Hakais 2

Ua Tau Lub Tuamtsev Tshiab Zoo Heev

1Lub xya hli ntuj hnub neesnkaum-ib uas yog tiblub xyoo ntawd, tus TSWV rov hais rau Hakais uas yog tus xibhwb cev Vajtswv lus dua ib zaug ntxiv. 2Nws hais kom Hakais mus hais rau Xelunpanpees, uas yog tus tswvxeev hauv lub xeev Yudas, hais rau Yausuas, uas yog tus Tuam Povthawj Hlob, thiab hais rau cov pejxeem sawvdaws tias, 3“Nej puas muaj leejtwg tseem nco tau tias lub Tuamtsev thaum ub zoo npaum licas? Nimno nej pom zoo licas lawm? Puas yog lub Tuamtsev zoo li tsis muaj qabhau li lawm? #Exala 3:12 4Tiamsis nimno nej txhua tus tsis txhob qaugzog. Nej ciali rausiab ntso ua haujlwm, rauqhov Kuv yeej nrognraim nej. 5Thaum nej khiav hauv tebchaws Iziv los, Kuv tau coglus rau nej hais tias Kuv yuav nrognraim nej. Kuv tseem nrognraim nej, yogli ntawd nej tsis txhob ntshai.#Khiav 29:45-46

6“Tshuav tsis ntev Kuv yuav co lub ntuj thiab lub ntiajteb, thooj av thiab dej hiavtxwv. #Henpl 12:26 7Kuv yuav rhuav txhua haivneeg, thiab yuav coj lawv tej nyiaj tej kub los tso rau ntawm no, mas lub Tuamtsev yuav muaj nyiaj puvnkaus. 8Tej nyiaj thiab tej kub uas nyob hauv ntiajteb no puavleej yog Kuv li tagnrho. 9Lub Tuamtsev tshiab no yuav zoo tshaj lub qub thaum ub, thiab Kuv yuav pub kom Kuv haivneeg muaj kev vammeej thiab nyob kajsiab lug rau ntawd.” Tus TSWV uas muaj Hwjchim Loj Kawg Nkaus yog tus hais tej lus no.

Tus Xibhwb Cev Vajtswv Lus Nrog Cov Povthawj Hlob Tuavxam

10Thaum lub cuaj hli ntuj hnubtim neesnkaum-plaub uas yog xyoo thib ob uas Dali-us ua huabtais kav tebchaws, tus TSWV uas muaj Hwjchim Loj Kawg Nkaus rov los hais rau Hakais, uas yog tus cev Vajtswv lus dua ib zaug ntxiv. 11Tus TSWV hais tias, “Koj ciali nug cov povthawj hlob txog txoj kevcai no: 12Yog leejtwg qaws nws lub tw tsho ntev thiab muab ib thooj nqaij uas twb muab fij theej txhoj lawm nqa mus. Yog tias nws lub tsho ntev ntawd mus chwv tej ncuav, tej zaub-mov, tej cawv txivhmab, tej txiv ntoo-roj, lossis ib yam khoom noj twg, puas yuav ua rau tej khoom ntawd dawbhuv thiab?”

Cov povthawj hlob teb tias, “Yeej tsis huv li.”

13Ces Hakais nug ntxiv tias, “Yog muaj ib tug tibneeg twg tau mus kov ib tug neeg tuag lub cev thiab ua rau nws tsis huv lawm, thiab yog tias nws ho los kov tej zaub-mov no, puas yuav ua rau tej zaub-mov ntawd tsis huv thiab?”

Cov povthawj hlob teb tias, “Yeej tsis huv lawm.” #Teev 19:11-22

14Hakais hais tias, “Tus TSWV hais tias haivneeg uas nyob hauv lub tebchaws no thiab txhua yam uas cov tibneeg no khwv tau los ces zoo nkaus li ntawd; thiab txhua yam uas lawv muab fij rau saum lub thaj yeej tsis huv lawm.”

Tus TSWV Coglus Yuav Foom Koobhmoov

15Tus TSWV hais tias, “Nej puas pom tej xwmtxheej uas muaj los raug nej, uantej uas nej pib txhimkho lub Tuamtsev? 16Nej mus rau ntawm lub txhab nplej, thiab ciasiab tias yuav yawm tau 200 kilus nplej, tiamsis tsuas yawm tau 100 kilus xwb. Nej mus rau ntawm qhov chaw tsuam txivhmab, thiab ce kom tau 100 liv kua txivhmab hauv lub hub, tiamsis nej tsuas ce tau 40 liv xwb. 17Kuv tso cua kub los nplawm thiab tso lawg los ntaus txhua yam uas nej cog kom puastsuaj tag, tiamsis nej tseem tsis tso nej tej kev txhaum tseg li thiab. 18Hnubno yog hnub neesnkaum-plaub lub cuaj hli ntuj, yog hnub uas pua tau lub plag Tuamtsev tiavlog lawm. Nej sim saib seb txij no mus yuav muaj dabtsi tshwmsim tuaj. 19Txawm yog tsis tshuav nplej, tsis tshuav txivhmab, tsis tshuav txiv ncuavpias, tsis tshuav txiv ntsiav pobkws, thiab tsis tau txog caij txitxiv ntoo-roj los, txij no mus Kuv yuav foom koobhmoov rau nej.”

Tus TSWV Coglus Rau Xelunpanpees

20Tibhnub ntawd, uas yog hnub neesnkaum-plaub ntawm lub hli ntawd, tus TSWV rov hais rau Hakais dua zaum thib ob, 21kom nws mus hais rau Xelunpanpees, uas yog tus tswvxeev hauv lub xeev Yudas tias, “Kuv tabtom yuav co lub ntuj thiab lub ntiajteb, 22thiab muab tej zwmtxwv ntxeev thiab rhuav lawv tej hwjchim kom puastsuaj mus. Kuv yuav muab lawv tej tsheb nees uarog thiab cov tibneeg uas tsav tsheb nees uarog ntawd ntxeev; tej nees yuav tuag thiab lawv cov tibneeg uas caij nees, ib leeg yuav tig tua ib leeg kom tuag. 23Xelunpanpees uas yog Kuv tus tubtxib, hnub ntawd Kuv yuav coj koj mus thiab Kuv yuav tsa koj ua tus kav tebchaws ntawm Kuv lub npe. Koj yog tus uas Kuv tau xaiv tseg lawm.” Tus TSWV uas muaj Hwjchim Loj Kawg Nkaus yog tus hais tej lus no.

Currently Selected:

Hakais 2: MWW2022

Highlight

Copy