Efexaus 5

Ua Neej Nyob Hauv Qhov Pomkev

1Vim nej yog Vajtswv cov menyuam uas Vajtswv hlub, nej yuavtsum xyaum ua nej lub neej rawsli Vajtswv tus yamntxwv. 2Nej yuavtsum ua nej lub neej nyob rau hauv txoj kev hlub, ib yam li Khetos hlub peb thiab Nws muab Nws txojsia los pub rau peb zooli tej tshuaj tswqab uas muab fij rau Vajtswv uas ua rau Vajtswv txaussiab heev. #Khiav 29:18; Nnkauj 40:6

3Vim nej yog Vajtswv haivneeg lawm, tsis tsimnyog uas yuav muaj kev nkauj kev nraug, kev ua phem ua qias thiab kev ntshaw luag tug tshwm nyob rau hauv nej kiag li. 4Thiab tsis tsimnyog nej siv tej lus uas vuabtsuab, tej lus phem tsis zoo thiab tej lus tso dag tso luag txog lwmtus lub cev; qhov yuav tsimnyog tiag mas nej ciali ua Vajtswv tsaug zoo dua. 5Kuv xav kom nej paub tseeb-tseeb hais tias, cov neeg uas ua nkauj ua nraug, ua phem ua qias thiab pheej ntshaw luag tug (kev ntshaw luag tug ces zoo ib yam li kev pe dab pe mlom), cov ntawd, lawv yuav tsis muaj feem mus nyob hauv Khetos thiab Vajtswv lub Tebchaws hlo li.

6Tsis txhob cia leejtwg ntxias tau nej los ntawm tej lus uas tsis muaj hauvpaus hauvntsis. Twb yog vim tej no ntag lau, Vajtswv thiajli npautaws rau cov neeg uas tsis mloog Vajtswv lus. 7Yogli ntawd, nej tsis txhob mus nrog cov neeg ntawd uake kiag li.

8Yav tas los nej yeej nyob hauv qhov tsausntuj, tiamsis nimno nej twb dhau los ua Vajtswv haivneeg lawm, nej twb los nyob rau hauv qhov pomkev lawm. Yogli ntawd, nej yuavtsum ua nej lub neej kom zooli cov neeg uas nyob hauv qhov pomkev, 9vim tias txhua yam uas yog txoj kev zoo, txoj kev ncajncees thiab txoj kev tseeb, puavleej yog los ntawm qhov pomkev#5:9: qhov pomkev; tej phau ntawv qub uas xuas tes sau, muaj tus Ntsujplig. ntawd los.

10Yuav tau ua tibzoo tshawb saib seb yam twg yog yam uas haum Vajtswv siab. 11Tsis txhob muaj feem rau tej yam tsis muaj qabhau uas yog kev tsausntuj li haujlwm, tiamsis nej ciali muab tej ntawd los nthuav rau ntawm qhov pomkev. ( 12Rauqhov tej uas cov neeg uas tsis mloog Vajtswv lus ua nraim nkoos ntawd, txawm yog yuav hais txog xwb los twb txajmuag kawg li.) 13Thaum muab txhua yam ntawd los nthuav rau ntawm qhov pomkev lawm, sawvdaws yuav pom qhov tseeb hais tias tej ntawd zoo licas, 14rauqhov txhua yam uas muab nthuav tawm lawm, yuav pom tseeb tuaj.#5:14: txhua yam uas muab nthuav tawm lawm, yuav pom tseeb tuaj; lossis qhov pomkev yog yam uas yuav nthuav kom txhua yam pom tseeb tuaj. Twb yog vimli ntawd thiaj muaj lus sau tseg hais tias:

“Tus neeg uas pw tsaugzog, koj ciali tsim,

thiab sawv hauv txoj kev tuag rov los,

thiab Khetos yuav ci pomkev rau koj.”

