Khiav Dim 18

Yethoos Tuaj Saib Mauxes

1Mauxes yawmtxiv Yethoos uas yog tus povthawj hlob hauv tebchaws Midias, tau hnov txog tej uas Vajtswv ua pab Mauxes thiab pab cov Yixalayees thaum Nws coj lawv tawm hauv tebchaws Iziv los. 2Yogli ntawd, nws thiaj tuaj saib Mauxes thiab coj Xipaulas uas yog Mauxes tus pojniam uas Mauxes tau coj rovqab mus nrog nws nyob, #Khiav 2:21-22 3nrog rau Nkawsoos thiab Eli-exaws uas yog Xipaulas ob tug tub tuaj rau Mauxes. (Mauxes hais tias, “Kuv yog neeg txawv tebchaws, mus nyob rau hauv lub tebchaws uas kuv ibtxwm tsis tau paub dua”; yogli ntawd, nws thiaj tis nws tus tub hlob npe hu ua Nkawsoos.#18:3: Nkawsoos: Lub npe no hais muaj ntsis thooj li lolus Henplais uas hais tias “neeg txawv tebchaws.” #Teshl 7:29 4Mauxes tseem hais ntxiv tias, “Kuv txiv tus Vajtswv tau pab kuv thiab cawm kuv dim ntawm Falaus rab ntaj uas yuav tua kuv”; nws thiaj tis tus tub yau npe hu ua Eli-exaws.#18:4: Eli-exaws: Lub npe no hais muaj ntsis thooj li lolus Henplais uas hais tias “Vajtswv pab kuv.”)

5Mauxes yawmtxiv Yethoos, coj Mauxes tus pojniam thiab Mauxes ob tug tub tuaj rau Mauxes hauv tiaj suabpuam, ntawm thaj chaw uas Mauxes los tsuam chaw so nyob ze rau ntawm Vajtswv lub roob. 6Yethoos txib neeg mus hais rau Mauxes tias, “Kuv, uas yog koj yawmtxiv Yethoos, kuv tuaj saib koj thiab kuv coj koj pojniam thiab nws ob tug tub tuaj txog lawm.”

7Mauxes thiaj tawm mus ntsib nws yawmtxiv, hawm thiab nwj nws. Ces lawv txawm sibnug txog kev nojqab nyobzoo thiab mus rau hauv Mauxes lub tsevntaub lawm. 8Mauxes piav txhua yam uas tus TSWV tau cawm cov Yixalayees ua ntu zus ntawm Falaus thiab cov Iziv rau nws yawmtxiv Yethoos mloog. Mauxes tseem piav tej kev nyuajsiab uas cov Yixalayees raug thaum lawv taug kev los thiab tej uas tus TSWV cawm lawv dim rau Yethoos mloog huv tibsi.

9Thaum Yethoos hnov txhua yam no, nws zoosiab kawg li 10thiab nws hais tias, “Ua tus TSWV tsaug uas Nws tau cawm nej dim ntawm Falaus thiab cov Iziv los! Ua tus TSWV tsaug uas Nws tau cawm Nws haivneeg dim ntawm txoj kev ua luag qhev los lawm! 11Zaumno kuv paub tias tus TSWV yog tus uas muaj hwjchim loj tshaj tej nyuag vajtswv huv tibsi, rauqhov Nws tau ua tej no rau cov Iziv, thaum uas lawv caijtsuj thiab saib tsis taus cov Yixalayees hnyav heev.” 12Yethoos coj tsiaj tuaj tua hlawv kheej thiab coj lwmyam khoom tuaj fij rau Vajtswv, ces Aloos thiab cov Yixalayees tej thawjcoj thiaj tuaj nrog nws noj rooj mov tseemceeb ntawd timntsej timmuag ntawm Vajtswv.

Tsa Cov Tu Plaubntug

(2 Kevcai 1:9-18)

13Hnub tomqab Mauxes txawm mus zaum tu cov pejxeem tej plaub, thiab nws tu plaub thaum sawvntxov mus txog thaum tsausntuj. 14Thaum Yethoos pom txhua yam uas Mauxes ua, nws txawm nug hais tias, “Tej haujlwm uas koj ua no yog koj ua pab rau cov pejxeem puas yog? Vim licas koj thiaj tibleeg zaum ntawm no ua xwb, es tagnrho tej pejxeem ho sawvntxov tsees tuaj sawv tos koj ib hnub tsausntuj ntais li no?”

15Mauxes teb tias, “Kuv yuavtsum ua li no, rauqhov cov pejxeem tuaj cuag kuv, yog lawv xav paub txog Vajtswv tus dejsiab. 16Thaum muaj ob tug neeg tsis sibhaum, nkawd tuaj cuag kuv, kuv mam ua tus txiavtxim rau nkawd, thiab kuv muab Vajtswv tej lus xaaj thiab kevcai los qhia rau nkawd.”

17Yethoos teb tias, “Koj ua li no tsis yog lawm. 18Koj thiab cov pejxeem uas tuaj cuag koj yuav sab heev. Tej haujlwm no hnyav heev rau koj, koj ib leeg ua xwb yuav ua tsis taus. 19Koj mloog kuv hais nawb. Kuv yuav pab qeeyam tswvyim rau koj, thiab thov Vajtswv nrognraim koj. Koj yuavtsum ua tus sawvcev cov neeg rau ntawm Vajtswv thiab coj lawv tej plaubntug mus cuag Nws. 20Koj yuavtsum qhia Vajtswv txoj kevcai rau lawv, thiab ua tibzoo piav kom lawv totaub hais tias lawv yuavtsum ua lub neej licas thiab yuav ua dabtsi thiaj zoo.

21“Tiamsis ntxiv rau qhov ntawd thiab, koj yuavtsum xaiv ib co txivneej uas muaj peevxwm thiab tsa lawv ua cov thawjcoj saib cov pejxeem: tsa cov uas saib 1,000 tawm leej, 100 tawm leej, 50 tawm leej, thiab tawm 10 leej. Lawv cov no yuavtsum yog cov uas hwm Vajtswv, yog cov uas sawvdaws ntseegsiab tau, thiab yog cov uas luag xuas nyiaj xiab tsis tau lawv. 22Cia lawv ua cov tu plaubntug rau cov pejxeem mus li. Tej plaubntug loj mam kom lawv coj tuaj cuag koj, tiamsis tej plaubntug me, cia rau lawv tu. Ua li no koj lub nra thiaj yuav sib, rauqhov lawv tub pab koj ris koj lub nra lawm. 23Yog koj ua li no, thiab yog Vajtswv xaaj kom koj ua, mas koj yuav tsis sab, thiab cov pejxeem yuav rov mus tsev nrog txoj kev kajsiab.”

24Mauxes mloog nws yawmtxiv tej lus thiab ua txhua yam li nws qhia, 25Mauxes thiaj xaiv cov neeg uas muaj peevxwm hauv cov Yixalayees, thiab muab lawv tsa ua cov thawj saib 1,000 tawm leej, 100 tawm leej, 50 tawm leej, thiab 10 tawm leej. 26Lawv ua cov tu tej plaubntug rau cov pejxeem mus li; lawv coj tej plaubntug loj tuaj rau Mauxes tu, tiamsis lawv ua cov tu tej plaubntug me.

27Ces Mauxes txawm xa nws yawmtxiv Yethoos sawvkev rovqab mus tsev lawm.

Currently Selected:

Khiav Dim 18: MWW2022

Highlight

Copy