Khiav Dim 26

Lub Tsevntaub Sibntsib#26:1: Lub Tsevntaub Sibntsib: Saib Cov Lus Txhais uas teev rau tomqab.

(Khiav Dim 36:8-38)

1“Muab kaum daim ntaub mag uas zoo heev uas yog xuas xov xiav, xov tsamxem, thiab xov liab los xaws rau sabhauv lub Tsevntaub dawbhuv, uas yog lub Tsevntaub Sibntsib. Xaws ib cov khelunpees rau ntawm cov ntaub ntawd. 2Txiav cov ntaub ntawd kom sibluag zos, ib daim twg yog ntev 12 xatimev thiab dav 2 xatimev. 3Muab tsib daim los xaws ua ib daig tas mam rov muab tsib daim uas i los xaws ua ib daig thiab. 4Muab ntaub xiav xaws ua ib co ntsej tis raws tus ntug thoobplaws daim ntaub ob sab ntug nraud. 5Ua tsibcaug lub ntsej rau thawj daim ntaub thiab tsibcaug lub ntsej rau daim thib ob thiab ntsuas kom sibncag nkaus. 6Muab kub ntaus ua tsibcaug lub khawb khawm ob daim ntaub ua ib daig.

7“Muab kaum-ib daig ntaub plaub tshis xaws ua ib daim vov lub Tsevntaub ntawd. 8Txiav cov ntaub ntawd kom sibluag zos, ib daim twg yog ntev 13 xatimev thiab dav 2 xatimev. 9Muab tsib daig los xaws ua ib daig, thiab muab rau daim uas i los xaws ua dua ib daig. Tiamsis muab daim thib rau quav ob tsem dauv ua lub momkaum Tsevntaub. 10Ua tsibcaug lub ntsej tis rau tog taw tom no, thiab ua tsibcaug lub ntsej tis rau tog taw tom ub. 11Muab tooj ntaus ua tsibcaug lub khawb khawm ob daig ntaub ntawd ua ib daig vov lub tsev. 12Daim ntaub uas vov lub tsev, tseg ibnrab rub mus thaiv sab pem qaum Tsevntaub. 13Tseg tw dauv rau ob sab, ib sab twg tseg ntev li 50 xatimev dauv los npog lub Tsevntaub.

14“Vov ob txheej tuaj saud, ib txheej yog muab cov tawv laug yaj uas zas liab, thiab ib txheej yog muab cov tawv uas zoo heev.

15“Txiav ntoo kubtwg los ua cov cuav ncej txheem lub Tsevntaub. 16Txhua tus cuav ncej ntev 4 mev thiab dav 66 xatimev, 17muab ob sab npoo thais ua qwb dia sibdhos, kom cov ncej ntawd sibdhos uake. Tagnrho cov cuav ncej ntawd puavleej muab thais ua qwb dia huv tibsi. 18Muab neesnkaum tus cuav ncej txhos rau sab qabtse, 19muab plaubcaug pluaj nyiaj ua taw tiag cov cuav ncej, ob pluaj tiag ib tug cuav ncej, kom ob tug cuav ncej ntawd thiaj sibdhos ruaj. 20Muab neesnkaum tus cuav ncej txheem lub Tsevntaub sab qaumtsev, 21thiab muab plaubcaug pluaj nyiaj ua cov tiag taw, ob pluaj tiag ib tug cuav ncej. 22Muab rau tus cuav ncej txhos rau tomqab lub Tsevntaub sab hnubpoob, 23thiab txhos ob tug rau ob lub kaumtsev. 24Ob tug cuav ncej uas nyob ntawm kaumtsev, muab sibdhos hauv taw nto plaws rau saum. Ob tug cuav ncej ntawm ob lub kaumtsev puavleej ua zoo ib yam nkaus. 25Yogli ntawd, muaj yim tus cuav ncej thiab kaum-rau lub taw pluaj nyiaj, ob pluaj tiag ib tug ncej.

26“Txua kaum-tsib tug tab ntoo kubtwg, muab tsib tug ua tab rau sab phabntsa Tsevntaub sab ped, 27muab tsib tug ua tab rau sab phabntsa sab nrad, thiab muab tsib tug ua tab rau sab momkaum tomqab kawg uas yog sab hnubpoob. 28Tus tab nruabnrab, yog tus uas yuam lub Tsevntaub sab phabntsa tom no mus ti nkaus tom ub. 29Muab cov tseem kub vuam cov tab thiab muab cov khawb kub khawm cov tab rau ntawm cov nqaj, cov nqaj ntawd puavleej muab kub vuam huv tibsi. 30Tsa lub Tsevntaub kom rawsli qhov uas Kuv tau qhia rau koj saum roob lawm.

31“Muab ib daim ntaub mag uas zoo heev uas yog xuas xov xiav, xov tsamxem, thiab xov liab, los ua daim ntaub thaiv; xaws cov duab khelunpees rau ntawm daim ntaub ntawd. 32Muab cov nqelauj kub dai rau thiab coj mus khuam rau ntawm plaub tus ncej ntoo kubtwg uas vuam kub, thiab muab txawb rau saum plaub pluaj nyiaj uas tiag taw. 33Muab daim ntaub ntawd dai rau ntawm cov khawb, thiab muab lub Phijxab Lus Cogtseg uas ntim ob daim txiag zeb txawb rau ntawm daim ntaub sab tod. Daim ntaub ntawd quas Chav Dawbhuv thiab Chav Dawbhuv Kawg Nkaus. #Henpl 6:19; 9:3-5 34Muab lub hau mus khwb lub Phijxab Lus Cogtseg hauv Chav Dawbhuv Kawg Nkaus. 35Muab lub rooj mus txawb rau sabnraum daim ntaub sab ped, thiab muab tus ncej txawb teeb txawb rau ntawm lub Tsevntaub sab nrad.

36“Muab ib daig ntaub mag zoo heev uas yog xuas xov xiav, xov tsamxem, thiab xov liab, uas xaws ua pajntaub txaij nraug zees, los ua daim ntaub npog lub qhovrooj uas nkag rau hauv lub Tsevntaub. 37Koj yuavtsum ua tsib tug ncej ntoo kubtwg thiab muab tej tseem kub vuam rau thiab ua ib co nqelauj kub dai daim ntaub no rau saud; thiab ua tsib tug taw tooj tiag cov ncej ntawd.

Currently Selected:

Khiav Dim 26: MWW2022

Highlight

Copy