15Yogli ntawd, nej yuavtsum ceevfaj txog nej txoj kev ua neej. Tsis txhob ua li cov neeg ruam ua, tiamsis yuavtsum ua li cov neeg uas muaj tswvyim ua. 16Nej yuavtsum siv txhua lub sijhawm kom muajnqis, rauqhov niajhnub no neeg ua phem kawg li. #Kaulx 4:5 17Yogli ntawd, tsis txhob ua ib tug neeg ruam, tiamsis yuavtsum totaub hais tias Vajtswv tus dejsiab rau nej yog dabtsi.

18Tsis txhob haus cawv kom qaug, uas yuav ua rau nej puastsuaj. Tiamsis ciali puvnpo Vaj Ntsujplig yuav zoo dua. 19Ciali sib txhawbzog los ntawm Daviv tej nkauj, tej nkauj qhuas Vajtswv, thiab tej nkauj uas hais txog kev ntseeg. Ciali seev suab hunkauj hauv nej lub siab los rau tus Tswv. 20Ncontsoov ua Vajtswv uas yog peb Leejtxiv tsaug rau txhua yam hauv Yexus Khetos lub npe. #Kaulx 3:16-17

Cov Pojniam Thiab Txiv

21Vim qhov uas nej hwm Yexus Khetos, nej ib leeg yuavtsum txaussiab hlo mloog ib leeg lus.

22Nej cov uas yog pojniam, nyias yuavtsum mloog nyias tus txiv lus ib yam li nej mloog tus Tswv lus. #Kaulx 3:18; 1Pet 3:1 23Rauqhov tus txiv yog tus pojniam lub taubhau ib yam li Khetos yog pawg ntseeg lub taubhau. Pawg ntseeg yog Khetos lub cev, thiab Khetos yog pawg ntseeg tus Cawmseej. 24Yogli ntawd, nej cov uas yog pojniam, nyias yuavtsum mloog nyias tus txiv lus txhua lo, ib yam li pawg ntseeg mloog Yexus Khetos lus.

25Nej cov uas yog txiv, nyias yuavtsum hlub nyias tus pojniam ib yam li Khetos hlub pawg ntseeg, es Nws tau muab Nws txojsia los txhiv pawg ntseeg. #Kaulx 3:19; 1Pet 3:7 26Nws ua kom pawg ntseeg dawbhuv los ntawm qhov uas Nws muab pawg ntseeg ntxuav hauv dej thiab hauv Nws Txojlus. 27Nws ua li ntawd kom Nws thiaj tau pawg ntseeg uas zoo kawg nkaus, tsis muaj ib qho txhaum, tsis ceb tsis txoom thiab dawbhuv los ua Nws tug. 28Ib yam nkaus li ntawd, nej cov uas yog txiv, nyias yuavtsum hlub nyias tus pojniam ib yam li nyias hlub nyias lub cev. Tus txivneej uas hlub nws tus pojniam, yog nws hlub nws tuskheej. ( 29Yeej tsis muaj leejtwg yuav ntxub nws lub cev. Tsuas muaj yuav tu ntshis thiab nrhiav zaub nrhiav mov los yug nws lub cev, ib yam li Khetos ua rau pawg ntseeg; 30rauqhov peb sawvdaws puavleej koom Yexus lub cev.)

31Rawsli muaj lus sau cia rau hauv Vajtswv Txojlus hais tias, “Twb yog vimli no tus txivneej thiaj tso nws niam nws txiv tseg, thiab mus nrog nws tus pojniam tsheejxeeb uake, thiab nkawd yuav koom ua ib lub cev.” #Chiv 2:24 32Nqe no yog ib lolus tseeb uas tau muab zais cia tob heev. Kuv totaub hais tias nqe no yog piv txog Khetos thiab pawg ntseeg. 33Tiamsis nqe no kuj yog piv txog nej thiab: txhua tus txiv nyias yuavtsum hlub nyias tus pojniam ib yam li nyias hlub nyias tuskheej, thiab txhua tus pojniam nyias yuavtsum hwm nyias tus txiv.

Currently Selected:

Efexaus 5: MWW2022

Highlight

Copy