Yaxayas 43
43
Vajtswv Coglus Yuav Cawm Nws Haivneeg
1Cov Yixalayees, tus TSWV uas tsim nej hais tias,
“Nej tsis txhob ntshai, Kuv yuav cawm nej.
Kuv twb tuav nej npe hu nej lawm, nej yog Kuv tug.
2Thaum nej hla tej dej tob, Kuv yuav nrognraim nej;
thaum nej mus hauv dej, dej yuav tsis tshoob nej.
Thaum nej mus hauv cov nplaimtaws, hluavtaws yuav tsis kub nej;
tej teebmeem uas los raug nej yuav txov tsis tau nej.
3Rauqhov Kuv yog tus TSWV, uas yog nej tus Vajtswv,
yog cov Yixalayees tus Vajtswv uas dawbhuv, tus uas cawm nej.
Kuv muab cov Iziv los ua nqi txhiv nej,
muab cov Itiupias#43:3 Phau lus Henplais hais tias Khuses: Khuses yog ib lub npe thaum ub uas nyob rau ib cheebtsam qabteb ntawm tus Dej Nais. Cheebtsam no, nyob rau tiam thaum nomtswv Loos kav tebchaws, yog hu ua Itiupias, uas tus ciamteb yog los ti nkaus rau tebchaws Xudas thiab tiam nimno hu ua Itiupias. thiab cov Xenpas los pauv nej.
4Kuv yuav muab tagnrho txhua haivneeg los txhiv kom tau nej txojsia,
rauqhov nej muajnqis rau Kuv heev
thiab vim Kuv hlub nej thiab ua kom nej tau ntsejmuag.
5Tsis txhob ntshai, Kuv yeej nrognraim nej!
“Txij ntua tim hnubtuaj thiab tim hnubpoob
Kuv yuav coj nej cov neeg rovqab los tsev.
6Kuv yuav hais rau sab qaumteb kom tso lawv los,
thiab sab qabteb kom tsis txhob cheem lawv nyob.
Ciali tso Kuv cov neeg uas nyob deb rov los,
cov uas nyob tim qabntuj kawg rov los.
7Lawv yog Kuv haivneeg,
Kuv tsim lawv los ua kom Kuv tau koobmeej.”
Yixalayees Yog Vajtswv Tus Timkhawv
8Vajtswv hais tias,
“Coj cov neeg uas muaj qhovmuag tiamsis tsis pomkev,
muaj pobntseg tiamsis tsis hnov lus tuaj uake!
9Coj txhua haivneeg tuaj sibsau uake.
Lawv tej nyuag vajtswv ntawd, tus twg yog tus muaj cuabkav qhia tau txog yav tomntej?
Tus twg yog tus qhia tau txog tej uas tabtom tshwmsim tamsim no?
Cia tej nyuag vajtswv ntawd coj lawv cov timkhawv tuaj
ua povthawj qhia tias lawv yog cov yog,
thiab ua povthawj tias tej uas lawv hais yog lus tseeb.
10“Cov Yixalayees, nej yog Kuv cov timkhawv;
Kuv xaiv nej los ua Kuv cov tubtxib,
kom nej thiaj paub Kuv thiab ntseeg Kuv
thiab totaub tias Kuv tibleeg xwb thiaj yog Vajtswv.
Dhau ntawm Kuv lawm, yeej tsis muaj dua lwmtus vajtswv;
tsis hais yav tas los lossis yav tomntej.
11“Kuv tibleeg xwb thiaj yog tus TSWV,
Kuv tibleeg xwb thiaj yog tus cawm tau nej.
12Kuv twb xub qhia lawm hais tias yuav muaj dabtsi tshwmsim,
ces Kuv los cawm nej thiab qhia rau lub ntiajteb paub.
Cov neeg txawv tebchaws yeej tsis tau muaj dua ib tug nyuag vajtswv uas tau ua tej no li;
nej yog Kuv cov timkhawv.
13Kuv yog Vajtswv thiab Kuv yeej yuav yog Vajtswv mus ibtxhis.
Tsis muaj ib tug twg yuav khiav dhau Kuv lub hwjchim;
tsis muaj ib tug twg yuav hloov tau tej uas Kuv ua ib zaug li.”
