj mob lossis cegtawv tuaj tua fij rau Kuv, nej xav tias ua li ntawd tsis txhaum no lov? Nej sim coj cov tsiaj zoo li ntawd mus pub rau tus tswvxeev seb! Nws puas yuav zoosiab lossis txaussiab rau nej?” #2Kev 15:21
9Zaumno, nej cov uas yog povthawj hlob, nej sim thov kom Vajtswv tabncuab peb seb. Yog nej nqa tej khoom fij zoo li ntawd mus rau Vajtswv, nej xav tias Nws yuav txaussiab rau nej no los? 10Tus TSWV uas muaj Hwjchim Loj Kawg Nkaus hais tias, “Kuv xav kom nej ib tug mus muab lub Tuamtsev tej qhovrooj kaw, tsis pub nej lam mus rauv taws tsis muaj qabhau rau saum Kuv lub thaj. Kuv tsis txaussiab rau nej; Kuv yuav tsis lees tej khoom uas nej coj tuaj fij rau Kuv ntawd. 11Tej tibneeg nyob thoob qabntuj puavleej hwm Kuv lub npe. Lawv hlawv tshuaj tswqab txhua qhov chaw fij rau Kuv thiab muab tej khoom uas txaus Kuv siab fij rau Kuv xwb. Lawv sawvdaws puavleej hwm Kuv! 12Tiamsis thaum nej hais tias Kuv lub thaj mas qias neeg thiab thaum nej nqa tej zaub-mov uas twb tsis tsimnyog tuaj fij rau saum Kuv lub thaj, twb yog nej tsis hwm Kuv ntag. 13Nej hais tias, ‘Peb dhuav tej no kawg nkaus li!’ thiab nej ciali tsa ntswg rau Kuv. Vimli ntawd nej thiaj coj tej tsiaj uas nej mus nyiag los lossis tej tsiaj lov ceg lossis tej tsiaj muaj mob tuaj fij rau Kuv. Nej xav tias Kuv yuav lees yuav tej ntawd no lov? 14Kuv yuav foom phem rau tus neeg dag uas tau coglus tias yuav muab nws pab tsiaj ib tug uas zoo tshajplaws fij rau Kuv, tiamsis nws muab tus uas phem tshajplaws tuaj fij rau Kuv xwb. Kuv yog tus Vajntxwv uas muaj Hwjchim Loj Kawg Nkaus thiab txhua haivneeg puavleej hwm Kuv lub npe.”
Currently Selected:
Malakis 1: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
