Khiav Dim 20

Kaum Nqe Kevcai

(2 Kevcai 5:1-21)

1Cov lus no yog Vajtswv ua tus hais: 2“Kuv yog tus TSWV, uas yog nej tus Vajtswv, tus uas coj nej tawm hauv tebchaws Iziv uas nej ua luag qhev los.

3“Tsis txhob muaj dua lwmtus vajtswv, tiamsis tsuas muaj Kuv tibleeg xwb.

4“Tsis txhob puab tej mlom uas zooli tej nyob saum nruabntug lossis hauv ntiajteb no lossis hauv tivtxwv rau nej. 5Tsis txhob qhau hau lossis pehawm ib tug mlom twg li, rauqhov Kuv yog tus TSWV, uas yog nej tus Vajtswv, Kuv khib nej heev. Kuv yog tus uas rautxim rau cov uas ntxub Kuv, thiab rautxim rau lawv cov xeebntxwv mus txog peb thiab plaub tiam neeg. #Khiav 34:17; Levi 19:4; 26:1; 2Kev 4:15-18; 27:15 6Tiamsis Kuv yuav qhia Kuv txoj kev hlub rau cov uas hlub Kuv thiab coj rawsli Kuv tej kevcai, mus txog ntau txheeb tiam neeg.#20:6: ntau txheeb tiam neeg; lossis ntau txheeb leej. #Khiav 34:6-7; Teev 14:18; 2Kev 7:9-10; Levi 23:3

7“Tsis txhob muab Kuv lub npe siv ua-dog ua-dig, rauqhov Kuv yog tus TSWV, uas yog nej tus Vajtswv, yuav rautxim rau cov neeg uas muab Kuv lub npe mus siv ua-dog ua-dig. #Levi 19:12

8“Yuavtsum ncontsoov hnub Xanpataus,#20:8: Xanpataus: Lolus no lus Henplais txhais hais tias “hnub so.” thiab ceev cia ua hnub dawbhuv. #Khiav 16:23-30; 31:12-14 9Nej muaj rau hnub ua nej tej haujlwm, 10tiamsis hnub thib xya yog hnub Xanpataus, uas yog Kuv hnub so. Hnub ntawd nej yuavtsum tsis txhob ua haujlwm li, txawm yog nej tuskheej, nej tej menyuam, nej tej tubqhe, nej tej tsiajtxhu lossis lwm haivneeg uas nrog nej nyob hauv nej lub tebchaws. #Khiav 23:12; 31:15; 34:21; 35:2; Levi 23:3 11Kuv, uas yog tus TSWV, tsim lub ntuj thiab lub ntiajteb tau rau hnub; tsim dej hiavtxwv, thiab txhua yam uas nyob saum nruabntug thiab nyob hauv hiavtxwv, tiamsis Kuv so rau hnub thib xya. Yogli ntawd, Kuv, uas yog tus TSWV, thiaj foom koobhmoov rau hnub Xanpataus thiab muab hnub ntawd ua hnub dawbhuv. #Chiv 2:1-3; Khiav 31:17

12“Yuavtsum hwm nej niam nej txiv, kom nej thiaj yuav muaj sia ua neej nyob ntev rau hauv lub tebchaws uas Kuv muab pub rau nej. #2Kev 27:16; Math 15:4; 19:19; Malak 7:10; 10:19; Lukas 18:20; Efex 6:2; Efex 6:3

13“Tsis txhob tua neeg. #Chiv 9:6; Levi 24:17; Math 5:21; 19:18; Malak 10:19; Lukas 18:20; Loos 13:9; Yakau 2:11

14“Tsis txhob deev luag pojniam luag txiv. #Levi 20:10; Math 5:27; 19:18; Malak 10:19; Lukas 18:20; Loos 13:9; Yakau 2:11

15“Tsis txhob ua tubsab. #Levi 19:11; Math 19:18; Malak 10:19; Lukas 18:20; Loos 13:9

16“Tsis txhob ua timkhawv cuav tawmtsam nej tej kwvtij zejzog. #Khiav 23:1; Math 19:18; Malak 10:19; Lukas 18:20

17“Tsis txhob ntshaw luag vaj luag tsev; tsis txhob ntshaw luag poj luag sev, luag tej tubqhe, luag tej nyuj, luag tej neesluav lossis ib yam dabtsi uas yog luag tug.” #Loos 7:7; 13:9

Cov Neeg Txoj Kev Ntshai

(2 Kevcai 5:22-33)

18Thaum sawvdaws hnov xob nroo thiab hnov suab raj nrov ntxhe ntws, thiab pom muaj xob laim thiab pa ncho auv niab saum roob, lawv ntshai ua ibce tsheehnyo. Lawv sawv deb-deb 19hais rau Mauxes tias, “Yog koj hais rau peb, mas peb yuav mloog koj hais; tiamsis tsis txhob cia Vajtswv hais rau peb, nyobtsam peb tuag!”

20Mauxes teb tias, “Tsis txhob ntshai; Vajtswv tsuas yog los sim nej thiab ua kom nej hwm Nws, kom nej thiaj tsis mus ua txhaum xwb.” 21Tiamsis cov pejxeem tseem sawv nrug deb heev, tsuas yog Mauxes tibleeg xwb thiajli mus ze tauv huab tsaus nti uas Vajtswv nyob rau hauv.

Tej Kevcai Hais Txog Lub Thaj

22Tus TSWV kom Mauxes hais rau cov Yixalayees tias, “Nej twb pom Kuv, uas yog tus TSWV, haislus saum ntuj tuaj rau nej lawm. 23Nej tsis txhob muab nyiaj muab kub los nchuav ua tej nyuag vajtswv los ntxiv Kuv rau nej pehawm.

24“Muab av los puab ua ib lub thaj ua qhov chaw uas coj nej tej yaj thiab tej nyuj tuaj tua hlawv theej txhoj thiab ua kevcai fij ua kev sib raugzoo nrog lwmtus. Txhua qhov chaw uas Kuv kom nej pehawm Kuv, Kuv yuav nrog nej nyob thiab foom koobhmoov rau nej. 25Yog nej muab pobzeb teeb ua Kuv lub thaj, tsis txhob muab tej uas twb txaug tau lawm, rauqhov tej pobzeb uas nej siv ciaj los txaug lawm yuav ua rau lub thaj tsis huv. 26Nej tsis txhob ua qib ntai nce mus rau saum lub thaj uas nej ua rau Kuv, yog nej ua li ntawd, thaum nej nce mus rau saud, luag yuav pom nej chaw txajmuag.

Currently Selected:

Khiav Dim 20: MWW2022

Highlight

Copy