Khiav Tawm Hauv Npanpiloos
14Cov Yixalayees tus Vajtswv uas dawbhuv, tus TSWV uas cawm nej, hais tias,
“Vim Kuv hlub nej, Kuv thiaj xa tubrog mus tua lub nroog Npanpiloos;
Kuv yuav tsoo tej roojloog kom tawg tas,
ua kom lawv cov neeg lub suab qw dhau mus ua suab quaj suab nyiav.
15Kuv yog tus TSWV, yog nej tus Vajtswv uas dawbhuv.
Yog tus tsim nej cov Yixalayees thiab yog nej tus Vajntxwv.”
16Tus TSWV hais tias yav tas los Nws tau rhawv ib txojkev phua plhawv hiavtxwv,
yog ib txojkev uas tshab plaws hauv tus dej uas ntsawj ceev heev.
17Nws tau coj ib pab tubrog coob-coob uas muajzog heev mus raug kev puastsuaj,
uas yog cov tubrog tsav tsheb nees thiab tej nees.
Lawv ntog tag rau hauv dej thiab lawv tsis sawv li lawm,
lawv ploj ntshis mus yam li tus nplaimteeb uas tuag lawm!
18Tiamsis tus TSWV hais tias,
“Tsis txhob nco txog tej xwmtxheej yav tas los
lossis tsis txhob xav txog tej xwmtxheej uas tshwmsim ntev-ntev los lawm.
19Kuv tabtom ua yam tshiab!
Saib maj, nimno yam ntawd twb tshwm tuaj lawm; nej tsis pom li lov?
Kuv yuav ua ib txojkev mus phua plhawv hauv tiaj suabpuam
thiab muaj dej ntws nto hauv lub tiaj suabpuam ntawd.
20Txawm yog tej tsiaj qus los yuav hwm Kuv,
tej hma thiab noog ntxhuav los yuav qhuas Kuv,
rauqhov Kuv ua kom muaj dej ntws hauv tej nras mojsab qhua
rau haivneeg uas Kuv tau xaiv lawm kom tau dej haus.
21Lawv yog haivneeg uas Kuv tsim los rau Kuv,
thiab lawv yuav hunkauj qhuas Kuv!”
Cov Yixalayees Tej Kev Txhaum
22Tus TSWV hais tias,
“Tiamsis cov Yixalayees, nej dhuav Kuv
thiab nej tsis pehawm Kuv li lawm.
23Nej twb tsis coj nej tej yaj tuaj tua hlawv fij rau Kuv,
nej tsis hwm Kuv los ntawm nej tej khoom fij.
Kuv tsis tau yuam kom nej muab khoom fij rau Kuv es ua rau nej nyuajsiab
lossis tsis tau kom nej muab hmoov tshuaj tswqab rau Kuv es ua rau nej dhuavsiab.
24Nej twb tsis tau muab nyiaj yuav hmoov tshuaj tswqab rau Kuv,
lossis muab tej roj tsiaj uas nej tua ua khoom fij pub rau Kuv.
Tiamsis nej ua rau Kuv nyuajsiab txog nej tej kev txhaum,
Kuv dhuav tej kev txhaum uas nej ua ntawd kawg li.
25Txawm li ntawd los, Kuv yog Vajtswv tus uas zam nej lub txim,
Kuv ua li no, vim Kuv yeej yog tus ntawd.
Kuv yuav tsis cimntsoov nej tej kev txhaum cia.
26“Cia peb tuaj uake, thiab nej qhia rau Kuv seb qhov nej tsis txaussiab yog dabtsi!
Peev nej zaj tuaj seb nej puas yog tus uas tsis muaj txhaum!
27Nej thawjtug yawgkoob#43:27: Nej thawjtug yawgkoob: Yog hais txog Yakhauj, lossis Anplahas, lossis tejzaum yog hais txog Adas. tau ua txhaum;
nej cov thawjcoj tau ntxeevsiab rau Kuv,
28thiab nej cov nomtswv saib tsis taus#43:28: Ib phau ntawv qub-qub thaum ub sau hais tias nej cov nomtswv saib tsis taus; phau lus Henplais hais tias Kuv saib tsis taus cov nomtswv. Kuv qhov chaw dawbhuv.
Yogli ntawd, Kuv thiaj tso kev puastsuaj los raug haivneeg Yixalayees;
Kuv thiaj tso Kuv haivneeg rau luag txobthuam.”
Currently Selected:
Yaxayas 43: MWW2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
