Henplais 1

Vajtswv Txojlus Uas Los Ntawm Nws Tus Tub

1Txheej thaum ub Vajtswv tau hais ntau zaug thiab siv ntau txojkev los hais rau peb cov yawgkoob los ntawm cov xibhwb cev Vajtswv lus, 2tiamsis tiam kawg no Nws tau hais rau peb los ntawm Nws tus Tub. Nws tau tsim lub ntuj lub teb no los ntawm Nws tus Tub thiab thaum kawg, tau tsa Nws tus Tub sau txhua yam los ua tus Tub tug. 3Leejtub yog Vajtswv tus duab tshwjchim uas ci ntsa-iab thiab yog kiag Vajtswv tus hwvxyeej, Nws ceev tau tagnrho txhua yam los ntawm Nws tej lus uas muaj hwjchim. Tomqab Nws theej neeg lub txhoj tag lawm, Nws thiaj mus zaum saum ntuj ceebtsheej ntawm Vajtswv tus uas muaj Hwjchim Loj Kawg Nkaus sab xis.

Vajtswv Tus Tub Uas Muaj Hwjchim

4Leejtub raug tsa ua tus loj dua cov timtswv ceebtsheej, ib yam li lub npe uas Vajtswv muab rau Nws yog lub uas muaj hwjchim loj dua lawv lub. 5Rauqhov Vajtswv yeej tsis tau hais rau Nws cov timtswv ceebtsheej ib tug twg hais tias,

“Koj yog kuv tus Tub;

hnubno Kuv dhau los ua koj Txiv lawm.”

Lossis Vajtswv yeej tsis tau hais rau ib tug timtswv ceebtsheej twg hais tias,

“Kuv yuav ua nws Leejtxiv,

thiab nws yuav ua kuv Leejtub.”

6Thaum Vajtswv yuav txib Nws tus Tub Hlob los rau hauv ntiajteb, Nws hais tias,

“Cia Vajtswv cov timtswv ceebtsheej pehawm Nws.”

7Tiamsis Vajtswv ho hais rau cov timtswv tias,

“Vajtswv tsim Nws cov timtswv ua cua,

thiab tsim Nws cov tubtxib ua nplaimtaws.” #Nnkauj 104:4

8Hais txog Leejtub, Nws hais tias,

“Au Vajtswv, Koj lub zwmtxwv yuav nyob#1:8: Au Vajtswv, Koj lub zwmtxwv yuav nyob; lossis Vajtswv yog koj lub zwmtxwv. mus ibtxhiab ibtxhis!

Koj kav koj#1:8: koj lub; tej phau ntawv qub uas xuas tes sau, muaj nws lub. haivneeg los ntawm txoj kev ncajncees. #Nnkauj 45:6-7

9Koj nyiam txoj kev ncajncees thiab ntxub txoj kev phem.

Vimli no Vajtswv, uas yog koj tus Vajtswv

thiaj muab cov roj ntawm kev zoosiab

los pleev Koj ntau dua li Koj cov phoojywg.”

10Nws hais ntxiv hais tias,

“Tus Tswv, thaum chivkeeb Koj tsim lub ntiajteb,

thiab lub ntuj yog Koj txhais tes tsim. #Nnkauj 102:25-27

11Tej ntawd yuav puastsuaj mus, tiamsis Koj yuav nyob mus li;

tej ntawd yuav txawj nphob ib yam li tej tsoostsho.

12Koj yuav muab tej ntawd tais cia ib yam li tais lub tsho ntev,

thiab tej ntawd yuav hloov ib yam li tej tsoostsho.

Tiamsis Koj yeej zooli qub,

thiab Koj lub niaj lub xyoo yuav tsis muaj hnub kawg.”

13Vajtswv yeej tsis tau hais rau Nws cov timtswv ceebtsheej ib tug twg hais tias,

“Ciali nyob ntawm Kuv sab xis

mus txog thaum Kuv muab koj cov yeebncuab

ua koj lub rooj tiag taw.” #Nnkauj 110:1

14Yogli ntawd, cov timtswv ceebtsheej yog leejtwg? Lawv yog cov ntsujplig uas ua haujlwm rau Vajtswv, thiab raug txib los pab cov neeg uas yuav tau txais txoj kev cawmdim.

Currently Selected:

Henplais 1: MWW2022

Highlight

Copy