Khiav Dim 11

Mauxes Qhia Txog Cov Tub Hlob Yuav Tuag

1Ces Vajtswv hais rau Mauxes tias, “Kuv yuav rautxim rau Falaus thiab cov Iziv ib zaug ntxiv thiab. Tomqab ntawd nws yuav tso nej mus. Nws yuav ntiab nej tawm hauv no mus kom tag. 2Koj mus hais rau cov Yixalayees kom lawv txhua tus mus thov lawv cov neeg zejzog tej saw nyiaj saw kub.” 3Tus TSWV ua kom cov Iziv hwm cov Yixalayees. Falaus cov nomtswv thiab tagnrho tej pejxeem puavleej suav hais tias Mauxes yog ib tug neeg tseemceeb heev.

4Mauxes txawm hais rau Falaus tias, “Tus TSWV hais tias, ‘Thaum ib taghmo Kuv yuav mus kom thoobplaws tebchaws Iziv. 5Txhua tus tub hlob uas nyob hauv Iziv yuav tuag tagnrho, suav txij Falaus tus uas nyob saum lub zwmtxwv tus tub hlob mus txog rau tus poj qhe uas zomzeb tus tub hlob. Tej tsiajtxhu thawjtug menyuam los yuav tuag tag huv tibsi thiab. 6Yuav muaj suab quaj suab nyiav ntshoonrooj thoobplaws hauv lub tebchaws Iziv, uas ibtxwm yeej tsis tau muaj dua lossis yuav tsis muaj ib zaug ntxiv li lawm. 7Tiamsis cov Yixalayees yuav nyob ntsiagto, twb tsis hnov txog ib lub suab dev tsej neeg lossis tsiajtxhu li. Thaum ntawd koj yuav paub tias Kuv yog tus TSWV uas ua rau muaj kev sibtxawv nruabnrab ntawm cov Iziv thiab cov Yixalayees.’ ”

8Mauxes xaus lus hais tias, “Tagnrho koj cov nomtswv yuavtsum tuaj cuag kuv thiab yuav qhau cev hlo pe kuv, thiab thov kom kuv coj tagnrho kuv haivneeg mus, mas tomqab ntawd kuv mamli tawm mus.” Mauxes npautaws heev ua ntsejmuag dub txig tawm hauv Falaus lub loog mus lawm.

9Tus TSWV hais rau Mauxes tias, “Falaus yuav tsis kam mloog koj lus, kom Kuv thiaj tau ua Kuv tej txujci tseemceeb rau hauv tebchaws Iziv no ntxiv.” 10Mauxes thiab Aloos ua tej txujci tseemceeb no tabmeeg Falaus, tiamsis tus TSWV ua rau Falaus lub siab tawv, nws thiaj tsis tso cov Yixalayees tawm hauv nws lub tebchaws Iziv mus li.

Currently Selected:

Khiav Dim 11: MWW2022

Highlight

Copy