Henplais 6

1Yogli ntawd, cia peb tsis txhob kawm tej nyuag ntiav-ntiav uas hais txog Khetos xwb, tiamsis yuavtsum hla mus kawm tej uas tob dua ntawd ntxiv. Peb tsis txhob rov mus kawm txog lub hauvpaus kev hloov dua siab tshiab uas peb twb tsis ua, thiab kawm txog kev ntseeg Vajtswv; 2kawm txog kevcai rausdej#6:2: kevcai rausdej; lossis tej kevcai ntxuav. thiab kevcai tsa tes rau saum tibneeg; kawm txog kev uas neeg tuag sawv hauv qhovtuag rovqab los, thiab kev rautxim mus ibtxhis. 3Yog Vajtswv pomzoo, peb yuav rhais ruam mus lawm tomntej, thiab yuav ua li ntawd ntag!

4Cov neeg uas twb tso txoj kev ntseeg tseg lawm, lawv yuav ua licas rovqab tso tau lawv tej kev txhaum tseg? Lawv twb nyob rau hauv Vajtswv qhov pomkev ib zaug los lawm; twb saj qhov khoomplig uas los saum ntuj los lawm, thiab twb muaj feem koom nrog Vaj Ntsujplig tus Dawbhuv lawm; 5twb saj qhov zoo kawg nkaus ntawm Vajtswv Txojlus lawm, thiab twb pom tej hwjchim uas yuav muaj los yav tomntej no lawm. 6Txawm li ntawd los lawv tseem tso txoj kev ntseeg tseg thiab! Qhov uas yuav coj tau lawv rov los lees lawv tej kev txhaum ntawd yeej tsis tau li, rauqhov lawv tseem rov muab Vajtswv tus Tub ntsia rau saum ntoo khaublig dua ib zaug ntxiv thiab rhuav Nws ntsejmuag tabmeeg sawvdaws.

7Vajtswv foom koobhmoov rau thaj av uas niajhnub rub dej nag los yug ua rau tej qoobloo lojhlob zoo kom muajnqis rau tus uas cog. 8Tiamsis yog thaj av ntawd tuaj nroj thiab tuaj pos xwb, nws yeej tsis muajnqis dabtsi li. Tseem yuav raug foom thiab thaum kawg yuav raug muab hluavtaws hlawv. #Chiv 3:17-18

9Cov kwvtij uas peb hlub, txawm yog peb hais li no los peb yeej tseem ruajsiab hais tias nej tseem muaj tej yam uas zoo dua tej uas peb hais ntawd, uas yog hais txog txoj kev dim txim. 10Vajtswv tsis yog tus uas tsis ncajncees. Nws yeej yuav tsis hnovqab txog tej haujlwm uas nej tau ua los, thiab tej kev hlub uas nej tau qhia rau Nws los ntawm qhov uas nej pab cov ntseeg, ib yam li uas nej tseem niajhnub ua no. 11Peb xav kom nej txhua tus muaj lub siab kublug li no mus txog hnub kawg, kom tej uas nej ciasiab ntawd thiaj yuav dhau tau mus ua qhov tseeb. 12Peb tsis xav kom nej ua neeg tubnkeeg, tiamsis xav kom nej ua zooli cov neeg uas muab siab rau ntseeg thiab ua siabntev, kom nej thiaj yuav tau tej uas Vajtswv twb coglus tseg lawm.

Vajtswv Lolus Cogtseg Uas Ruaj-khov

13Thaum Vajtswv coglus rau Anplahas, Nws rov tuav Nws lub npe coglus xwb, vim tsis muaj leejtwg uas yuav muaj hwjchim loj dua Nws uas Nws yuav mus tuav lub npe ntawd coglus. 14Nws thiaj hais tias, “Kuv coglus rau koj hais tias, Kuv yuav foom koobhmoov rau koj thiab pub kom koj muaj xeebntxwv huamvam coob.” #Chiv 22:16-17 15Anplahas ua siabntev tos, nws thiaj tau tej uas Vajtswv tau coglus tseg.

16Thaum peb coglus, peb yeej tuav tus uas muaj hwjchim loj dua peb lub npe coglus; tej uas peb coglus ntawd thiaj yuav siv tau thaum sawvdaws muaj kev sibcav sibceg. 17Rau cov uas yuav tau txais tej uas Vajtswv tau coglus tseg lawm, Vajtswv xav kom lawv paub meej-meej tias Nws yeej yuav tsis hloov Nws lub homphiaj kiag li; yogli ntawd, Nws thiaj tuav Nws lub npe rau ntawm txoj kev coglus.

18Yogli ntawd, ob yam no yeej hloov tsis tau thiab Vajtswv yeej tsis dag. Peb cov uas tau khiav los nkaum rau hauv Vajtswv lawm, peb thiaj muaj siab kublug tuav rawv txoj kev ciasiab uas tseem yuav los rau yav tomntej no. 19Qhov kev ciasiab uas peb muaj no zoo ib yam li tus tswg uas muaj hlua khi peb lub siab kom nyob ruaj-khov thiab coj peb dhau ntawm daim ntaub hauv lub tuamtsev ceebtsheej mus rau hauv chav uas dawbhuv tshajplaws. #Levi 16:2 20Yexus twb sawv peb cev ua peb ntej mus hauv qhov chaw ntawd thiab tau dhau mus ua tus tuam povthawj hlob mus ibtxhis ib yam li Mekhixedes lawm. #Nnkauj 110:4

Currently Selected:

Henplais 6: MWW2022

Highlight

Copy